Den Bybel met groter neersticheyt ghecorrigeert (Liesveltbijbel 1542)

Als die ionghe Tobias een weenich tijts langer vertrect om des bruylofts wille, soo wort sijn vader seer bedroeft, desgelijcken weent ooc die moeder, ende claget iammerliken, ende en was niet te troosten. Na lange bidden, als Tobias die ionge niet bliuen en woude, So laet Raguel sinen swager Tobiam reysen met sinen wijue.

Dat .x. Capittel

1

⁺ENde doen Tobias vertoefde, om der bruyloften wil, so was sijn vader Tobias sorchfuldich, seggende.

+ A vers 1

2

Waerom meynt ghi dat mijn sone vertoeft? oft waerom is hi daer gehouden? Bi auontueren Gabelus is doot, ende dat hem niemant dat gelt weder en geuet.

3

Ende hi selue begonst seer droeue te werden, ende Anna zijn huysurouwe met hem. Ende si begonsten beyde tsamen te weenen, om dat haer sone opten ghesetten dach niet weder en keerde tot hen.

4

Sijn moeder weende met ontroostelike tranen, ende seide.

5

Wee mi, mijn sone, waerom hebben wi v inden vreemden landen laten reysen, ⁺ ghi licht onser oogen, ende stoc ons ouderdoms, ghi troost ons leuens, ghi hope ons nacomenden geslachts. Alle dingen in v een hebbende, en souden v niet van ons hebben laten gaen.

+ B vers 5

6

Tobias seide tot haer. Swijcht, ende en wilt niet gestoort werden, onse sone is gesont. De man is getrou genoech, daer wi hem mede gesonden hebben.

7

Maer si en mocht in geender manieren getroost werden, mer si ginc dagelicx wt, ende sach al om, ende omginc alle die wegen, daer door hope des wedercomens was, op dat si hem (waert mogelijc) van verre mocht sien.

8

Ende Raguel seyde tot sinen behouden sone. Blijft hier, ende ick sal eenen bode ter liefden van v, tot Tobiam uwen vader seynden, die hem segghe, dat het wel met v is.

9

Tot welcken Tobias sprack, Ic weet dat mijn vader, ende mijn moeder, nv die dagen tellen, ⁺ ende haren geest wert in henseluen ghequelt.

+ C vers 9

10

Ende als Raguel Tobiam met vele woorden badt ende hi hem gheensins en wilde hooren, so leuerde hi hem Saram ouer, ende die helft zijns goets, aen knechten, aen deernen, aen schapen, aen kemelen, ende coeyen, ende vele ghelts, ende liet hem wel varende, ende vrolick van hem trecken, seggende.

11

Die heylige Engel des HEEREN si in uwen wech, ⁺ ende brenge v ghesont, ende dat ghi alle dingen recht bi v ouders moget vinden, ende mijn oogen moeten v kinderen sien, eer ick sterue.

+ Exodi xxiij.

12

Ende die ouders grepen haer dochter, ende custense, ende lietense gaen, haer vermanende ter eeren haers mans ouders,

13

haren man lief te hebben, haer gesinne te regeren, haer huys te bestieren, ende haer seluen onbegripelic te bewizen