Den Bybel met groter neersticheyt ghecorrigeert (Liesveltbijbel 1542)

Godt thoont den Prophete wat slach datter inden volcke aenstaende is

Dat .ix. Capittel

1

⁺ENde hi riep met luyder stemmen, voor mijnen ooren, ende sprac, Het is na bi, dat die stadt sal versocht worden, Ende een yegelic hadde een moordelic wapen in sijn handt,

+ A vers 1

2

Ende siet, Daer quamen ses mannen op den wech, van die hooghe poorte herwaerts, die tegen dat noorden staet, ende een yegelijc hadde een scadelic wapen in sijn hant, Mer daer wasser een onder haer, die hadde een lijnen cleet aen, ende eenen scrijfkokere aen sijnder siden, Ende si ghingen in, ende traden neffens den metalen outaer

3

Ende die heerlicheyt des Gods Israhel verhief haer vanden Cherub, daer si ouer was, totten dorpel vanden huyse, ⁺ Ende riep, den ghenen, die dat lijnen cleet aen hadde, ende den scrijfkokere aen sijnder siden,

+ B vers 3

4

Ende die HERE sprac tot hem, Gaet door die stadt Hierusalem ende teekent met dat teeken Thau, aen die voorhoofden, die luyden die daer suchten ende trueren om alle der grouwelen wille, die daer in gescieden,

5

Maer totten anderen sprack hi, dat ict hoorde, gaet desen na door dye stadt, ende slaet daer in, Vwe ooghen en sullen niet sparen noch voorbi gaen,

6

Slaet doot, beyde ouden ende iongen, die ionghe gesellen metten maechden, wijuen ende kinderen, Mer alle die gene die dat teeken Tau aen haer hebben, van dien en sult ghi geen aenroeren, Mer beghint aen mijn Heylichdom, Ende si begonsten aen die oude luyden, die voor den huyse waren.

7

Als ghi dat huys oft tempel veronreynicht hebt ende den voorhof met doode lichamen veruult hebt, So gaet hier wt, Ende si ghingen daer wt, ende sloegen in die stadt,

8

Ende als si nv den slach voleynt hadden, so was ic noch ouerghebleuen, ende ic viel op mijn aensicht, ic riep, ende sprack, Ach HERE God, wilt ghi dan alle ouergebleuen in Israel verderuen? want ghi uwen thoorne wtstort ouer Hierusalem?

9

Ende hi sprack tot mi, Die misdaet des huys Israhels ende Iuda is bouen maten groot, Daer is enckel gewelt ende onrecht inden lande ende inder stadt, Want si segghen, Die HERE heeft dat lant verlaten, Ende die HEERE en siet ons niet,

10

Daer omme en sal mijn ooghe haer oock niet sparen Maer ic wil met haer omme gaen, soo si verdient hebben,

11

Ende siet, die man die dat lijnen cleet aen hadde, ende den scrijfkokere aen sijnder siden, antwoorde, ende sprack, ick hebbe ghedaen, ghelijck ghi mi beuolen hadt