Den Bybel met groter neersticheyt ghecorrigeert (Liesveltbijbel 1542)

¶ Hi noemt haer boosheyden ende lasteringhe, ende straftse daeromme ooc, te weten, afual van God, ontrouwe, valsheyt verualschinghe des rechts, ende vermetelijc ghewelt.

Dat .ij. Capittel.

1

⁺WEe den ghenen dye op schade te doen dencken, Ende becommeren haer met boose listicheden op hare bedden, ⁺ op dat zijt vroech alst dach wort volbrenghen moghen, Want si zijn die Heeren,

+ A vers 1

+ Amo. v.

2

Si trecken tot haerwaerts dye ackers, Ende nemen dye huysen daer si lust toe hebben, Ende also bedrijuen si ghewelt met eens yeghelicx huys, ende met eens yeghelicx erfgoet,

3

Daeromme spreect die HERE also. Siet, Ick hebbe teghen dit gheslacht quaet voor genomen, wt den welcken ghi uwen hals niet en sult moghen ontrecken. Ende ghi en sult oock niet meer so opgheblasen daer heyr treden, Want het een boose ende sorchlic tijt is.

4

Op die selue tijt salmen een spreecwoort ende clageliedt van v ghebruycken, te weten, Het is al gedaen salmen segghen, wy zijn verdestrueert, Dat lant mijns volckx crijcht eenen vreemden Heere,

5

Wanneer sal hy ons dye ackers weder toe deelen? dye hy ons ghenomen heeft? Ia wel, Hi en sal oock geen deel behouden in die ghemeente des HEREN.

6

Sy segghen, Men en soude nyet prediken, Want alsulcke prekinghe en gaet ons nyedt aen.

7

Wy en sullen nyedt tot schande comen, Dat huys Iacobs troost hem also. Meenstu dat dye gheest des HEREN so gheheeliken wech si? Soude hi sulcx doen?

8

Het is waer mijne woorden zijn vriendeliken den gerechten, ⁺ maer mijn volck maket also, dat ick haer viandt moet zijn, Wandt si roouen beyde rock ende mantel, den ghenen die sonder achterdencken ghaen, ghelijc als inden oorloghe,

+ B vers 8

9

Ghi verdrijft die eerbaer wijuen mijns volcx wt hare lieflike huysen, Ende ghi neemt sonder ophouden mijn cieraet ende gauen van haren iongen kinderen

10

Daeromme maeckt v op, ghy moet wech. Ghy en muecht hier nyedt blijuen, om uwer afgoderie wille moeten si rouwelijcken verstoort worden.

11

Waer ic een lichtuaerdich clappaert, ende een logen predikaer, ende predicte dat si suypen ende brassen souden so waer ic een goet propheet voor dit volck.

12

O Iacob ick wil v gansch versamen, ende dye ouer ghebleuen in Israel tsamen brenghen, Ia ic wilse ghelijck een cudde tsamen in eenen stal doen, ende gelijc als die schapen in eender koye, Ia dattet ooc van menschen daueren ende beuen sal,

13

Die stercke ruese sal voor haer daer door breken, Si sullen die poorten opbreken, ende daer door wt ende in trecken, Ende haer coninck sal voor haer henen gaen, Ende die HERE voor aen.