Den Bybel met groter neersticheyt ghecorrigeert (Liesveltbijbel 1542)

Den heydenen wort ooc hare straffinghe voorseyt, ende hoe hem dat volcke Gods daer inne houden sal.

Dat .xvi. Capittel

1

⁺WEe v Babilonien ende, Asia wee v Egipten, ende Syria,

+ A vers 1

2

Omgordet v met sacken ende hayren cleederen, ende bescreyt v kinderen, ende weest droeuich, want uwe vernielinghe is ghenaeckt,

3

het swaert is onder v gesonden, ende wye is dye dat afkeeren sal?

4

Het vier is in v gesonden ende wye ist diet wt blusschen sal?

5

V zijn quade dinghen toeghesonden, ende wye ist diese verdrijuen sal?

6

Sal ooc yemant veriaghen den hongerigen leeu in dat bosche. Of sal wtblusscen dat vier in die stoppele, terstont alst begint te bernen?

7

Sal ooc yemant dat gheschut van eenen stercken schutter geschoten weder om driuen?

8

Dye stercke HEERE, seyndt quaet toe, ende wie ist diet verdriuen sal?

9

Daer is vier wt zijnder gramscappen gegaen, ende wie ist diet wt blusschen sal?

10

Hi sal blixemen, ende wie en sal niet vreesen Hi sal donderen, ende wie en sal niet schroomen?

11

Dye HEERE sal dreyghen, ende wye en sal niet grondelijcken te stucken ghewreuen werden van sinen aensichte?

12

⁺Die aerde beefde, ende haer fundamenten, dye zee vloeyt vander diepten, ende haer vloeden sullen verstoort werden, ende haer visschen vanden aensichte des HEREN, ende vander claerheyt zijnre cracht,

+ B vers 12

13

want sijn rechte hant is stercke die den boge spant zijn pijlen scerp, die van hem gheschoten werden, en sullen niet ruyssen als si beghinnen gheschoten te werden in die eynden der aerden.

14

Syet die quade dinghen werden ghesonden ende en sullen nyet wederkeeren, tot dat si op dye aerde comen.

15

Het vier werdt ontfunckt, ende ten sal niet wtgeblusschet werden, tot dattet die fundamenten der aerden verteert hebbe.

16

Gelijc tgheschutte ghescoten van eenen vromen schutter niet weder en keert also en sullen niet weder keeren die quade dingen, die welcke opter aerden ghesonden sullen zijn.

17

Wee my wee my, wie sal mi verlossen in dien daghen. Dat beghinsele der smerten ende veelder suchtinghen,

18

dat beghinsel des honghers ende veels vernielinghes. Dat beghinsel der oorloghen, ende die machtige sullen schromen, dat beghinsel der quader dinghen, ende si sullen alle beuen.

19

Wat sal ick in desen doen, als die quade dinghen comen.

20

Syet hongher ende plaghe, ende tribulatie ende banghicheden sijn ghesonden, als gheesselen ter beteringhen

21

ende in allen desen en sullen si nyedt bekeeren van haren ongherechticheden, noch si en sullen der gheesselen altoos niet ghedachtich wesen.

22

⁺Siet den lijfcost sal goede coop sijn opter aerden, also dat si sullen meynen, dat hen den vrede gesonden si, ende dan sullen die quade dinghen bloeyen opter aerden, dat sweert, hongher, ende groote onrust.

+ C vers 22

23

Want daer salder vele die de aerde bewoonen, van hongher verghaen, ende dat sweerdt sal die andere verdoen, die ouer bliuen vanden honghere,

24

ende dye dooden sullen als drec wech gheworpen worden, ende daer en sal niemandt sijn dyese vertrooste. Wandt die aerde die sal woest ghelaten werden, ende haer steden sullen af gheworpen worden,

25

ende daer en sal nyemant achter gelaten worden dye die aerde bouwe, oft dyese besaeyde.

26

Dye boomen sullen vruchten gheuen, ende wye salse afplucken, ende vergaderen?

