Den Bybel met groter neersticheyt ghecorrigeert (Liesveltbijbel 1542)

¶ God die Heere openbaert Esdre die straffinghen die hy ouer dat sondighe volck wil laten gaen, ende heetet hem dat hijt haer lieden vercondighe.

Dat .xv. Capittel.

1

⁺SIet spreect inden ooren mijns volcx die reden der prophetien, welcke ic in uwen mont sal seynden, seyt dye HEERE

+ A vers 1

2

ende doet dat si in eenen brief ghescreuen werden, want het is die waerheyt.

3

En vreest niet vanden gedachten tegen v, noch die onghelouicheden der teghensprekers, en laet v nyet verscricken,

4

want alle ongheloouige sal in sijn onghelouicheyt steruen.

5

Siet ic brenge ouer dit aertrijck (seyt die HERE quade dingen) het sweert ende hongher, ende den doot, ende die verderffenisse.

6

Want die boosheit heeft die ouerhant op alle die aerde, ende

[p. *]

haere scadelike wercken zijn veruult.

7

Daerom seyt die HERE,

8

Nv en sal ic niet swighen van uwer boosheit, welcke si booslijck doen, noch ic en sal nyet verdraghen dat si oock soo booslijck doen. Syet dat onsculdige ende droeue bloet roept tot my, ende der rechtuerdiger sielen roepen volherdelijck.

9

Wrekende sal ic dye wreken seyt dye HEERE, ende ick sal alle onschuldighe bloet wt dien tot my nemen.

10

Syet mijn volc werdt als een cudde scapen totter doodinghe gheleyt, nv en sal ick nyedt lijden dat het in Egipten wone,

11

maer ic salt wt leyden, in een machtighe handt, ende eenen hoghen arme, ende ic sal metter plaghen slaen ghelijc te voren, ende ic sal alle zijn lant scheynden.

12

Egipten sal weenen, ende sijn fundamenten metter plaghen gheslagen ende metter castidinghe, welcke hem God sal toe bringhen.

13

⁺Die bouwers die dat lant wercken sullen weenen, wandt haer saden sullen ontbreken, vanden bernenden winden, ende vanden haghel, ende van een veruaerlijcke planete.

+ C vers 13

14

Wee der werelt, ende die daer inne woonen,

15

want het sweert is ghemaeckt ende haer verderffenisse, ende deen volc sal tegen dat andere volc opstaen totten strijde, ende sweerden in haren handen,

16

Want die menschen sullen onstantachtich zijn ende deen den anderen te machtich werdende, en sullen si haren coninck ende princen niet achten, die wegen haerder daden ende handelinghen in haer gewelt.

17

Een mensche sal in die stadt begheeren te gaen ende en sal niet moghen.

18

Want om haer houerdicheyt sullen die steden verstoret werden die huysen sullen verscrict werden, die menschen sullen vreesen.

19

Dye mensche en sal sinen naesten niet ontfermen, om te vernielen, haer huysen totten sweerde, om te roouen hare goeden om den honger des broots, ende grote tribulatie

20

⁺Siet ic roepe te samen seyt God, alle coningen der aerden om mi te ontsiene, die van oosten zijn, ende van suyden ende noorden ende van Libano, om tot hem te bekeeren ende weder te gheuen, welcke si dyen ghegeuen hebben

+ D vers 20

21

gelijck si tot heden toe mijnen wtuercorenen doen, also sal ic ooc doen, ende weder geuen in haren schoot, dit seyt die HEERE God,

22

Mijne rechter hant en sal niet sparen ouer die sondaers, noch dat sweert en sal niet ophouden, vanden ghenen die onschuldich bloet storten opter aerden.

23

Vier is wtghegaen van sijnder gramscappen, ende heeft die fundamenten der aerden verslindt ende die sondaers gelijc onsteken stroo.

24

Wee hen dye sondigen, ende en houden mijne gheboden niet, seyt die HEERE.

25

Ic en salse niet sparen, kinderen gaet wech vander macht. En willet mijne heylichmakinge nyet besmetten,

26

want die HEERE kentse alle dye teghen hem sondighen, Daerom heeft hise in die doot gheleuert, ende in die verderffenisse.

27

Want nv sijn die quade dingen ouer dat aertrijck ghecomen, ende ghi sult daer in bliuen, want God en sal v niet verlossen om dat ghi tegen hem ghesondicht hebt.

28

Siet een veruaerlijc gesichte, ende dies aensicht van oosten

29

⁺Ende die nacien der draken der Arabiers, sullen wtgaen in vele waghenen, ende ghelijc blasinghe wert haer ghetal opter aerden gedraghen, op dat alle diese hooren rasende in gramscappen, vreesen ende beuen, ende als wilde beyren wt den bosscen sullen si wtghaen, ende sullen toecomen in grooter cracht

+ E vers 29

30

ende si sullen met hen inden strijdt staen, ende si sullen verwoesten dat deel der Assiriers lants.

31

Ende hier nae sullen dye draken douerhandt nemen ghedachtich haerder gheboorten,

32

ende si sullen hen om keeren tsamen sweerende met groter crachte, om dye te veruolghen.

