Den Bybel met groter neersticheyt ghecorrigeert (Liesveltbijbel 1542)

[p. *]

Hier begint dat boeck Thobie.

Vanden leuen, gheslachte ende vreese Gods Tobie.

Dat .eerste. Capittel.

1

⁺TObias was vanden geslachte, ende stadt Naphthalim, die daer is inden ouersten deelen Galilee, op Naason, na den wech dye westwaert leyt, hebbende die stadt Sephet ter slincker siden.

+ A vers 1

2

Als hi geuangen was inden dagen Salmanasar des conincx der Assirien.

3

Nochtans in die gheuankenisse ghesedt, ⁺ heeft den wech der waerheyt nyet verlaten,

+ iiij.reg. xviij.

4

also dat hi alle dat hi hebben mochte, daghelicx sinen mede gheuangenen broeders, dye van sinen gheslachte waren, mededeelde. ⁺

+ i.re. xij.

5

Ende hoe wel hi dalder ioncste was inden gheslachte Naphthalim, so en dede hi nochtans niet kindtselijc in sinen wercke,

6

Voort meer, doen si alle gingen totten gulden calueren, die Ierobeam die coninc van Israel had gemaket, vluchte dese alleen, dier alre geselscap ende reysde te Ierusalem totten tempel des HEREN, ⁺ ende aldaer aenbadt hi den HERE God Israhels, ⁺

+ exo. xxij

+ deu xij.

7

ende offerde ghetrouwelijck alle sijn eerste vruchten ende sijn tienden, also dat hi int derde iaer alle tiendinghe, den nieuwen bekeerden, ende toecomelinghen diende,

8

⁺dese dinghen ende deser gelijc onderhielt hi na die wet Gods, doen hi noch een cleyn kindeken was

+ B vers 8

9

Mer doen hi een man was gheworden, so nam hy een huysurouwe Annam, ⁺ van sinen geslachte, ende wan wt haer eenen sone, ende hiet hem met sinen name,

+ nume. xxvij. n. xiiij.

10

dien hi van zijnder kintsheydt op God leerde vreesen, ende hem onthouden van alle sonden.

11

Aldus doen hi midts die geuanckenis in die stadt Niniue was gecomen, met zijnder huysurouwen, ende met sinen sone, ende met alle zijn geslachte, ende als si alle vander spijse der heydenen aten, so bewaerde dese sijn siele, ⁺ ende en wert noyt besmet in haer spijsen,

+ De. xij c

12

ende want hi des HEREN gedachtich was in alle sijnder herten, so gaf hem God genade in die tegenwoordicheyt Salmanasar des conincx, ende die gaf hem macht te ghaen daer hi wilde, hebbende vriheit te doen wat hi wilde.

13

Aldus reysde hi door alle die in die gheuanckenisse waren, ⁺ ende ghaf hen lieden vermaninghe der salicheyt. ⁺

+ C vers 13

+ mathe. xxv.

14

Ende als hi was ghecomen te Rages in dye stadt der Meden, ende had thien talenten siluers, van dien dingen daer hi mede vanden coninc gheeert was,

15

ende sach met een grote scare sijns gheslachts Gabelum ghebrec hebben, die van sinen stamme was, soo ghaf hi hem dat voorghenoemde gewicht siluers onder een hantscrift.

16

Nae vele tijts doen Salmanasar dye coninck doot was, ⁺ als Sennacherib zijn sone voor hem regneerde, ende hatede die kinderen Israels, in zijn aenschouwen, so ghinc Tobias daghelijcx door alle zijn maeschap ende troostese, ende deylden elcken na dat hi vermochte van sinen goede.

+ iiij.reg. xviij. ij.para. Esaye xxxvi. iij.Reg. xix.g

17

Hi spijsde die hongherighe, ende den naeckten ghaf hi cleederen, ende die dooden ende verslagenen begroef hi sorchfuldelijck.

18

⁺Daer na doen dye coninck Sennacherib weder was ghekeert vliende die plaghe van Iudeen, dye God bi hem hadde gesonden, om sine Godlasteringe,

+ D vers 18

19

wert hi toornich, ende versloech vele wten kinderen Israels, so begroef Tobias haer lichamen

20

Ende doent den coninc wert gebootscapt, so hiet hi hem dootslaen Ende nam alle sijn goet.

21

Tobias die vluchte met sinen sone, ende met sinen wiue, ende was naect verborgen, want vele hadden hem lief

22

Mer na vijfenveertich daghen, wert die coninc gedoot van sinen sonen,

23

ende Tobias is wederom gekeert tot sinen huyse, ende alle zijn goet wert hem weder ghegheuen.