Den Bybel met groter neersticheyt ghecorrigeert (Liesveltbijbel 1542)

¶ Die engel straft Esdram om dat hy hem onderwint doordeel gods te gronderen.

Dat .iiij. Capittel.

1

⁺ENde die engel die tot mi ghesonden is, wyens naem Vriel was antwoorde mi ende seide my.

+ A vers 1

2

Wtgaende is v herte wtgegaen in dese werelt, ⁺ ende ghy denct des alre hoochsten wech te begripen.

+ rom. ix. esa. xlv

3

Ende ic seide ia mijn HERE, Ende hi antwoorde, ic ben

[p. *]

gesonden, v te thoonen drie wegen, ende drie gelijckenissen voor v te setten,

4

van welcken, ist dat ghi my een van desen vercondicht, soo sal ick v den wech oock thoonen dien ghi begeert te sien, ende ic sal v leeren waer af dat boose herte si. Ende ic seyde, mijn HEERE spreect ende hi seyde tot my.

5

Gaet ende weget mi dat gewichte des viers, of meet die waeynge des wints, oft roept mi den dach weder, die voor bi is gegaen.

6

Ende ic antwoorde seggende. Wie der gheborender soude connen gedoen dat ghi mi van desen vraecht? Ende hi seyde tot my. Waer ic vragende ende seyde.

7

Hoe vele wooningen in dat herte der zee sijn oft hoe veel aderen int begin des afgronts zijn of hoe veel aderen ouer dat firmament sijn, of welcke die wtgangen des paradijs sijn.

8

Ghi sout misschien seggen. Ic en ben in dat afgront niet gedaelt, noch in die helle ooc niet, noch ic en ben niet inden hemel gestegen.

9

Mer nv en heb ic v nyet geuraecht dan vanden viere, ende wint, ende vanden daghe, daer ghi door zijt gegaen, ende van welcken ghi niet gesceyden en moget werden, ende ghi en hebt daer niet op geantwoort,

10

ende hi seyde my. Ghi en cont v dagen niet gekennen dye met v opgewassen sijn, ende hoe soude v vat des alre hoochsten wech mogen begripen?

11

ende nv van buyten nv die werelt bedoruen is, verstaen moghen dye openbare gebreckelicheit in mijnen aensichte?

12

Ende ic seyde hem. Het ware beter geweest dat wi niet en waren, ⁺ dan noch leuende in ongodlicheden te leuen ende te lijden, ende niet te verstaen van welcken dinghen.

+ B vers 12

13

Ende bi antwoorde tot mi segghende. Reysende ben ic gereyst totten wout, der houten des velts,

14

ende si dachten een gedachte ende seyden. Coemt ende laet ons gaen, ende laet ons aen die zee oorloch maken, op dat si voor ons wech gae, ende dat wi andere bosscen maken

15

Ende des gelijcx die vloeden der zee, ende si dachten ooc een gepeynse ende seyden. Coemt opstigende laet ons die bosscagien des velts beoorlogen, op dat wi ons seluen daer een ander lantscap maken.

16

Ende dat gepeyse des wouts is ydel geworden, want dat vier quam ende verteerde dat.

17

Desgelijckes ooc dat gepeys der zeevloeden, want dat sant stont ende verboot hen.

18

Waert dat ghi deser rechter waert, welcken sout ghi beginnen te rechtueerdighen, welcken verdoemen? Ende ic antwoorde ende seyde.

19

Warachtelijck si hebben een ydel gedachte gepeynst, want die aerde is den woude gegeuen, ende der zee een plaetse hare vloeden te draghen.

20

Ende hi antwoorde ende seyde. Ghy hebt wel geordeelt, ende waerom en hebt ghi v seluen niet geoordeelt?

21

Want ghelijc dye aerde den woude is gegeuen, ende die zee haren vloeden, Also mogen die gene die opter aerden woonen, alleen verstaen die dingen die opter aerden zijn, ende niet die bouen die hemelen zijn ende die dingen die bouen die hoocheyt der hemelen zijn

22

Ende ic antwoorde ende seyde. Ick bid v HERE dat mi sinne wert gegeuen om te verstaen,

23

want ic en wilde niet vragen van dinen oppersten saken, mer van desen die dagelijcx door ons gaen, waer om dat Israel den heydenen tot lachter is gegeuen tvolc dat ghi liefhadt, is den ongodlijcken geslachten ghegeuen, ende die wet onser vaderen is tot verderuinge ghebrocht, ⁺ ende die gescreuen gesteltenissen en zijn niewerts

+ C vers 23

24

ende wi zijn door gegaen vander werelt gelijc sprinchanen, ende onse leuen is verbasinge, ende scroeminge, ende wi en zijn ooc niet werdich ontfermher-ticheyt te vercrigen

25

Mer wat sal hi sinen name doen die ouer ons aengeroepen is. Ende van desen vraechde ic,

26

ende hi antwoorde tot mi, seggende. Ist dat ghi vele ondersoect so sult ghi dicwils verwonderen, want die werelt haest al haestende door te gane

27

ende si en begrijpt niet te dragen die dingen die in toecomenden tijden den rechtuaerdigen belooft sijn, want dese werelt is vol ongerechticheyts ende broosheden.