27

Den wijndruyf sal rijpe werden, ende wye sal dien treden,

28

wandt in allen plaetsen sal groot ghebreck van menschen sijn. Dye mensch sal eenen mensche begheeren te siene, of sine stemme te hooren.

29

Daer salder thien achter ghelaten werden vander stadt, ende twee vanden acker, die hem geborghen sullen hebben in den dicken bossche, ⁺ ende in die reten der herder steenen, gelijckerwijs als achter ghelaten werden inden olijfboomgaert,

+ D vers 29

30

ende in elcken boome drye oft vier olijuen,

31

oft ghelijck inden afghelesenen wijngaert, wijndruyuen werden ghelaten, van den ghenen die den wijnghaert neerstelijcken doorsoecken,

32

also sullender in dyen daghen drye oft vier ghelaten werden, den ghenen dye haer huysen doorsoecken met den swaerde.

33

Ende die aerde sal woest ghelaten worden, ende haer ackers sullen verouden, ende haer wegen ende alle haer paden sullen doornen bloeyen, om datter gheen menschen ouer en sullen ghaen.

34

Dye maechden sullen weenen, gheen bruydegoms hebbende, die wijuen sullen weenen, gheen mans hebbende,

35

haer dochteren sullen weenen, gheen hulpe haer bruydegoms hebbende. Inden oorloghe sullen si verteert werden, ende haer mans, sullen in honghere verghaen.

36

⁺Hier omme hoort dese dingen, ende bekentse, o ghi knechten des HEREN,

+ E vers 36

37

Siet dat woort des HEEREN, ontfangt dat,

38

Die HERE seyt. Siet die quade dingen genaken ende en vertragen niet

39

Gelijc een beuruchte vrouwe, als si in dye negende maent haer kijndt baert, als nv die vre haerder baringhen ghe-

[p. *]

naket, twee oft drye vren te voren, smerten haren buycke omghaen, ende als dat kindt voort compt van haren buyck, dan niet een ooghenblick en vertoeuen,

40

also en sullen dye quade dinghen niet eenen ogenblicke vertoeuen, om voort te comen ouer die aerde, ende die werelt sal weenen, ende smerten sullense al omme houden.

41

O mijn volc hoort mijn woort, bereyt v totten crijsch, ende totten quaden tijt ghelijc als pelgrimmen opter aerden.

42

Die vercoopt, si als een die vliet, ende die coopt, als die verliesen sal.

43

Die comenschapt als die gheen vruchte en ontfaet,

44

ende die timmert als die niet bewoonen en sal. Dye saeyt, als die dat niet maeyen en sal. Alsoo oock dye den wijngaert snoeyt, als dies nyedt aflesen en sal.

45

Dye trouwen als die gheen kinderen winnen en sullen, ende dye niet en trouwen, soo als weduwers.

46

⁺Daeromme die arbeyden, die arbeyden sonder sake.

+ F vers 46

47

Want dye vreemde gheboren sullen haer vruchten maeyen, ende sullen haer goet roouen, ende dye huysen ommekeeren, ende haer sonen sullense vangen, want inder geuanckenisse, ende in hongher, winnen si haer kinderen.

48

Ende die comenschappen inden rooue, hoe langhe vercieren si haer steden, ende haer huysen, ende haer besittinghen, ende haer persoonen,

49

alsoo vele te meer, sal ic hem wantrouwende benijden ouer haer sonden seyt die HERE.

50

Ghelijc een hoere, wantrouwende benidet een goede wijf,

51

also sal die rechtuerdicheit die onrechtuaerdicheyt wantrouwende beniden, als si haer verciert ende beschuldichtse int aensicht, als hi comt dye verantwoorden sal, den versoeckende alle sonde, opter aerde.

52

Hieromme en wilt dyen niet ghelijck werden, noch sinen wercken,

53

wandt noch een weynichsken ende die ongerechticheyt sal vander aerden genomen werden ende die gerechticheyt sal in v regneren. ⁺

+ psa. xliij

54

⁺Die sondaer en segghe ick niet, dat hi niet ghesondicht en hebbe, want men sal gloeyende colen op zijn hooft verbernen, die seyt. Ic en hebbe niet ghesondicht voor den HEERE God, ende zijn glorie.

