Den Bybel met groter neersticheyt ghecorrigeert (Liesveltbijbel 1542)

Een sprake Esdre ende des Enghels met malcanderen.

Dat .v. Capittel

1

⁺MAer vanden teekenen mercket alsoe, Siet die dagen sullen comen in welcken ghegrepen sullen worden, die dye aerde bewoonen in vele chijns, ende den wech der waerheyt sal verborgen worden, ende dat lantschap sal onuruchtbaer zijn van ghelooue,

+ A vers 1

2

ende die onrechtuerdicheit sal vermenichfuldicht worden ouer dese die ghi selue siet, ⁺ ende ouer die ghi voortijts gehoort hebt,

+ Mat. xxiiij. Act. xx ij.Tes. i

3

ende dat lantschap dat ghi nv siet regneren, sulstu corts woest sien.

4

Maer ist dat v die alder hoochste geeft te leuen, so suldi nae dye derde trompet sien, ende die sonne sal onuersiens weder snachts lichten, ende die mane driemael inden dage,

5

ende vanden houte so sal bloet druypen, ende den steene sal sine stemme gheuen, ende die volcken sullen beroert werden

6

ende hi sal regneren in diensi niet en hopen die de aerde bewonen, ende die vogelen sullen tsamen verhuysinge doen,

7

ende die Zodomijtsce zee sal haer visscen wech werpen ende sal snachts een stemme geuen, die niet vele menscen bekent en hebben. Mer si sullen alle zijn stemme horen.

8

⁺Ende een scroeminge sal in vele plaetsen gescieden ende dat vier sal dicwils weder ghesonden worden, ende die wilde beesten sullen verhuysen, ende die maencrancke wijuen sullen selsame wonderen baren,

+ B vers 8

9

ende in soete wateren sullen soute wateren werden gheuonden, ende dye een vrient sal teghen den anderen vechten, ende dan sal den sin verborgen werden, ende dat verstant sal afgesceiden werden in zijn gemac,

10

ende sal van vele gesocht werden, maer niet geuonden, Die ongerechticheyt ende oncuysheit sal vermenichfuldicht werden opter aerden.

11

Dat een lantscap sal sinen naesten vragen ende seggen En is die gerechticheyt niet door v door gesprongen die daer rechtuerdich maect?

12

Ende dat salt loghenen ende het sal in die tijt sijn, dat die menschen sullen hopen, ende en sullen niet verweruen, si sullen arbeyden, ende haer wegen en sullen niet gherecht werden.

13

Mi is toegelaten v dese teekenen te seggen, ende ist dat ghi biddende weder screyt gelijc ghi nv doet, ende vast seuen dagen, so suldi weder noch meer hooren dan dese.

14

Ende ic ontwaecte, ende mijn lichaem verscricte alte seer, mijn siele arbeyde datsi soude ontbreken

15

ende dengel die tot mi comen was, die met mi spraec hielt ende stercte mi stellende op mijn voeten,

16

ende het geschiede inden tweeden nacht, ⁺ dat Saalthiel dye leydtsman des volcx quam tot my segghende. Waer waert ghi, ende waer om is v aenscijn droeuich?

+ C vers 16

17

Oft en weet ghi niet dat v Israel gelooft is, in dat lantscap haerder verhuysinge?

18

Hier om staet op ende smaect broot, ende en verlaet ons niet gelijc een herder zijn cudde inden handen der booser woluen

19

Ende ic seide hem. Gaet van mi, ende en ghenaeckt tot mi niet, Hi hoorde also ic seide ende hi ginc van mi,

20

ende ic vastede seuen daghen, huylende ende screyen-de, ghelijck mi Vriel die enghel gheboden hadde.

21

Ende het geschiede na seuen dagen, ende die gedachten mijns herten, waren mi weder alte moylic,

22

ende mijn siele nam weder den geest der verstandenisse, ende begonst weder redenen te spreken voor den alderhoochsten, ende ic seyde,

23

o heerscapper HERE wt alle bosschadien der aerden, ende wt alle haren bomen, ⁺ hebt ghi eenen wijngaert wtuercoren,

+ Esai. x

24

ende wt alle der aerden der werelt hebt ghi v eenen gracht vercoren, ende wt alle bloemen der werelt hebt ghi v een lelie vercoren,

25

ende wt alle afgronden der zee hebt ghi v een riuiere veruult, ende wt alle getimmerden steden hebt ghi v seluen Zion geheylicht,

26

ende wt allen gescapen geuogelten hebt ghi v een duyue genoemt, ende wt allen gescapen beesten, hebt ghi v een scaep voorsien

27

ende wt allen vermenichfuldichden volcken hebt ghi v een volc vercregen, ende van allen hebt ghi desen volc (welc ghi begeert hebt) een geproefde wet gegeuen

28

ende nv HERE, waer om hebt ghi eene, velen gheleuert. Ende hebt op een wortele, ander bereyt, ende hebt uwen eenigen in velen verstroyt?

29

ende si vertraden hen, si die uwen belooften tegen seyden, ende die uwen verbonde niet en geloofden

30

Ende hebt ghi v volc hatende gehatet, so salt met uwen handen gecastijt worden.

