Den Bybel met groter neersticheyt ghecorrigeert (Liesveltbijbel 1542)

¶ Sy comen tot Raguel, die haer vriendelijc ontfanct, ende gheeft den ionghen Tobia zijn dochter Saram tot een huysurouwe.

Dat .vij. Capittel

1

⁺ENde si zijn in ghegaen tot Raguel, ende Raguel heeftse met vruechden ontfaen, Ende Raguel Tobiam aensiende, seyde tot Annam zijn huysurouwe,

+ A vers 1

2

Hoe gelijck is dese ionghelinc mijnder suster soon.

3

Ende doen hi dit gheseyt hadde, sprack. hi Van waer zijt ghi iongelinghen onse broeders? Si seyden Wi zijn wt den geslachte Naphthalim, wt der geuanckenisse Niniue.

4

Ende Raguel seyde tot hen, Kennet ghi Tobiam mijnen broeder? Si seyden, wi kennen hem wel.

5

Ende als hy veel goets van hem sprac, so seyde die Engel tot Raguelem, Tobias van welcken ghi vraecht, is deses vader.

6

Ende Raguel liet hem neder op sinen hals, ende custe hem met tranen, ende huylende op sinen hals heeft hi geseyt.

7

Mijn sone, v si benedidinghe, want ghi zijt eens goeden ende alderbesten mans sone.

8

Ende Anna zijn huysurouwe, ende Sara zijn dochter weenden oock.

9

⁺Ende na dat si ghesproken hadden so geboot Raguel eenen ram te dooden, ende een weerschap te bereyden,

+ B vers 9

10

ende doen hise vermaende, dat si hen ter tafelen totter maeltijt souden setten, so seyde Tobias Ic en sal hier heden niet eten oft nyet drincken, ten si dat ghi mijn begeeringhe eerst beuesticht, ende dat ghi mi ghelooft te gheuen Saram v dochter.

11

Doen Raguel dat woort had gehoort, verscricte hi, want hi wiste wat dien seuen mannen toe was gecomen, die tot haer in waren gegaen, ende hi begonste te vreesen dat desen ooc misschien desgelijc soude ghebueren

12

Ende doen hi wanckelde, ende den begeerenden geen antwoorde en gaf, so seyde die Engel tot hem. En wilt niet vreesen, hem v dochter te geuen,

13

want desen Godureezenden behoort v dochter tot eender huysurouwen Daerom en heeftse geen ander mogen hebben ⁺

+ gen. ij.f.

14

⁺Doen seyde Raguel, Ic en twijfel niet God en heeft mijn gebeden ende tranen in sine tegenwoordicheyt toegelaten,

+ C vers 14

15

Ende ic gelooue dat hi v daerom tot mi heeft doen comen, dat dese mijn dochter ooc haren maechscappe soude werden toegheuoecht, na die wet Mosi, ende nv en wilt niet twijfelen dat icse v geuen sal.

16

Ende hi greep die rechterhant zijnre dochter aen, ende leuerdese der rechterhant Tobie, seggende, ⁺

+ Dit ghebruycken is noch bi den ioden.

17

God Abraham, ende God Isaac, ende God Iacob si met v, ende hi voege v te samen, ende veruulle zijn benedidinge in v .

18

Ende nemende eenen brief, hebben si een houwelixe voorwaerde gemaect. Ende hier nae weerscapten si, ende ghebenediden God.

19

Ende Raguel riep Annam zijn huysurouwe tot hem, ende geboot haer, dat si een ander slaepcamer soude bereyden,

20

ende leyden Saram haer dochter daer inne, Ende si weende,

21

ende seyde tot haer. Mijn dochter zijt sterck van gemoede, Die HERE des hemels geue v vruechde, voor dat verdriet dat ghi geleden hebt.