Den Bybel met groter neersticheyt ghecorrigeert (Liesveltbijbel 1542)

¶ Hi straft die ouerheeren ende die predicanten, om der welcker wille dat volck in lijden ende verdriet comt.

Dat .iij. Capittel.

1

⁺ENde ick sprack, ⁺ Hoort doch O ghi hoofden inden huyse Iacobs, ende ghi Princen inden huyse Israhels, Ghy soudet billicx zijn die ghene dye dat recht wisten

+ A vers 1

+ Ie. v. Amo. v.

2

Maer ghi haedt dat recht ende goet ende hebt lief dat quaet, Ghy stroopt ende vilt haer dye huyt af, ende dat vleessche van haren beenen, ende ghi verslint dat vleesch mijns volcx,

3

Ende als ghi haer dye huyt afghetoghen hebt, so breeckt ghy haer dye beenen oock, ende stucket, ghelijc als in eenen siepot, ende ghelijck dat vleesch in eenen ketel.

4

Daeromme als ghi nv totten HERE roepen sult, so en sal hy v nyet verhooren, Mer hi sal zijn ^a aensicht voor v verberghen ter seluer tijt, ghelijck ghy met uwe boose voornemen verdient hebt.

a Aensicht verberghen, dat is hi en sal v niet verhooren, noch eenige liefde of hulpe bewijsen. Iob. xiij

5

Also spreeckt die HERE teghen die Propheten, die mijn volck verleyden, Si prediken, tsal vrede zijn ende welgaen, alsmen haer te eten gheeft, ⁺ Mer in dyen men haer niedt inden muyle en worpt, so prediken si, daer moet een oorloge opstaen,

+ B vers 5

6

Daeromme sal uwe openbaringhe tot eender nacht, ende uwe predikinghe tot eender duysternisse worden. Die sonne sal ouer den propheten onderghaen, ende den dach ouer haer verdonckert worden.

7

Dan sullen haer dye Sienders oft Schouwers schamen, ende dye waersegghers bespot worden, Ende si sullen alle haren muyl moeten stoppen wandt si Gods woordt nyedt hebben en sullen

8

maer ick ben vol crachten ende gheests des HEREN, vol rechts ende stercheyts, also dat ic Iacob zijn ouertreden, ende Israel sine sonden vercondighen derf.

9

Ach daeromme hoort doch dit, O ghi hoofden des huys Iacobs, ende ghi princen des huys Israels, ghy die dat recht versmaet, ende al dat oprecht ende slecht is,

[p. *]

coemt ende verkeert.

10

Dye Zion met ^b bloet timmert, ende Hierusalem met onrecht.

b Hierdoor wort te verstaen gegeuen dye versmadinghe ende verdruckinge des woorts gods ende der euangelien, als dat volc met gewelt ende tyrannie oueruallen wort, ende met valsche Predicanten, ghelijct blijct Luce. iiij. der coninghen .xvi vanden coninck Achas eze. xxij f.

11

Vwe hoofden wtspreken dye vonnissen om gheschencken. Vwe priesters leeren om loon, Ende uwe propheten waersegghen alleen om ghelt. Si verlaten haer op den HEERE, ende doruen segghen. En is die HEERE niet onder ons? daer en can gheen ongheluck ouer ons ghecomen.

12

Daeromme sal Zion om uwent wille ghelijck een velt geplaecht, ende Hierusalem tot eenen steenhoope worden. Ende den berch des tempels tot eender wilder hoochte worden.