Den Bybel met groter neersticheyt ghecorrigeert (Liesveltbijbel 1542)

¶ God verthoont den prophete die welluste des conincx ende der sinen

Dat .xij. Capittel.

1

⁺ENde des HEREN woort ghesciede tot mi, ende sprac,

+ A vers 1

2

Ghy menschen kint Ghi woont onder een ongehoorsaem volck Die welcke wel ooghen hebben dat si sien connen, ⁺ ende en willen niet sien

+ mat. xiij Iere. vi.

[p. *]

Ende ooren, dat si hooren connen, ende en willen nyet hooren, Maer het is een ongehoorsaem volc,

3

Daeromme du menschen kint, Schict v, dat ghi wandelt, ende trect inden lichten dach daer van voor haren oogen Van dijnre plaetse sult ghi trecken op een ander plaetse, voor haren oogen, oft si bi auontueren mercken wouden, dat si een onghehoorsaem volc sijn,

4

Ende ghi sult dijnen huysraet ooc daer wt doen, recht oft ghi reysen wout, bi lichten dage voor haren oogen, Ende ghi sult tsauonts wt trecken voor haren oogen ghelijck alsmen wt trect, wanneer men reysen wil,

5

Ende ghi sult door die want breken, voor haren ooghen, ende daer door wt trecken voor haren ooghen

6

Ende ghi sultet op uwe schouderen nemen, voor haren ooghen, ende alst doncker gheworden is, wech draghen, Ghi sult v aensichte bedecken, op dat ghi dat lant niet en siet, ⁺ Want ic hebbe v den huyse Israels tot een wonder teeken geset

+ B vers 6

7

Ende ick dede als mi beuolen was, ende droech mijnen huysraet wt, recht oft ic wandelen woude, biden lichten dage, Ende aenden auont brac ic met der hant door die want, Ende alst duyster geworden was doen nam ict op die schouderen, ende droecht wt voor haren ooghen

8

Ende des morgens gheschiede des HEEREN woort tot my, ende sprack,

9

Menscen kint, Oft dat huys Israhels, dat ongehoorsaem volc tot v seyde, Wat maect ghi?

10

So segt tot haer, Also spreect dye HERE God, Desen last (oft straffinghe) gaet den vorsten tot Hierusalem aen, ende dat gantse huys Israhels, dat daer is,

11

Spreect, Ic ben uwe wonder teeken, ghelijc als ic ghedaen hebbe, also sal v gheschien, dat ghi sult moeten wandelen ende verhuysen ende geuanghen wech geuoert worden,

12

Vwe vorst sal inden duysteren wech geuoert worden op die scouderen, ende sal door die want moeten wech trecken, die si breken sullen, op dat si daer door wt trecken, sijn aensicht sal bedect worden, op dat hi met geene oogen dat lant en sie

13

Ic wil ooc mijn nette ouer hem werpen, op dat hi in mijnder iachte gheuangen worde, Ende ick wil hem tot Babilonien brenghen inder Chaldeer lant, dat hi doch niet sien en sal, ende hi sal aldaer steruen,

14

Ende alle die omtrent hem sijn, sinen hulpe ende aenhanc wil ic onder alle die winden verstroyen ende dat sweert achter hem wt trecken

15

Also sullen si weten, dat ic die HERE ben, als icse onder die Heydenen verstoote, ende inden lande verstroye,

16

mer ic wil haerder een weynich laten ouerblijuen voor dat sweert, honger, ende pestilentie, die sullen der andere grouwelen vertellen onder die heydenen, derwaerts si comen sullen ende sullen vernemen dat ic die HERE si

17

Ende des HEREN woort gheschiede tot my ende sprac, Du menschen kint Ghi sult dijn broot eten, met beuen, ende dijn water drincken met sorghe,

18

Ende totten volcke inden lande, Also seyt die HEERE God vanden inwoonders tot Hierusalem, inden lande Israhels,

19

Si moeten haer broot eten met sorge, ende haer water drincken in allenden, Want dat landt sal woest worden, van al dat daer inne is, om der boosheyt wille alle der inwoonders,

20

Ende die steden die wel bewoont sijn, die sullen verdoruen worden, ende dat lant sal eensaem worden, Also sult ghi weten, dat ic de HERE si

21

Ende des HEREN woort gheschiede tot mi ende sprack,

22

Ghy menschen kint, Wat hebt ghi voor een spreecwoort inden lande Israhels, ende segt. Aengesien dattet so lange vertrect, so en sal daer niet af comen van dijnder propheteringe,

23

Daeromme segt tot haer, Alsoe seyt die HERE God, Ick wil dat spreecwoort wech nemen, also ooc, datment niet meer gebruycken en sal in Israhel, Ende segt tot haer, Die tijt is na bi, ende ooc alle tgene datter gepropheteert is,

24

Want ghi sult nv voort aen weten, dat geene prophetie faelgeren, ende geen gesichte liegen en sal, tegen dat huys Israels

25

Want ic ben die HERE, so wat ic spreke, dat sal gescieden, ende niet langer vertoghen worden, Mer in uwer tijt ghi ongehoorsaem volck, wil ict doen, so wat ic spreke, seyt die HERE God

26

Ende des HEREN woordt ghesciede tot my, ende sprack

27

ghi menscen kint, Siet, dat huys Israels seyt Het gesicht dat dese siet, dat is noch lange te comen, Het is noch lange te geschieden dat hi propheteert Daeromme segt tot haer,

28

Also seyt die HERE God so wat dat ic spreke, dat en sal niet langer vertogen worden, Mer het sal gescieden seyt die HERE God