Den Bybel met groter neersticheyt ghecorrigeert (Liesveltbijbel 1542)

¶ Tobias seyndt den Enghel sinen leytsman tot Gabelum om dat ghelt tontfanghen, dat hi sinen vader schuldich was

Dat .ix. Capittel.

1

⁺DOen riep Tobias den Engel tot hem, die hi eenen mensch meynde te wesen, ende seyde hem. Azaria broeder, ic begheere dat ghi mijn woorden hoort. Al gaue ick mi seluen v tot eenen knecht ouer, ic en soude uwe voorsienicheyt niet waerdich zijn, Nochtans bid ic v, dat ghi voor v neemt die dieren, ende knechten, ende dat ghi gaet tot Gabelum, in Rages der Meden stadt, ende geeft hem zijn hantscrift, ende ontfanget dat gelt van hem,

+ A vers 1

2

ende dat ghi hem bidt tot mijnder bruyloften te comene. Want ghi weet selue wel, dat mijn vader die dagen telt, ende ist dat ic eenen dach langer vertoeue, so is zijn siele bedroeft Ende sekerlic ghi siet, hoe mi Raguel besworen heeft, wiens besweeringe ic niet en mach ontsegghen.

3

⁺Doen nam Raphael tot hem vier van Raguels knechten, ende twee kemelen, ende reysde tot Rages der Meden stadt. Ende Gabelum vindende, gaf hi hem zijn hantscrift, ende ontfinc alle dat ghelt. Ende hi gaf hem te kennen van Tobia, den sone Tobie, alle die dinghen die gedaen waren, ende hi dede hem mede ter bruyloft comen.

+ B vers 3

4

Ende doen hi ingegaen was in Raguels huys, so vant hi Tobiam ter tafelen sitten,

5

⁺ende hi spranc op, ende si custen malcanderen. Ende Gabelus weende, ende hi gebenedide God, ende sprac. Die HERE God Israel gebenedide v, want ghi zijt een sone des alder besten ende rechtuaerdigen, ende Godureesenden mans, ende des die daer aelmoesen doet.

+ C vers 5

6

Ende die benedidinge werde geseyt ouer v huysurouwe, ende ouer v ouders, ende dat ghi muecht sien v kinderen, ende die kinderen uwer kinderen, totter derder ende vierder geboorten toe,

7

ende v saet si gebenedijt van God Israel, die regneert inder eewicheyt.

8

Ende als si alle Amen hadden geseyt, so ghinghen si totter weerschappen. Maer si oeffende die weerschap der bruylofte oock metter vreesen Gods.