Den Bybel met groter neersticheyt ghecorrigeert (Liesveltbijbel 1542)

Hi vermaentse tot gherechticheyt ende beteringe, op dat si den thoorne Gods ontulieden moghen. Hi vercondicht ooc den heydenen haer straffinghe.

Dat .ij. Capittel

1

⁺VErsaemt v ende comt nv herwaerts, O ghi onsalich volck, eer dat oordeel wt ga,

+ A vers 1

2

ende gelijc dat stof ende die tijt verlope eer den grammigen thoorne des HEEREN ouer v come. Iae eer den dach des toorns des HEREN ouer v come,

3

Soect den HERE, O alle ghi allendige opter aerden, ghi die sine rechte onderhout, Soect die gerechticheyt, Soect ootmoedicheyt, op dat ghi inden dage des toorns des HEREN moget bescut worden.

4

Want Gasa moet verlaten, ende Askalon woest worden Asdod sal opten middaghe verdreuen worden, ende Haccaron sal wtgheroeyt worden,

5

Wee den ghenen, die aen die meyrstroomen woonen, een stout manslachtich volc, des HEREN woort sal ouer v comen. O Canaan der Philisteen landt, ick wil v verderuen, also datter nyemant meer in woonen en sal

6

Bider zee en sullen niet dan enckel weyden, herders huysen, ende schaeps coeyen sijn.

7

Ia die selue waterstroomen sal den ouerghebleuenen des huys Iuda te deele worden, dat si daer op weyden. Inden huysen Ascalon sullen si tegen den auont rusten. Want die HERE haer God salse wederom besoecken, ende haer geuangenisse keeren.

8

Ic heb die smaetheyt Moabs, ende die lasteringe der kinderen Ammon wel gehoort, ⁺ hoe si mijne volc versmaet, ende haer van hare lantpalen beroemt hebben,

+ B vers 8

9

Wel aen, So waerlic als ic leue spreect dye HERE der heyrscaren, God Israels, So waerlijc moet Moab ghelijck Sodoma, ende die kinderen Ammon, ghelijc als Gomorra worden. Iae tot eender woester doornhage, ende soudtcuyle, ende een eewighe woestheyt worden.

10

Die ouergebleuen mijns volcx sullen haer berouen Ende die ouergebleuen des volcx sullense beeruen. Dat sal haer ontmoeten voor haer houaerdie, om dat si des HEREN der heyrscaren volc versmaet, ende haer beroemt hebben,

11

Die HERE sal veruaerlic teghen haer sijn, Want hi sal alle afgoden opter aerden wtroeyen Ende een yegelijc op sijnder plaetse. Ia ooc alle eylanden der heydenen sullen hem aenbeden ende eeren.

12

Ende ghi Moren moet ooc met minen sweerde verslagen worden,

13

Ende hi sal sine hant strecken ouer dat noorden, Ende ic wil Assur vernielen, Niniue sal ooc woest worden, dorre ghelijc een wildernisse.

14

Alsoo datter niet in die cudden, ende alder heydenen beesten liggen sullen Ia die Brantvogels, Roosdommen. Ooc sullen de swanen ende egels op hare torens woonen. Ende voghelsanc sal aenden vensteren, ende die rauens op de balcken sijn Want dat Ceder beschot sal afgheschoort worden.

15

Dit is die vrolijcke stadt die so sekerlic ende sonder sorghe woont, ende sprac in haerder herten. Ic bent, ende geen meer. Hoe is si so verwoest geworden, dat die dieren daer in woonen, Ende soo wie daer voorby gaet, dye bespotse, ende wijst metten vingher daer op