Den Bybel met groter neersticheyt ghecorrigeert (Liesveltbijbel 1542)

¶ Vander afscheydinghe der vreemder vrouwen, Esdras leset op een houten scauot die wet des HEEREN daer nae shuys gegaen zijnde, eten si dat vette.

Dat .ix. Capittel

1

⁺ENde Esdras stont op, ende hi is voor den voorhof des tempels wech gegaen in die slaepcamer Ionate, des soons Nasabi,

+ A vers 1

2

ende daer ter herberghen sijnde en proefde hy broot noch dranck ooc niet, ouer die ongerechticheyt der menichten,

3

Ende die vercondinge is in allen den Ioodtscen landen ende te Ierusalem gesciet, allen den genen die wt der geuanckenissen te Ierusalem vergadert waren

4

op dat al die gene, die niet ontmoeteden inden tween oft drie daghen, na dat oordeel der besittender ouderen, haer goeden souden wech genomen werden, ende hi soude vreemt geoordeelt werden, vander menichten der gheuanckenissen.

5

Ende si sijn alle vergadert die wt den geslachte Iuda, ende Ben Iamin zijn, binnen drien dagen in Ierusalem. Dese maent is die neghenste, den dach der maent den twintichsten,

6

Ende alle dye menichte sadt inden vloer des tempels, beuende, want den winter begost.

7

Ende Esdras stont op, ende hi seyde tot hen. Ghy hebbet onrechtelijcken ghedaen, dat ghi v vreemde gheboren huysurouwen te huwelijcke hebt ghenomen op dat ghi totten sonden van Israel toe soudet doen.

8

Ende nv geeft belidinge ende grootmakinge den HERE onser vaderen God

9

ende volbringet sinen wille, ende gaet wech vanden Heydenen der aerden, ende vanden vreemden geboren huysurou-wen. Ende alle die menichte riep, ende seyde met luyder stemmen.

10

Wi sullen doen ghelijck ghi gheseyt hebt,

11

Maer want die menichte groot is, ende het winter is, en mogen wi buyten daecx niet staen, ende dit werck en is ons geen werck, van eenen oft twee dagen Want wi hebben in desen veel ghesondicht,

12

so laet die ouerste der menichten staen, ende al die met ons inwoonen, ende alle die vreemde gheboren huysurouwen bi haer hebben, ende laet daer in gesetter tijt wt alle plaetsen priesters ende rechters staen,

13

tot dat si die gramscap des HEREN in deser saken ontbinden.

14

⁺Ionathas die sone Ezeli ende Ozias, ende Thecam si ontfinghen dese dinghen, ende Bozoramus, ende Leuis, ende Sabatheus, hebben te gadere met dien ghewracht.

+ B vers 14

15

Ende alle die wt der geuanckenissen waren, stonden na alle dese dinghen.

16

Ende Esdras die priestere vercoos hem mannen grote princen van haren vaderen, na die namen, ende si saten te samen in die nyeuwe mane der thiender maent, om dese sake te ondersoeckene.

17

Ende daer is gesloten vanden mannen die vreemde gheboren huysurouwen hadden, totten nyeuwen maenden der eerster maent.

18

Ende daer zijnder geuonden wt den priesters vermingt, die vreemde geboren huysurouwen hadden.

19

Wt den kinderen Iesu des soons Iosedech ende sinen broeders, Maseas, ende Eleasar,

20

Ioribus, ende Ioadeus, ende si sloegen die handen aen, dat si haer huysurouwen souden wtdrijuen, ende om te offeren ter verbiddinge eenen ramme voor hare onwetentheit

21

Ende wt den kinderen Semmeri, Masseas, ende Esses, ende Ieelech, Azarias.

22

Ende wt den kinderen Fosore Limosas, Hismaenis, ende Nathanaee, Iussio, Ieddus ende Talsas,

23

ende wt den Leuiten, Ioadus ende Temieas ende Conis, ende Caitas, ende Facteas ende Colutas ende Elionas.

24

Ende wt den heyligen sangers Eliarib, Zaccarus

25

ende wt den duerwachters Salumus ende Tolbanes,

26

⁺ende wt Israel, wt den kinderen Forozi, ende Remias ende Geddias, ende Melechias, ende Michelus, ende Eleazarus, ende Iemmebias, ende Bannas,

+ C vers 26

27

ende wt den kinderen Iolaman, Chamas, ende Zacharias, ende Iezeelus, ende Ioddius, ende Erimoth, ende Elias,

28

ende wt den kinderen Zatholin, Eliadas, ende Lisumus, Zoehias, ende Larimeth, ende Sabdis, ende Tebedias,

29

Ende wt den kinderen Zebes, Iohannes ende Amanias ende Zabdias, ende Emeus.

