Den Bybel met groter neersticheyt ghecorrigeert (Liesveltbijbel 1542)

Hi straft die ghene die so onbeschaemdelicken ende vermetelijcken teghen God sondighen, ende dies niet te min Godt den HERE bidden doruen, Die alsulcke sijn, die laet God door die valsche propheten verleyt worden, ende hi en verhoortse niet, al baden oock die gerechte voor haer

Dat .xliij. Capittei.

1

⁺ENde daer quamen sommige vanden outsten Israels tot mi ende stelden haer bi mi

+ A vers 1

2

Doen gesciede dat woort des HEEREN tot mi, Ende sprack,

3

Menscen kint. Dese luyden hanghen met haren herten aen hare Goykens oft beelden, Ende si hebben die argernisse ende aenstoot haerder hoerderije voor haer genomen, Soude ic haer dan antwoorden? als si mi raets vragen,

4

Daeromme spreect met hen, ende segt tot haer, Also seyt die HERE God, So wat mensche vanden huyse Israels die Goykens oft beelden inder herten draget. Ende neemt voor hem den aenstoot sijnre afgoderie, ende coemt totten prophete, So wil ic dye HERE selfs, den seluen antwoorden, gelijc hy verdient heeft met sijnder groter afgoderije,

5

dattet huys Israels bedrogen wert in haerder herten, daeromme dat sy van mi geweken sijn door menigerley afgoderije.

6

Daeromme sult ghi totten huyse Israels seggen Also seyt die HEERE Godt, Keert ende wendt v van uwer afgoderije, ende keeret v aensichte van alle uwen grouwelen,

7

Want so welcke mensche vanden huyse Israels, oft vreemdelinc, die in Israel woont, van mi wijcket, ende met sijnder herten aen sine Goykens hangt, ende die ergernisse ende aenstootinge sijnder afgoderie onderhout, ende totten prophete coemt, op dat hi door hem mi vrage,

8

dien wil ic die HERE selfs antwoorden, ende wil mijn aensicht tegen den seluen setten, ende hem tot eenen teeken ende spreecwoort maken ende ic wil hem wt mijnen volcke roeyen, dat hi beuinden sal dat ic die HERE si.

9

In dien een valsche prophete anders predict, soo heb ic die HERE, selfs desen prophete verleit, ende ic wil mijn hant ouer hem wtstrecken, ende hem wt mijnen volcke Israels roeyen,

10

Also sullen si beyde hare misdaet draghen, gelijc als die misdaet des vragers, also sal ooc sijn die misdaet des propheten, ⁺

+ deu. xiij.c iij.reg. xxij rom. i.

11

op dat si dat huys Israels niet meer en verleyden van my, ende datse haer niet meer en veronreynigen, in alderley haerder ouertredingen, Mer si sullen mijn volc sijn, ende ic wil haer God sijn, seyt die HERE God.

12

Ende dat woort des HEREN geschiede tot mi ende sprac.

13

⁺Ghi menschen kint, Als dat lant tegen my sondicht, ende daer toe mi versmaet, So wil ick mijn hant ouer dat selue wtstrecken, ende den voorraet ende prouisie des broots wech nemen, ende wil eenen dieren tijt onder haer seynden, also dat ic beyde, die menscen ende die beesten daer in wt roeyen sal,

+ B vers 13

14

Ende oft dan alle dese drie mannen, Noah, Daniel ende Hiob, ⁺ onder haer waren, so en sullen si nochtans niet meer dan alleen haer eygen sielen, in haerder gerechticheyt mogen verlossen, spreect die HERE God.

+ mar. xv. ioan. ij.

15

Ende als ic boose dieren int lant brengen sal die die menschen verslinden ende veriaghen sullen, ende dat selue lant verwoesten, datter nyemant in gewandelen en conde, vanden dieren,

16

ende dese drie mannen waren oock daer in, So waerlic als ic leue seyt die HEERE, God, dat si noch sonen, noch dochteren en sullen mogen verlossen, Mer alleen haers selfs, Ende dat lant moet woest worden.

17

⁺Ofte in dien ic dat sweert liet comen ouer dat lant ende sprake. Sweert vaert henen door dlant, ende dat ic also beyde die menscen ende die beesten wt roeyde,

+ C vers 17

18

ende die drie mannen daer in waren, So waerlic als ic leue seyt die HERE God, si en sullen noch sonen, noch dochteren verlossen. Mer si alleen sullen verlost sijn.

19

Oft in dien ick een pestilencie int lant sonde, ende mijn gramscap ouer dat selue wtstortede, met bloet stortinge, also dat ic beyde, die menscen ende dye beesten wtroeyde,

20

Ende Noah, Daniel, ende Hiob waren daer in, So waerlic als ic leue, seyt die HERE God, so en sullen si noch sonen, noch dochteren, maer alleen haer eygen sielen, door hare gerechticheyt verlossen.

21

Want also spreect die HERE God, In dyen ic mijn vier boose straffinghen, als sweert, honger, boose dieren, ende pestilencie ouer Hierusalem sonde, op dat ic daer in wtroeyden, beyde die menschen, ende die beesten,

22

Siet, so sullen nochtans somighe ouergebleuen daer van comen, die sonen ende dochteren daer wt brengen sullen, die selue sullen van v comen, dat ghi sien sult, hoe dattet haer gaet, ende sult v troosten van dat ongeluc, dat ic ouer Ierusalem heb laten comen met alle dandere, dat ic ouer haer heb laten gheschieden

23

Si sullen uwen troost sijn, als ghi sien sult, hoe dattet haer gaet. Ende ghi sult beuinden, dat ict niet sonder oorsaecke ghedaen en hebbe, so wat ic daer inne gehandelt hebbe, spreect die HERE God.