+ G vers 54

55

Siet die HEERE sal alle der menschen wercken ende haer vonden, ende haer herten bekennen.

56

Want hi seyde. Die aerde werde, ende is gemaect

57

Den hemel werde, ende hi is ghemaect. Ende in sinen woorde sijn die sterren gefundeert, ende hi alleen weet der sterren getal.

58

Die de afgronden, ende hare schatten ondersoect, dye de zee ghemeten heeft, ende haer begrijp.

59

Dye de zee int middel der wateren heeft besloten, ende dye aerde op dye wateren heeft ghehanghen met sinen woorde.

60

Dye den hemel recket als een ghewelfte ouer die wateren, ⁺ heeft hi dien ghesedt.

+ D vers 60

61

Die in die woestine water fonteynen heuet gheset, ende op die toppen der berghen holen, om die stromen wt te laten vanden hoochwtscijnenden steenen, op dat hi die aerde nat soude maken,

62

Dye den mensche schiep, ende sette zijn herte int middel des lichaems, ende seynde hem gheest, leuen, ende verstandenisse, ende den ademtocht des almachtigen Gods

63

die alle dinghen ghemaeckt heeft, ende ondersoeckt alle verborghen dingen, in dye verborghentheden der aerden.

64

Dese weet uwen vont, ende dwelck ghy denct in uwe herten sondighende, ende willende v sonden verberghen.

65

Waerom die HERE alle uwer wercken ondersoeckende heeft ondersocht, ende hi sal v alle besculdighen ende ghy sult beschaemt zijn,

66

als v sonden te voorschijn comen voor die menschen, ende die ongherechticheden sullent zijn, die als beschuldigers sullen staen in dien daghe.

67

Wat sult ghi doen, oft sult ghi v sonden verbergen voor Gode ende zijn engelen?

68

Siet God is die rechter, vreest hem. Laet af van uwen sonden ende vergetet uwe ongherechticheden, dye nv te doene inder eewicheyt, ende God sal v wtleyden, ende verlossen van alle tribulacie

69

Siet ouer v is ontfunct die hette eender oueruloedigher scharen, ende si sullender sommige van v wechrucken, ende sullen die ledighe met afgoden spijsen,

70

ende die hem consenteren, sullen dyen tot bespottinge, ende tot lachter, ende vertredinge sijn

71

Want den plaetsen, sal een plaetse zijn, ende inden bi ligghende steden vele opstaninge zijn op die ghene die den HEERE vreesen.

72

Sy sullen sijn als ontsinninghe nyemanden sparende, om te beroouen, ende te verwoestene dye noch den HEERE vreesende sijn,

73

want si sullen verwoesten, ende dye goeden roeuen, ende si sullense wt haren huysen werpen.

74

Dan sal die proeuinghe mijnder wtuercorender blijken ghelijck dat gout dat vanden viere geproeft wert.

75

Mine wtuercorene hoort, seyt die HEERE, Siet die daghen der tribulatien sijn hier bi, ende van dien sal ic v verlossen.

76

En vreeset noch en wanckelt niet, Want God is uwe hooftman.

77

Ende die mijn geboden ende beuelingen hout seyt die HERE God op dat v uwe sonden niedt en verweghen,

78

ende op dat uwe onrechtuerdicheden hen niet ouer en heffen. Wee den ghenen die van haren sonden gebonden werden, ende werden van haer onrechticheden ouerdect, gelijckerwijs als den acker wert betuynt vanden bossche, ende sinen pat met doornen wert bedeckt, waer ouer dat gheen mensce en gaet, ende wert wt gesloten, ende ghesonden tot verslindinghe des viers.

Hier eyndet dat vierde boec Esdre, Welcke Ieronimus niet ouer en heeft ghestelt wt den Ebreuschen int Latijn.

¶ Nv volcht Tobias