Den Bybel met groter neersticheyt ghecorrigeert (Liesveltbijbel 1542)
(2010)–Anoniem Liesveltbijbel–
Auteursrechtelijk beschermdDie Enghel vertoont Esdra veel heymelijcke ende toecocomende dinghen. | |
1Ga naar margenoot+ENde het geschiede, doen ic dese woorden gheeynt had te spreken, soo is tot mi ghecomen die Engel, die tot mi gesonden was, inden eersten nacht, ende seyde tot mi. | |
2Esdra staet op, ende hoort die reden die ic tot v ben comen spreken. | |
3Ende ic seyde. Mijn HEERE God spreket, | |
4Ende hi seyde tot mi. Die zee is ghesedt in een ruyme plaetse, op dat si diep ende ongemeten soude zijn, mer den inganc sal in een enge plaetse geset zijn, Ga naar margenoot+ op dattet ghelijc den stroome soude zijn, | |
5want wie soude willens in dye zee willen gaen, ende hem sien, om hem te verheeren? ist dat hi dat enge niet door en gaet, hoe soude hi moghen comen in dat breede? | |
6Item een ander. Een stadt is ghetymmert, ende gheset in een blacke plaetse, ende si is vol alder goeden, | |
7want die inganc is enge, ende in eenen nederganck gheset, op dat ter rechter siden vier soude sijn, mer ter slincker siden diep water, mer daer is alleen eenen enghen pat tusschen hen ghesedt, | |
8dat is tusschen tvier ende het water, also smal, dat den pat mer eens menschen voetstappen en begrijpe. | |
9Oft die stadt den mensche tot erffenisse sal werden ghegeuen, ist dat hi noyt dat voorgesette pericule door en heeft gegaen, hoe sal hi zijn erffenisse ontfaen? Ende ic seyde. | |
10Het is also HERE. Ende hi seyde tot my. Alsoo is Israels deel oock, | |
11want om hen heeft hi die werelt ghemaect, ende doen Adam mijn insettinghen ouer ghetreden is, so isser gheoordeelt water gheschiet is. | |
12Ende die inganghen deser werelt zijn enghe geworden, vol smerten ende arbeyts, Mer weynich ende quaet, ende vol vaers, ende seer met arbeydt onderset. | |
13Maer die inganghen der eerster werelt, zijn ruym ende seker, ende doende vrucht der onsterflicheyt. | |
14Ga naar margenoot+Ist, dan, dat die ingegaen sijn, in deser werelt, niet en hebben moghen begrijpen, dese enghe ende ydele dinghen, veel min sullen si die heymelike dinghen begripen? | |
15Nv waerom wert ghi dan gestoort, daer ghi verganclick zijt? ende wat wert ghi beroert, daer ghi sterflic zijt? | |
16Ende waerom en naemt ghi niet in uwer herten, tghene dat toecomende is, maer dat teghenwoordich is? | |
17Ick antwoorde, ende seyde, o heerschapper HERE, siet, ghi hebbet met uwer wet beschict, want die rechtueerdige sullen dese dingen beeruen, mer dye ongelouige ende godlose sullen vergaen, | |
18Mer die rechtuerdige sullen benautheden liden, hopende ruymheden. Want die ongodlic gedaen hebben, ende benautheden ge- | |
[pagina *]
| |
leden hebben, en sullen die ruymicheden nyet sien. | |
19Ende hy seyde tot mi. Daer en is geen rechter bouen God, noch gheen verstaende, ouer den alder oppersten. | |
20Daer vergaen veel teghenwoordighe, Want die wet Gods die voorgeset is, die wert veracht | |
21Want God heeft gebiedende gheboden, den comenden als si quamen, want si dat doende, souden leuen, ende wat si onderhouden souden, dat si niet ghepijnicht en worden. | |
22Ga naar margenoot+Maer si en sijn hem niet gehoorsaem geweest, ende si hebben hem wederseyt, ende si stelden hen seluen een gepeynse der ydelheyt, ende si setten hen voor dye bedriegelicheden der misdaden, | |
