Den Bybel met groter neersticheyt ghecorrigeert (Liesveltbijbel 1542)

Dat volck wort vermaent, dat si die valsche prophetie niet hooren en souden, Ende den lueghenachtighen propheten wort haer straffinghe bewesen

Dat .xiij. Capittel

1

⁺ENde des HEREN woort gheschiede tot mi, ende sprack,

+ A vers 1

2

Ghi menschen kint Propheteert teghen die propheten Israhels, ⁺ ende spreect totten ghenen dye wt haer eyghen herte prediken, hoort dat woort des HEREN, Also spreect die HEERE God,

+ deu xviij Osei. iij Nu. iij.

3

Wee den dullen propheten, die haren eygenen geest volgen, ende en hebben nochtans geen gesichten,

4

O Israel dine propheten sijn ghelijc als vosschen inder woestijnen,

5

Si en treden niet voor die holen, ende en maken haer niet tot eender hage, voor dat huys Israhels, ende si en staen niet inden strijt, inden dage des HEREN,

6

Haer gesichte is niets niet ende haer prediken is enckel luegen, Si segghen, Die HERE heuet geseyt, In dien die HERE haer doch niet gesonden en heeft, ende si maken haer moede, op dat si haer dingen moghen onderhouden.

7

En ist niet also? dat uwe ghesichte niet en is? ende uwe prekingen, enckel lueghen? ende ghi segt nochtans, Die HERE heuet gheseyt, Hoe wel dat ict niet ghesproken en hebbe?

8

Daeromme spreect die HERE God also. Aengesien ghi predict, daer gants niet af en coemt, ende propheteert luegenen, Daeromme wil ic aen v, seyt de HERE God,

9

ende mine hant sal comen ouer propheten, die daer prediken, daer niet wt en coemt, ende luegenen propheteren, Si en sullen in die versaminge mijns volcx niet zijn, ende in dat getal des huys Israels, en sullen si niet gescreuen worden noch int lant Israels comen, ende ghi sult weten dat ic de HERE God ben,

10

Daeromme dat si mijn volc verleyden, ende segghen, Vrede, Alsser noch geenen vrede en is, dat volc maect een want oft muere ende si placken ende plaesterense met quaden kalc oft slijc.

11

⁺Segt totten plaesteraers, die met quaden kalc placken, dattet af vallen sal want daer sal eenen slachregen comen, ende daer sullen groote hagelsteenen vallen ende daer sal eenen draywint in stormen,

+ B vers 11

12

Siet alsoo sal die want om vallen, Wat geldet? Dan salmen tot v seggen, Waer is nv dat geplaestert? dat ghi geplact had

13

Also seyt die HEERE God, Ic wil eenen drayenden wint laten ruysschen in mijnder verbolgentheyt, ende eenen plasreghen in mijnen toorne, ende groote hagelsteenen in mijnder gramscappe, die selue sullent altemale om stooten,

14

Also wil ic die want omwerpen die welcke ghi met valscen kalc gheplaestert hebt, ende ic wilse ter neder stooten, also datmen ooc haer fundament sien sal, dat si aldaer ligge, ende onder dat selue sult ghi ooc vergaen, ende beuinden dat ick

[p. *]

die HERE si,

15

Also wil ic mijn verbolgentheit voleynden aenden want, ende aenden ghenen diese met quaden kalc geplaestert hebben ende tot v segghen, Hier en is noch want, noch plagger,

16

Dat sijn die propheten Israels, die Hierusalem prediken, ende seggen, van vrede, alser noch geenen vrede en is, spreect de HERE God

17

Ende ghi menschen kint, Stelt v aensichte tegen die dochteren in dinen volcke, die daer prediken wt haer eygen herten, ende predict tegen haer, ende segt

18

Also spreect die HEERE God, wee v, ghi die cussenen steect den luyden onder die armen, ende pueluwen onder die hoofden, beyde den iongen ende den ouden, om die sielen te vangen,

19

Ende als ghi nv die sielen geuangen hebt, onder mijnen volcke, so belooft ghi den seluen dat leuen, ende ontheylicht mi in mijnen volcke om een hantuol gerste, ende een stuck broots, op dat ghi die sielen ter doot verordeelt, die ghi noch niet en sout dooden, Ende ghi oordeelt die totten leuen, dien ghi dat leuen doch niet toe seggen en soudet door uwe lueghenen onder mijnen volcke, dwelcke gheerne lueghenen hoort.

20

Daeromme spreect die HERE God, Siet, Ic wil aen uwe cussenen daer mede ghi die sielen vangt ende vertroost, ende ic wilse wt uwen arme wech rucken ende die sielen die ghi vanget, ende vertroost, los maken,

21

ende ic wil uwe pueluwen in stucken schueren, ende mijn volc wt uwer hant verlossen, also dat ghise niet meer vangen en sult, ende ghi sult beuinden dat ic die HERE si

22

Daeromme dat ghi dat herte der oprechter met luegenen bedroeft, die ick niet bedroeft en hebbe. Ende hebt gesterct die hant der godlosen, alsoe dat si haer van hare boose wegen niet en bekeeren, op dat si mochten leuende blijuen,

23

Daerom en sult ghy gheen onnutte leeringen meer prediken, noch propheteren, Mer ic wil mijn volc wt uwen handen verlossen, ende ghi sult weten, dat ic die HERE ben.