Den Bybel met groter neersticheyt ghecorrigeert (Liesveltbijbel 1542)

¶ In desen capittele gheschiet een claghe der sinagoge ouer hare kinderen, ende veel meer ander dincs dat die verkiesinghe ende roepinge der heydenen betuyghet.

Dat .ij. Capittel

1

⁺DIt seydt die HEERE, ic hebbe dit volc wtgheleyt vander slauernie, den welcken ic geboden heb gegeuen, ⁺ door mijn knapen die propheten dye si niet en hebben willen hooren maer si hebben mine raden ^a ydel ghemaect

+ A vers 1

+ Iudi. vi

a ydel gemaeckt dat is verahct

2

Dye moeder diese ghebaert heeft seyt hen. Gaet henen kinderen, want ic ben weduwe ende verlatene,

3

ic heb v met blijscappen opgheuoedt, ende ic heb v verloren met weeninge ende droefheyt, want ghi hebt gesondicht voor den HERE, uwen God, ende dat quaet is voor hem, dat hebt ghi gedaen,

4

mer wat sal ic v nv doen? Ic ben weduwe ende verlatene. Gaet kinderen ende bidt vanden HERE ontfermherticheyt

5

Maer vader ic aenroepe v tot ghetuyghe ouer die moeder der kinderen, die mijn verbont niet en wilden houden,

6

dat ghi hen bescaemtheit gheeft, ende hare moeder tot een beroouinge, op dat haer kinderbaringhe niet en geschiede.

7

⁺Haer namen moeten onder die heydenen verstroyt werden, ⁺ si moeten wtghedaen werden vander aerden, want si hebben mijn verbont versmaet.

+ B vers 7

+ Ge. xix

8

Wee v Assur, die de ongherechtige bi v verberghet. Ghi quade volc, ghedenckt wat ic Zodoma ende Gomorre heb gedaen,

9

der welcker landt in peck cleyaerde, ende in aschdijcken leghet. Alsoo sal ickse gheuen die mi niet gehoort en hebben, seyde die almachtighe HERE.

10

Dit seyt dye HEERE tot Esdram. Bootscapt mijnen volcke, dat ic hem dat rijcke Ierusalem sal geuen, dwelc ic Israel soude hebben ghegeuen

11

ende ic sal in haer glorie nemen, ende ic sal hem eewige tabernaculen geuen, die welcke ick dyen bereyt hadde.

12

Dat hout des leuens sal hem in eenen ruec der saluen zijn, ende si en sullen niedt arbeyden noch vermoeyt werden.

13

Gaet ende ghi sullet ontfaen. Bidt v weynige dagen, dat si inwoonen.

14

Nv is dat rijck bereydt waect, neemt hemel ende aerde te getuyge, want ic heb dat quaet vernielt, ende ic hebt goet gheschapen want ic leue, seyt die HERE.

15

Moeder omhelst v kinderen, voetse op met bliscappen, vesticht haer voeten ghelijck een pilaer, want ick heb v vercoren seyt die HERE.

16

⁺Ende ick sal die dooden van haren plaetsen verwecken, ende ic salse vanden graue wtgeleiden, want ic heb mijnen naem bekent in Israel.

+ C vers 16

17

Ghi moeder der kinderen, en wilt niet vreesen, want ic heb v vercoren seit die HERE.

18

Ic sal v te hulpen seynden mijn kinderen Esaiam Ieremiam, tot welcken raet heb ick gheheilicht, ende v bereit twelf boomen, met menigerley vruchten,

19

ende ooc also vele fonteynen vloeyende melck ende honich, ende .vij. ongemeten bergen hebbende roosen ende lelien, in welcken ic met blischappen mijn kinderen sal veruullen.

20

Rechtuaerdicht die weduwe, oordeelt den weesken, geeft den behoeueden,

21

bescermt die gheenen vader en heeft, cleet den naecten, den gebrokenen ende crancken geneset, den cruepelen en wilt niet belachen beschermt den lammen ende den blinden laet toe, totten ghesichte mijnder claerheyt

22

Behout den ouden ende ionghen binnen v mueren.

