Den Bybel met groter neersticheyt ghecorrigeert (Liesveltbijbel 1542)

Dat .xlv. Capittel.

1

⁺WAnneer ghy nv dit lant met dat lot wtdeelt, so sult ghy een deel vanden lande af scheyden, dat den HERE heylich zijn sal, te weten, vijuentwintich duysent roeden lanc, ende thien duysent breet,

+ A vers 1

2

Dese selue plaetse sal heylich zijn, so wijt als si reyct. Van dit deel sullen tot dat heylichdom comen vijfhondert ellen int viercant, Ende vijftich ellen wijt rontsom tot die voorsteden.

3

Ende op dye selue plaetse, die viuentwintich dusent roeden lanck is, ende thien duysent breet, daer sal dat Heylichdom staen, ende dat alderheylichste,

4

Ende dat ouerschot vanden gheheylichden lande, dat sal den Priesteren toebehooren, die in dat Heylichdom dienen, Ende voor den HEERE treden om hem te dienen, op dat si ruymte hebben, tot huysen te maken, Ende die selue sal ooc heylich.

5

Maer dye Leuiten dye voor dat huys oft Tempel dienen, dye sullen ooc vijuentwintich duysent roeden lanc, ende thien duysent breet hebben, tot haren deel, tot twintich cameren.

6

Ende der stadt sult ghy oock een plaetse laten, voor dat ganssche huys Israels, vijfduysent roeden breet, ende vijuentwintich duysent lanc, neffens dye afgedeelde plaetse des Heylichdoms.

7

Ende den Vorsten sult ghy ooc een plaetse gheuen, op beyde siden tusschen die plaetse der Priesteren, ende tusscen dye plaetse der stadt, tegen Twesten, ende teghen Doosten, Ende si sullen alle beyde teghen dat Westen ende teghen dat Oosten, ghelijc lanc zijn,

8

Dat sal zijn eyghen deel zijn in Israel, op dat mijne Vorsten nyedt meer mijnen volcke dat haer en nemen, Mer si sullen dat lant dat ouer haer schiet, den huyse Israels laten voor haer stammen.

9

Want also spreect die HERE God, O ghi Vorsten Israels ghi makes te veel, ⁺ Laet af van onrecht ende gewelt, ende doet dat recht ende goet is, Ende en schent mijn volc also niet meer, spreect die HERE God.

+ B vers 9

10

Ghi sult hebben een gerechte wage, een recht scepele, ende een rechte mate, Epha, ende Bath die sullen gelijc zijn, also dat een Bath dat thiende deel van een Homer houde,

11

Ende dat Epha ooc dat thiende deel van een Homer, Want na den Homer salmen die beyde meten.

12

Ende een Sikel sal twintich Gera hebben, Ende een Mina maeckt twintich Sijclen, vijuentwintich Sijclen, ende vijfthien Sijclen.

13

Dat sal nv dat Hefoffeer zijn, dat ghy gheuen sult te weten, dat seste deel van een Epha, van een Homer tarwen, Ende dat seste deel van een Epha, van een Homer ghersten.

14

Ende van olye sult ghy gheuen een Bath, te weten, een thiende deel des Baths van een Cor. Ende thien Bath maken een Homer, Want een Homer maect thien Bath.

15

⁺Ende een lam van twee hondert schapen, wt der cudde op die weyde Israhels, tot een spijsoffer ende brantoffer, salichoffer, tot eender versoeninge, spreect die HERE God.

+ C vers 15

16

Alle dat volc inden lande sal sulcken Hefoffer tot den Vorste in Israel brengen.

17

Ende dye Vorste sal zijn brantoffer, spijsoffer, ende dranckoffer offeren, op die Feeste Nyeumaenden ende Sabbathen, Ende op alle hooghe Feesten des huys Israels. Daer en bouen sondoffer, spijsoffer, brandtoffee, ende salichoffer doen, tot een versoeninghe des huys Israhels.

18

Also seyt die HERE God, Opten eersten dach der eerster maent, sult ghy nemen eenen ionghen varre, die sonder ghebrec is, ende sult dat Heylichdom ontsondighen,

19

Ende die Prister sal van dat bloet des sondoffers nemen, ende dye posten des Tempels daer mede bespringhen, Ende dye vier hoecken aen dat outaer, met dye stijlen aender poorten des binnensten voorhoofs,

20

Also sult ghy ooc doen, opten seuenden dach der maent, oft hem yemandt onwetende besondicht hadde, op dat ghi also dat Huys ontsondicht.

21

Opten veerthienden dach der eerster maent, sult ghi dat Passah houden, Ende seuen daghen vieren, ende ongedeessemt broot eten, ⁺

+ exo. xij. Le. xxiij deu. xvi

22

Ende opten seluen dach sal dye Vorst voor hem selfs, ende voor al tvoc inden lande eenen varre tot een sondoffer offeren,

23

Maer in dien seuen daghen des Feests sal hi den HEERE dagelhcx een brantoffer doen, Ia seuen varren, ende seuen rammen, dye sonder ghebreck zijn. Ende oock eenen gheyten bock tot een sondoffer,

24

Maer tot een spijsoffer sal hy een Epha tot eenen varre, ende een Epha tot eenen ramme offeren, Ende een Hin olye tot een Epha.

25

Opten vijfthienden dach der seuender maent, sal hi seuen daghen achter een vieren, ghelijc als dye andere seuen daghen, ende alsoo houden met sondoffer, brantoffer, spijsoffer met den olye.