Den Bybel met groter neersticheyt ghecorrigeert (Liesveltbijbel 1542)

Dat .xxviij. Capittel.

1

⁺ENde des HEREN woort gheschyede tot mi ende sprack,

+ A vers 1

2

Du menscen kint, Segt den Vorsten tot Tyro, Also spreeckt die HERE God. Daer om dat hem dijn herte verheft ende segt, Ick ben God Ic sitte in eenen throone gelijc een God, midden op dat meyr. Hoe wel ghi een mensche, ende geen God en sijt

[p. *]

Nochtans so verheft hem dijn herte, recht oft ghy een God waert,

3

Siet ghi laet v duncken, dat ghy wijser zijt dan Daniel,

4

also datter voor v nyedt verborgen en si. Ende ghi hebt door dijn wijsheyt ende verstant sulcke macht vercreghen, ende scatten van gout ende siluer vergadert. ⁺

+ Dan. ij.

5

Ende hebt door dine groote wijsheyt ende coopmanschap also grooten macht verworuen. Daer van bistu so stout geworden, dat ghi so machtich sijt.

6

Daeromme spreect dye HERE God also, Aen ghesien dan dat dijn herte hem verheft, recht oft ghy God waert,

7

Daeromme siet ick wil dye vreemde ouer v seynden, te weten, Dye Tyrannen der heydenen, dye sullen haer sweerdt trecken ouer dijn schoone wijsheyt ende dijn grote eere tot schanden maken,

8

Si sullen v hier onder inder cuylen stooten, also datstu midden op dat meyr steruest, gelijc als die verslagen,

9

Wat gheldet? oft ghy dan voor dinc dootslagher seggen sult? Ic ben God, Hoe wel ghy gheen God, maer een mensche ende in dijns dootslagers hant sijt,

10

Ghi sult steruen gelijc die onbesneden van die hant der vreemder. Want ic hebt gesproken seyt die HERE God.

11

Ende des HEREN woort gheschyede tot my, ende sprack,

12

Du menschen kint, ⁺ Maect een claghe ouer den Coninck tot Tyro, ende spreect tot hem, Also seyt dye HERE God, du bist een oueruloeyende fraeyheyt van eenen schonen wercke, der wijsheydt vol, ende bouen maten schoone, Du bist eenen lusthof Gods met allerley ghesteenten verciert,

+ B vers 12

13

te weten Sardes, Tapaser, Robijn, Diamant, Tuykoys, Carbonckel Onichen Iaspis, Smaragd, ende gout, Ende ghi hebt van begin sint dat ghy Coninck geworden sijt, met tamborijnen ende pijpen ghetriumpheert.

14

Du bist als een Cherub dye haer wijt wt breyt, Ende ick hebbe v opten heylighen berch Gods ghesedt, op dat ghy onder den Carbunkelen wandelde,

15

ende waert seer schoon vanden beghinne aen, ter tijt toe, dat haer dine misdaet gheuonden heeft

16

Want du bist van binnen vol gewelts, ende onrechts geworden, van dijnder groter coopmanscap wegen, ende hebt v besondicht, Daeromme wil ick v ontheyligen vanden berge Gods, ende wil v (die een wtghebreede Cherub waert) wten Carbonckelen verstooten,

17

Ende om dat hem dijn herte verheft, dat ghi so schoone sijt ende ghy hebt v uwe wijsheit laten bedriegen, in dijne houaerdicheit. Daerom wil ick v ter neder stoten, ende een gaepsel wt v maken voor alle coninghen,

18

Want du hebst dijn heylichdom verderft, met dijnder grooter misdaedt ende onrechte handelinge. Daerom wil ic een vier wt v laten opgaen, dat v verteren sal. Ende ick wil v tot asschen maken opter aerden, also dat alle dye werelt toe sien sal.

19

Alle die v kennen onder die heydenen, die sullen haer verwonderen van v, om dat ghi so bottelijken zijt vergaen, ende voort aen nemmermeer op en coemt.

20

Ende des HEREN woort gheschyede tot my, ende sprac,

21

⁺Du menschen kint Keert dijn aensicht teghen Zydon, ende propheteert teghen haer, ende segt,

+ C vers 21

22

Also spreect dye HERE God, Siet ick wil aen v O Zydon, ende ic sal in v gheeert worden, datmen weten sal dat ic die HERE ben, als ick recht ouer haer laet gaen, ende aen haer bethoone, dat ic Heylich si.

23

Ende ic wil pestilencie ende een bloetstortinghe onder haer seynden, op hare straten. Ende si sullen dootlijcken ghewont v allen doort sweert, dwelcke ouer al ouer haer gaen sal. Ende si sullen beuinden dat ick die HERE ben,

24

Ende daer en sal voort aen ouer al omtrent den huyse Israhel, daer hare vyanden zijn, noch doorne, noch prickel bliuen, op dat si leeren dat ic dye HERE God ben.

25

Also spreect dye HERE God, Als ick dat huys Israhels weder vergaderen sal vanden volckeren derwaerts si verstroeyt zijn so wil ick voor die Heydenen aen haer bewisen, dat ick heylich ben. Ende si sullen in haren lande woonen, dwelc ic mijnen knecht Iacob gegeuen hebbe,

26

Ende si sullen sonder vreese daer in woonen, ende huysen tymmeren, ende wijngaertackers planten. Ia sonder sorghe sullen si woonen, als ic dat recht laet gaen ouer alle hare vyanden rontomme. Ende si sullen weten dat ic die HEERE haer God ben.