23

Als ghi dooden vindt so teekentse ende begraeftse, ende ick sal v die eerste sittinghe in mijn rijc gheuen.

24

Mijn volck hout stille ende rustet, want v ruste sal comen.

25

Ghi goede voester, voedt v kinderen, vesticht haer voeten.

26

Die knechten die ic v gegeuen hebbe, niemant wt dien en sal vergaen, want ic salse van uwen getale versoecken.

27

⁺En wilt niet mat werden, want als den dach des gedrangs ende der benautheit sal comen, so sullen die ander huylen ende droeue zijn, maer ghi sult vrolic ende oueruloedich sijn.

+ D vers 27

28

Die heydenen sullen beniden, ende en sullen tegen v niet mogen seydt die HERE.

29

Mijn handen sullen v bedecken, op dat v kinderen dat eewich vier niet sien en sullen.

30

Moeder zijt ghenoechlijc met uwen kinderen, want ic sal v verlossen seydt die HERE.

31

Ghedenct uwer dooder kinderen, want ic salse wtleyden vander siden der aerden, ende ic sal ontfermherticheyt met hen doen, want ic ben ontfermhertich, seyt die almachtige HERE,

32

omhelst v kinderen tot dat ic come ende bewijse hen ontfermherticheyt, want mine fonteinen vloeyen ouer, ende mijn genaede en sal niet ontbreken

33

Ic Esdras ontfinc een ghebot vanden HERE, op den berch Ozeb, dat ic tot Israhel soude ghaen Als ick tot dyen quam, soo weder legheden si my ende versmaden des HEEREN ghebodt.

34

Hierom segghe ick v, ghi heydenen, die hoort ende verstaet verwachtet uwen herdere, hy sal v dye ruste der eewicheydt gheuen, wandt dye is nae by, dye int eynde der werelt sal toecomen.

35

Weest bereydt totten loone des rijcx, want dat eewighe licht sal v lichten, door die eewicheyt des tijts,

36

vliet die scaduwe deser werelt, ontfangt die genoechlicheyt uwer glorien. Ic getuyge mijnen salichmaker openbaerlick

37

Ontfangt die gepresen gaue ende wert verurolijct, hem danckende dye v totten hemelschen rijcken geroepen

[p. *]

heeft.

38

Staet op ende staet stijf, ende siet dat ghetal der getekender in die weerscap des HEREN.

39

Die hen seluen vanden schaduwen der werelt wech hebben ghemaect, die hebben blinckende rocken vanden HERE ontfanghen

40

Zion ontfangt v ghetal ende besluyt v verclaerde die des HEREN wet veruult hebben

41

Dat ghetal uwer kinderen welc ghi begeerde is vol Bidt dat ghebot des HEREN, op dat v volc geheylicht werde, welcke van beginne geroepen is.

42

Ick Esdras sach opten berch Zion een grote schare die ick niet ghetellen en conste, ende si loofden den HERE altesamen met liedekens.

43

Ende int middele van haer was een ionge, hooch van langde, wtschinende bouen alle dien, ende hi sette op elcken hoofde van dien, croonen, ende wert meer verhoocht.

44

Mer ic wert met miracule gehouden. Doen vraechde ick den engel ende seyde. Here wye sijn dese?

45

Welck antwoorde ende seyde my. Dit zijnse die den sterfelijcken rock af hebben geleyt, ⁺ ende hebben den onsterfeliken genomen, ende hebben den name Godts beleden. Nv werden si ghecroont, ende ontfangen die belouinghe,

+ lu xxiiij i.cor xv rom. viij.

46

Ende ic seyde den engel. Wie is die ionge, die hen die croonen opset ende plam rieten in die hant geeft.

47

Ende antwoordende seyde hi my Hi is die sone Goods, den welcken si in die werelt beleden hebben mer ic begontse groot te maken, die sterffelijc voor den name ons HEREN ghestaen hebben.

48

Doen seyde mi die engel. Gaet bootscapt minen volcke, hoedanige ende hoe groote wonderlicheden des HEREN ghi ghesien hebt.