30

Ende wt den kinderen Banni, Olamus ende Malachus, ende Ieddeus, ende Iasub ende Azabus, ende Ierimoth,

31

ende wt den kinderen Addin, Naathus ende Moosias, ende Caleus, ende Raanas, ende Maaseas, Mathathias, ende Beseel, ende Bomus Manasses,

32

ende wt den kinderen Nau. Noneas ende Aseas, Melechias, ende Sameas ende Simon Bengamin, ende Machus, ende Marras,

33

Ende wt den kinderen Asom, Cariaueus, Mathias, ende Bannus ende Eliphalath, ende Manasses ende Semei.

34

Ende wt den kinderen Bani Ieremias, Muadias, ende Abramus, Iohel ende Baneas ende Pelias, ende Iana ende Marimoth, ende Eliasib, ende Pathaneus ende Eleasis ende Orizas ende Dielus ende Semedius ende Zambris, ende Iosephus,

35

Ende wt den kinderen Nobeit, Idelus ende Mathetias, ende Sabdus, ende Zecheda, Sedini ende Iessei Baneas.

36

Alle dese hadden hen vreemde geboren huysurouwen toegeuoecht, ende si lietense gaen met den kinderen

[p. *]

37

Ende die priesters ende leuiten, ende die wt Israel waren, woonden in Iherusalem, in dat heel lantschap, in die nieuwe mane der .vij. maent. Ende die kinderen Israels waren in haer wooninghen

38

Ende alle die menichte is tsamen vergadert op den vloere die vanden oosten der heyliger poorten is,

39

ende si seyden Esdre den bisschop, ende den leser, dat hi die wet Mosi soude halen die gegeuen is vanden HEERE Israels Godt,

40

Ende Esdras die hooge priester, haelde dye wet alle haerder menichten, vanden man totten wiue toe, ⁺ ende alle die priesters om die wet te hooren alst nieuwe mane der .vij. maent was.

+ D vers 40

41

Ende hi lasse op den vloer, die voor die heilige poorte des tempels is, vanden eersten licht totten auont toe, voor die vrouwen ende mannen. Ende si gauen haren sin alle totter wet.

42

Ende Esdras die priester ende dye leser der wet stont op eenen houten preecstoel, welc daer toe getimmert was.

43

Ende Mathatias, ende Sammus, Ananias, Azarias, Vrias, Ezechias, ende Balsamas, stonden bi hem ter rechter hant,

44

ende tot zijnder slincker hant Faldeus Misael, Malachias, Abustas, Sabus, Nabadias, ende Zacharias.

45

Ende Esdras nam dat boec, voor alle die menichte, want hi sadt vore in glorien int aenscouwen alre menichten.

46

Ende als hi die wet had wtgelesen, so stonden si alle opgerecht. Ende Esdras ghebenedide den HERE den alder hoochsten God, den almachtigen God der heyrscaren.

47

Ende alle dat volc antwoorde Amen.

48

Ende si hieuen die handen opwaerts, ende nederuallende opter aerden, aenbaden den HERE, Iesus ende Baneus, ende Strabias, ende Ieddimus ende Accubus, ende Sabbatheus, ende Calithes, ende Azarias ende Ioardus ende Ananias ende Philias,

49

ende die Leuiten die de wet des HEREN leerden, si lasen des HEREN wet in die menichte ende si setten elck voor die ghene die de lesse verstonden.

50

Ende Atharathes seyde Esdre den oppersten priester ende leser ende den leuiten die de menichte leerden segghende.

51

Desen dach is den HERE heylich, ende si weenden alle als si die wet gehoort hadden.

52

Ende Esdras seyde. Aldus gaet henen ende etet alderhande alder vetste dinghen, ende drinct dat alder soetste, ende seyndt hen gauen diese niet en hebben

53

want desen dach is den heyligen dach des HEREN, ende en wilt niet truerich zijn. ⁺

+ Deu. xv nec.viij.

54

Ende si gingen al wech, eten ende drincken ende weerscappen, ende gauen den genen dies niet en hadden te weerscappen,

55

want si sijn grotelijc verhuecht met den woorden, waer mede si gheleert waren. Ende si sijn alle vergadert in Ierusalem, om blijschap te houden na dat verbont des HEREN Gods Israels

¶ Hier eyndet dat derde boeck Esdre