23ende si ouerseyden den alderhoochsten niet te zijn, ende si en hebben zijn wegen niet bekent, | |
24ende zijn wet hebben si versmaet, ende zijn beloften hebben si verloochent, ende si en hebben in zijn wettelicheden geen gelooue gehadt, ende si en hebben sijn wercken niet volbrocht. | |
25Daerom Esdra, sullen die ydele den ydelen zijn ende die volle den vollen. | |
26Siet, den tijt sal comen, ende het sal sijn, wanneer die teekenen sullen comen, die ick v voorseyt hebbe, ende die bruyt sal verschijnen, ende blijckende, sal die aerde gethoont worden, | |
27die nv onderdect wert, ende alle die vanden voorseyden quaden verlost is, die sal mijn wonderlicheden sien, | |
28Want mijn sone Iesus sal geopenbaert worden, met den ghenen die met hem zijn, ende si sullen verblijt werden, die gelaten zijn in vier hondert iaren. | |
29Ende het sal sijn na dese iaren, ende mijn sone Christus sal steruen, ende alle menschen die ademtocht hebben, | |
30ende die werelt sal gekeert worden in dat oude swigen seuen daghen, ghelijc inden eersten oordeele, alsoo datter nyemant achter ghelaten en sal worden, | |
31ende het sal nae seuen daghen sijn, ende die werelt die noch niet en waect, sal opghewect worden, ende die verdoruen werelt sal steruen. | |
32Ende die aerde salse leueren, die in haer gheslapen hebben, ende ooc dat stof, dat in swijgene woonet, ende die grauen sullen die sielen leueren die haer beuolen sijn, | |
33ende die alderhoochste sal opten stoel des oordeels geopenbaert worden ende die katiuicheden sullen doorghaen, ende die lancmoedicheyt sal vergadert werden, | |
34Maer dat oordeel sal alleen blijuen, die waerheyt sal staen, ende dat ghelooue sal ghesont beginnen te worden, | |
35Ende dat werck sal na volghen, ende den loon sal gethoont werden, ende die gherechticheden sullen waken, ende die ongherechticheden en sullen gheen heerschappie meer hebben. | |
36Ende ic seyde, Ga naar margenoot+ Abraham badt eerst voor die Sodomiten, ende Moses voor die vaders, die in die woestine sondichden, | |
37ende die na hem waren voor Israel, inden daghen Achab ende Samuels, | |
38ende Dauid voor die verstooringe, ende Salomon voor die ghene, Ga naar margenoot+ die totter heylichmakinghen quamen, | |
39Ende Elias voor die ghene die den reghen ontfinghen, ende voor den dooden, dat hi leuen soude, | |
40Ende Ezechias voor dat volck, in die daghen Sennacherib, ende vele voor velen. | |
41Ga naar margenoot+Eest dan, dat nv dat verganckelike ghewassen is, ende die ongerechticheyt vermenichfuldicht is ende die rechtuaerdighe hebben voor dye goddeloose ghebeden, waeromme en salt nv oock alsoo niet zijn? | |
42Ende hi antwoorde tot mi seggende. Die tegen-woordighe werelt en is dat eynde niet, die glorie blijft daer ghestadelijck in, Daerom hebben si voor die crancke ghebeden. | |
43Want den dach des oordeels dat sal dat eynde deser tijt zijn, Ga naar margenoot+ ende dat beghinsel des tijts der toecomender onsterflicheidt, in welcken die verderflicheyt door is gheghaen, ende dye onghemaectheyt is ontbonden, ende die ongheloouicheyt is afghewassen, | |
44maer die gherechticheydt is ghewassen, die waerheyt is opgegaen. | |
45Dan en sal nyemant mogen salich maken, dien, die verdoruen is, noch verdrucken, den ghenen die hem verwonnen heeft. Ga naar margenoot+ | |