31

Ende het gesciede als ick redenen gesproken hadde, ⁺ so is die Engel tot my gesonden, die den voorledenen nacht tot my ghecomen was,

+ D vers 31

32

ende seyde mi Hoort my, ende ic sal v onderwijsen

33

ende aenmerct mi, ende ic sal v noch meer seggen. Ende ic seyde mijn HERE spreect. Ende hi seide tot mi. Ghi zijt alte zeere becommert om Israel. Of ghi hen lieuer hebt ghehadt dan den ghenen die hen gemaect heeft

34

ende ic seyde tot hem Neen ic HERE, maer smert lijdende heb ic gesproken, want mijne nieren pijnigen mi allen vren, soeckende te begripene den wech des alderhoochsten, ende te ondersoecken dat deel zijns oordeels

35

Ende hi seyde tot my Ghi en vermoges niet. Ende ic seyde. Waer om HERE? waer toe ben ic geboren, ofte waerom en wert mi die baermoeder mijnder moeder niet een graf? op dat ic Iacobs arbeit niet en sage, ende die vermoedinge des geslachtes Israel,

36

Ende hi seyde tot mi. Telt mi die dingen die noch niet ghecomen en waren, ende vergadert mi die verstroyde druppelen, ende maeckt mi die dorre bloeme weder groen,

37

ende doet mi open die gesloten scappraeyen, ende brenget mi die winden die daer in besloten zijn. Thoont mi dat beelt der stemmen, ende dan sal ic v den arbeit toonen dien ghi begeert te sien.

38

Ende ic seyde. Heerschapper HERE, wie ist die dese dingen weten mach? dan die metten menschen geen wooninge en heeft.

39

Mer ic ben onwijs, ende hoe soude ic mogen seggen, daer ghi mi af geuraecht hebt?

40

Ende hi seide tot mi. Also ghi niet een en conste gedoen, vanden genen die geseyt zijn, also en moecht ghi mijn ordeel niet vinden, oft int eynde mijn liefde die ic mijnen volc belooft heb.

41

⁺Ende ic seyde. Maer siet HERE, ghi zijt bi den ghenen dye indt eynde zijn, ende wat sullen si doen, die voor mi gheweest zijn, oft wi, oft die gene die na ons sullen sijn?

+ E vers 41

42

Ende hy seyde tot mi. Ic sal mijn oordeel eenen rinck ghelijcken. Ghelijck niedt der laetster lancsaemheit, alsoe noch der eerster snelheydt.

43

Ende ick antwoorde ende seyde. Noch en conste ghi dye niet ghemaken die ghemaeckt zijn, ende die zijn, ende dye toecomende zijn in een, op dat ghi v ooordeel te haesteliker thoonen mocht?

44

Ende hi antwoorde mi seggende. En mach die creatuere nyet haesten bouen den

[p. *]

scepper noch dye werelt die niet gelijden dye daer inne gheschapen sullen worden in een?

45

Ende ic seyde Hoe hebt ghi uwen knecht gheseyt, dat ghi leuendich makende, hebt leuendich ghemaect, dye creatuere van v ghescapen in een, ende die creatuere ghedoochde dat, mach sise nv oock teghenwoordich in een dragen?

46

Ende hy seyde, vraecht der baermoeder des wijfs, ende ghi sult tot haer segghen. Ende ist dat ghy baert, waerom baert ghi bider tijt? Hierom bidt haer dat si thien kinderen tenenmael bare.

47

Ende ick seyde. Sy en souts ymmer niet vermoeghen maer si moet dat een na den anderen baren.

48

Ende hi seyde tot my. Ende also heb ic ooc der aerden een baermoeder gegeuen die ouer haer ghesayt sijn bider tijt

49

Want gelijc dat onsprekende kint, niet en baert tghene dat den ouden toebehoort, also heb ic die werelt bescict, die van mi ghescapen is.

50

⁺Ende ick vragede, ende seyde, want ghi my nv den wech hebt gegeuen, so sal ic voor v spreken. Want onse moeder daer ghy mi van geseyt hebt, is noch ionc, ende nv genaect si der outheit.

+ F vers 50

51

Ende hi antwoorde mi seggende, vraget haer die baert, ende si salt v segghen.

52

Ghi sult haer segghen. Waerom en zijn si nv niet, die ghi ghebaert hebt, gelijc den ghenen die voor v waren, mer minder van leden?

53

Ende si selue salt v ooc segghen. ⁺ Daer zijn sommighe die inder cracht der ioncheyt geboren zijn, ende ander die inder tijt des outheydts, als die baermoeder begonst te ontbreken, geboren zijn.

+ G vers 53

54

Aldus merct oock ghi, dat ghy minder van leden zijt, dan die voor v waren, ende die nae v comen mindere dan ghy,

55

als oudt werdende creatueren, ende die stercheydt der ioncheit voorby gaende.

56

Ende ick seyde. HERE ick bid v, ist dat ic ghenade voor dijnen ooghen heb geuonden, verthoont uwen knechte, door welcke ghi uwe creatuere sult besoecken.