28

Maer daer ghi af vraecht sal ic seggen. Want dat quaet is ghesaeyt, ende zijn verderuinghe en is noch niet gecomen

29

Hier om ist dattet niedt omgekeert en wordt datter ghesaeyt is, ende die plaetse wech gae daert quaet ghesaeyt is, so en sal niet comen daer dat goede gesaeyt is?

30

Want dat grasch des quaden saets is in Adams herte gesaeyt van beginne,

31

ende hoe veel ongodlicx heuet gebaert tot nv toe ende baert tot dat den dorschtijt coemt.

32

Rekent bi v seluen hoe grote vruchte der ongodlicheit dat grasch des quaden saets gewonnen heeft,

33

wanneer die arenen gedroocht zijn, der welcker gheen ghetal en is, hoe groten dorsscinghe sullen si beghinnen te maken.

34

Ende ic antwoorde ende seyde. Hoe ende wanneer sullen dese dingen gescieden? Waer om zijn onse iaren weynich ende quaet? Ende hy antwoorde mi seggende. En haest ghi niet bouen den alderhoochsten? Ghi haest ydelijcken bouen hem te zijn, want v ouertredinghe is vele.

35

Hebben die sielen der rechtueerdiger ooc van desen geuraecht in haren bereydingen, segghende. Hoe lange hope ic aldus, ende wanneer sal die vrucht des dorschtijts ons loons comen?

36

Ende Hieremiel dye opperste engel antwoorde tot desen saecken seggende, Wanneer dat getal der saden in v volbracht is, ⁺ want hi heeft die werelt in een wage gewegen,

+ D vers 36

37

ende die tijden heeft hi met een mate gemeten, ende hi en heeft niet beroert noch opgewect, tot dat die voorseyde mate volbracht werde.

38

Ende ic antwoorde ende seyde O heerscapper HERE maer wi sijn ooc vol ongodlicheits?

39

Ende misscien om onsen wille, en werden der rechtueerdiger dorschuloeren niet veruult, om die sonden der inwoonders opter aerden.

40

Ende hi antwoorde mi ende seyde. Gaet ende vraecht die beuruchte oft haer moeder die draecht ooc noch mach houden in haer seluen, als si haer negen maenden heeft veruult. Ende ic seyde, HERE si en machse dan niet houden.

41

Ende hi seyde tot mi, dye schapprayen der sielen inder hellen zijn der moeder geleken,

42

wandt gelijc die baerdt, haest te ontulien den noot der baringen, also haest dese ooc weder te geuen, die gene die haer beuolen zijn,

43

Van beginne saldi van desen die ghi begeert te sien gewesen worden

44

Ende ic antwoorde ende seyde. Heb ic genade voor uwen oogen vonden, ende ist mogelic, ende ic bequaem ben so wijst mi ofter meer te comen hebben

45

dan voorleden is, oft dat meer door si gegaen bouen dan toecomende is,

46

Ic wete dat voorbi is ghegaen, mer ic en weet niet wat toecomende is.

47

Ende hi seyde tot my. Staet ouer dat rechte deel ende ic sal v wijsen die bediedenis der gelijckenissen,

48

ende ic stont ende ic sach, ende siet eenen bernenden ouen ginc dore voor mi. Ende het is geschiet, als die vlamme door ginc sach ic, ende siet den rooc ginc te bouen

49

Hier na ginc een wolck vol waters, door voor mi ende inseinde groten regen met eenen storme.

50

Ende doen den storm des regens door was gegaen, so ghinghen

[p. *]

dye druppelen. Ende hi seyde tot my. Gelijc den regen meer wascht dan die druppelen, dat vier dan den roocke also oueruloeyde die mate, die voorbi is gheghaen

51

Mer die druppelen ende den rooc ginghen te bouen.

52

Ende ic badt ende seyde. Meynet ghi dat ick tot in dyen dage leue? oft wat salder gescien in dien daghe? Hi antwoorde tot mi ende seyde. Vanden teekenen daer ghy my af vraecht, mach ic v eens deels seggen. Maer ick en ben nyet ghesonden v te segghen van uwen leuen want ic en weets niet.