46Ende ick antwoorde ende seyde. Dese mijn reden is deerste ende die laetste, want het was beter Adam dat lant niet te geuen, oft als hijt nv gegeuen had hem te bedwinghen, Ga naar margenoot+ op dat hi niet en sondichde, | |
47Want wat batet den menschen in desen tegenwoordighen tijt te leuen in droefheydt, ende die dooden te hopen piningen? | |
48O Adam wat hebt ghy gedaen? Want al hebt ghi ghesondicht, uwen val en is nyet alleen gemaect, Ga naar margenoot+ maer oock onsen val die wt v ghecomen is. | |
49Want wat batet ons, dat ons eenen ontsterfelijken tijt is belooft, mer wi hebben dootlike wercken ghedaen? | |
50Ende om dat ons een eewighe hope is voorseyt, maer wi alder quaetste zijn ydel gheworden? | |
51Ende want ons wooninghen der gesontheyt, ende der vryheit opgheleyt zijn, maer wy hebben qualic ghewandelt. | |
52Ende want die glorie des alderhoochsten op geleyt is, te bescermen dye ghene, die lancmoedich ghewandelt hebben, maer wi hebben in die alderquaetste weghen ghewandelt. | |
53Ende want dat paradijs ghetoont sal worden, welcx vruchte onuerganclick blijft, in welcke vryheyt ende medecijne is, maer wi en sullender niet in gaen, | |
54want wi hebben in ondancbare plaetsen gewandelt. | |
55Ende want haer aensichten bouen die sterren blincken sullen, die ontbeteringhe gehadt hebben, maer onse aensichten zijn swert bouen die duysternissen, | |
56want wi en dachten leuende niet, als wy ongerechticheyt deden, Ga naar margenoot+ dat wi nae die doot sullen beghinnen te lijden. | |
57Ende hi antwoorde mi, ende seyde Dat is dat gepeyse des strijders, welck die mensche strijden sal, die opter aerden gheboren is, | |
58op dat hi lijde, dat ghy gheseyt hebt, ist dat hi verwonnen wert. Mer ist dat hi verwint, so sal hi ontfaen dat ic segge, | |
59want dat ist leuen, welc Moyses geseyt heeft tot den volcke, doen hi leefde, seggende. Ga naar margenoot+ Verkieset v dat leuen op dat ghi leeft. | |
60Maer si en gheloofden hem niet, noch na hem den propheten, ia noch mi oock, dye tot hen ghesproken hebbe, | |
61want daer en is gheen droefheydt van haer verdoemenisse, ghelijck blijschap sal zijn ouer hem, dien dye salicheydt wijs is ghemaect. | |
62Ende ick antwoorde, ende seyde, HEERE, ick weet, dat dye alderhoochste ontfermhertich is geheeten, in dien, dat hy dien ontfermt, dye noch nyedt in dye werelt toe ghecomen en zijn, | |
64ende hy is lanckmoedich, teghen den genen dye ghesondicht hebben, | |
65ende hy is milde, want hi wil gheuen na dat die saecken heysschen, ende van grooter ontfermherticheydt, | |
66Wandt hy vermenichfuldighet meer dye ontfermhertic- | |
[pagina *]
| |
heyt desen die teghenwoordich zijn, | |
67ende die voorby zijn gegaen, Ga naar margenoot+ ende die toecomen sullen. Want waert dat hi zijn ontfermherticheden nyet en vermenichfuldichde, so en sal die werelt niet leuendich gemaect werden, met desen die daer in woonen. | |
68Ende hi scincket, want en schencte hi niet van zijnder goetheit, op dat die ghene bekeert werden, die ongerechticheyt ghedaen hebben, van haren ongherechticheden, so en soudt thien duysenste deel der menschen niet leuendich gemaect moghen werden. | |
69Ende waert dat die rechter niet en vergaue, den ghenen die met sinen woorde genesen zijn, ende wtwiste die menichte der versmadinghe, | |
70daer en soude misschien niet dan alte weynich ghelaten werden, in die ontallijcke menichte. |
|