Den Bybel met groter neersticheyt ghecorrigeert (Liesveltbijbel 1542)

Dat .xlvi. Capittel.

1

⁺ALso spreect die HERE God, Die poorte aenden binnensten voorhoof Oostwaerts, dye sal ses werckdagen toe ghesloten zijn,

+ A vers 1

2

Mer opten Sabbaths dach, ende in dye nyeumaenden salmense op doen. Ende die Prince sal van buyten onder dat poortael vander poorten comen, ende buyten bi dye posten vander poorten blijuen staen. Ende die Priesters sullen zijn brantoffer ende salichoffer offeren, Ende hi sal die dorpels der poorten aenbidden, Ende daer nae dan weder wt ghaen, Maer dye poorte sal open blijuen totten auont toe.

3

Desghelijcx sal dat lantvolck inder doren der seluer poorten aenbidden, voor den HEERE, op die Sabbathen ende Nyeumaenden.

4

Ende dat brandtoffer dat dye Prince voor den HEERE offeren sal opten Sabbaths dach, sal zijn ses lammeren die sonder ghebreck zijn, Ende eenen ramme sonder ghebreck,

5

Ende oock een Epha tarwen bloemen, tot eenen ramme, tot een spijsoffer. Met tot dye lammeren, soo veel tarwen bloemen. tot dat spijsoffer als hi wil, Ende ooc een Hin olye, tot eenen Epha.

6

Op dye Nyeumaenden sal hi eenen iongen varre offeren, dye sonder ghebrech is, ende ses lammeren, ende eenen ramme, oock sonder ghebrec,

7

Ende ooc een Epha tarwen bloemen totten varre, Ende een Epha totten ramme, tot dat spijsoffer. Maer totten lammeren, so veel Epha als hi vermach, ⁺ Ende ooc een Hin olye, tot een Epha.

+ B vers 7

8

Ende als die Prince in gaet, soo sal hi door die halle vander poorten in gaen, ende aldaer weder wt gaen,

9

Maer dat lantuolck dat voor den HERE comt, op die hooghe Feesten, ende ter poorten tegen Tnoorden in gaet, om aen te bidden, dat sal door dye Suydpoorte weder wt gaen. Ende die ghene die ter Suydpoorten ingaen, dye sullen ter Noordpoorten weder wtgaeu, Ende si en sullen niet weder ter poorten wt gaen, daer si door inghegaen zijn, Maer stracx voorwaerts wt gaen.

10

Ende die Prince sal met haer beyde in ende wtgaen.

[p. *]

11

Maer op die vierdagen ende hooge feesten salmen tot dat spijsoffer oock tot eenen varre een Epha tarwen bloemen, Ende ooc tot eenen ramme, een Epha offeren, ⁺ ende tot den lammeren, so veel als hi vermach, Ende ooc een Hin olie tot een Epha.

+ C vers 11

12

Mer als dye Prince oft Vorst een vrywillich brantoffer oft salichoffer den HERE doen wil, So salmen hem die Oostpoorte op doen, dat hi zijn brandtoffer ende salichoffer offere, gelijc als hijt opten Sabbath plach te offeren. Ende als hi weder wtghaet, soo salmen dye poorte achter hem toesluyten.

13

Ende hi sal den HERE dagelicx een brantoffer doen te weten, een iarich lam, sonder gebreck, dat selue sal hy alle morgen offeren,

14

Ende sal alle morgen dat seste deel van een Epha tarwen bloemen tot een spijsoffer daer op doen, Ende een derdendeel van een Hin olie, onder malcanderen gemengt, Dat sal den HERE een dagelicx spijsoffer zijn,

15

Ende also sullen si dat lam, met dat spijsoffer, ende olye alle morgen offeren, tot een eewich brantoffer.

16

Also spreect die HEERE God, Als dye Prince eenen van sinen sonen een geschenck geuen wil, van zijn erfgoet, Dat selue sal sinen sonen blijuen, ende sullent erflick besitten,

17

Maer in dien hi van sinen knechten yemanden yet van zijn erfgoet schenct Dat selue sullen si besitten totten Vrij Iare toe. Ende dan sal dat selue den prince weder aen comen, Want zijn erfgoet sullen alleen zijn sonen beeruen,

18

Die Prince en sal ooc den volcke nyet nemen van haer erfdeel, Noch ooc haer wt haren eygen goeden stooten, Maer hi sal sinen sonen van zijn eygen besittinge wt deelen, Op dat elc geslachte onderscheydelic onderhouden worde, Ende dat sine behouden mach.

19

Ende hi voerde mi onder eenen inganc, aen dye side der poorten teghen Tnoorden, tot die cameren des Heylichdoms, dye den Priesters toebehoorden. Ende siet, daer was een ruym plaetse in eenen hoeck Westwaerts

20

Ende hy seyde tot mi. Dit is dye plaetse daer die Priesters koken sullen, dat schuldoffer, sondoffer, ende dat spijsoffer backen, Also dat si dat nyet en behoeuen wt inden buytensten voorhof te draghen, Op dat hem dat volc aen dat heylige niet en besondige.

21

Daer na voerde hi my wt inden buytensten voorhof in die vier hoecken des voorhof rontsomme.

22

Ende siet daer was een ruym plaetse in elcke vanden vier hoecken des voorhofs, veertich ellen lanck, ende dertich ellen breet, gedeelt in hoofkens, Ia deen so wijt als dander,

23

Ende daer ginc een muerken om die alle vierre. Daer waren heerdsteden rontomme onder aen die mueren ghemaect

24

Ende hi sprac tot mi. Dit is die kuecken waer in dat die dienaers des Tempels koken sullen, al tghene dattet volc offert.