33

Dese sullen verstoort worden, ende sullen swighen, ende si sullen haer voeten ter vlucht keeren, ende die ondersitter vander Assiriers cleyn landekens salse beleggen, ende sal een van dyen wtmaken, ende in haren heyr, sal vreese ende beuinghe sijn, ende strijdinghe teghen haer coninghen.

34

Siet een wolcke vanden oosten, ende vanden noorden totten suyden, ende haer aensicht alte afgriselick vol gramschappen ende onweders,

35

⁺ende sy sullen tsamen stooten, ende si sullen een oueruloedighe ghesterte opter aerden, ende haer gesterte tsamen stoten Ende dbloet sal sijn vanden swaerde totten buyc toe

+ F vers 35

36

ende des menschen roocke tot des kemels stroysele,

37

ende daer sal groote beuinghe ende vreese opter eerden sijn, ende si sullen vereysen, die dye gramschap sullen sien, ende beuinghe salse beuaen.

38

Ende oueruloedighe dicke wolcken, met reghene vanden suyden, ende noorden, ende dat andere deel van westen,

39

ende die winden sullen douerhant nemen, vanden oosten, ende si sullense weder besluyten, ende die wolcke die hi in gramschap verwecte,

40

ende dat ghesterte, om eene verscrickinghe te maken, ten oosten winde, ende ten westen salt geschent werden, ende grote ende machtighe wolcken vol gramschappen ende dat gesterte, sullen verhoocht werden, op dat si alle die aerde ende die daer in woonen verscricken,

41

ende si sullen instorten ouer alle hooghe wtschijnende plaetsen een eyselijcke ghesterte, vier ende haghel, ende vlieghende swaerden, ende vele wateren, also dat ooc alle velden veruult sullen worden, ende alle riuieren met veelheyt der wateren,

42

ende si sullen steden ende mueren, ende berghen ende houelen, ende houten der bosschen, ende thoy der beemden, ende haer coren bederuen,

43

ende si sullen stantachtich door ghaen tot Babilonien toe, si sullense verscricken,

44

si sullen tot die selue tsamen comen, ende si sullense beleggen, ende si sullen tghesterte, ende alle gramschap ouer haer wtstorten.

45

Ende stof ende den rooc sal van onder opgaen, totten hemel toe, ⁺ ende si sullense al die rontsomme liggen beweenen ende die onder haer ouer bliuen sullen den ghenen dienen, diese verscrict hebben.

+ G vers 45

46

Ende ghi Asia die v oock op die hope van Babilonien vertroost hebt, ende een eer haers persoons.

47

Wee v ghi catiuige, om dat ghi v haer ghelijc hebt ghemaect ende verciert hebt uwe dochteren in hoerderie om te behaghen, ende te glorieren in v boelleerders die altijt begeert hebben met v te hoereren.

48

Ghi zijt dye verhartste stadt, na geuolcht in allen haeren wercken, ende haren vonden,

49

daerom seyt God, Ic sal v quade dingen inseynden, weduscap, armoede, ende hongher, ende tswaert, ende die pestilentie, om uwe huysen woest te maken vander sceydinge, ende vander doot

50

ende die glorie uwer cracht sal gelijc een bloem verdroocht werden als die hitte op sal ghaen, die ouer v ghesonden is,

51

Ghi sult cranc werden gelijc als een arm wijfken geslagen ende gecastijdt vanden wiuen Also dat die machtighe ende minnaers v niet en sullen mogen ontfaen

[p. *]

52

Ende en sal ick v also niet wantrouwelijc liefhebben seyt die HEERE?

53

Het en ware dat ghi mijn wtuercorenen haddet ghedoot in alre tijt, verhoogende die slauinghe dijnder handen, ende gheseyt ouer haren doot, als ghi droncken waert,

54

verciert die gedaente des aenschijns?

55

Dat loon uwer hoerderien in uwen schoot, daerom suldy betalinge ontfaen.

56

Ghelijc ghi mijnen wtuercorenen sult doen seyt die HEERE, alsoo sal v God doen ende sal v int quaet leueren.

57

Ende v kinderen sullen van hongher steruen, ende ghi sult midts den swaerde vallen, ende uwe steden sullen vernielt werden, ende alle die uwe sullen midts den swaerde int velt vallen.

58

Ende die in die bergen sijn, sullen van hongher steruen, ende sullen haer vleesch eten, ende bloet drincken, van honger des broots ende dorst des waters.

59

Ghi onsalighe sult door die zeen comen ende sult weder quade dingen ontfaen

60

Ende inden doorganc sullen si die gedoode stadt gheweldelijck tegen een verschoren, ende si sullen eenich deel ws lants wtroeyen, ende dat deel uwer glorien sullen si vernielen. Voort aen die weder ghekeerde, wederkeerende.

61

Ende als ghi verdoruen sijt, sult ghi hen voor stoppelen wesen, ende si sullen v voor vier wesen. Ende si sullen v verslinden,

62

ende v steden, v lant ende v berghen, alle uwe bosscagien, ende dat vruchtdragende houdt, sullen si met vier verbernen, Si sullen v sonen gheuanghen leyden, ende wat ghi hebt sullen si tot eenen roof hebben, ende si sullen die glorie ws aenschijns verdrijuen.