Den Bybel met groter neersticheyt ghecorrigeert (Liesveltbijbel 1542)

¶ Daer na bereyt si haer costelic toe, si neemt haer maget met haer, ende tooch snachts ter poorten wt, inden leger van Holofernes.

Dat .x. Capittel

1

⁺ENde doen si op hielt te roepen totten HERE, stont si vander plaetsen op, daer si ghestrect lach totten HERE, Ende si riep haer maecht ende daelde af in haer huys, ende leyde dat hayren cleet van haer lichaem,

+ A vers 1

2

ende si dede die cleederen haerder weduwelicheit wt, ende wiesch haer lichaem, ende si salfde haer metter alder bester myrren, ende si ontulocht dat hayr haers hoofts, ende sette een huyue op haer hooft, ende si dede die cleederen haerder ghenoechlicheit aen,

3

ende si dede pantoffelen aen haer voeten, ende nam verchieringe der rechter hant, ende lelien, ende oorringen, ende vingerringhen tot haer. Ende si vercierde haer met allen haren cieragien.

4

Die HERE gaf haer ooc een wtnemende scoonheyt, Want alle dese vercieringe en geschiede niet wt wellusticheit des vleeschs, maer wt duechden, ende wt eender oprechter meyninghen,

5

ende daerom vermeerderde haer die HERE dye schonheyt also dat si alder menschen oogen met onghelijckelike scoonheit verscheen. Aldus leyde si haerder deernen een flesken wijns op ende een cruycxkens olijs, ende moescoecken ende broot, ende keese, ende si is also ghereyst.

6

⁺Ende als si aender stadt poorten quam, vant si Oziam verwachtende, ende die ouders der stadt. Alse die sagen verbaest zijnde

+ B vers 6

7

hebben si hen te vele verwondert van hare scoonheit. Nochtans en vraechden si haer niet, ende lietense doorgaen seggende.

8

God onser vaderen geue v genade, ende becrachtige v met zijnder cracht, alle dat voornemen ws herten, ende Ierusalem moet ouer v verblijden, ende uwen name si int getal der heyligen, ende der gerechtiger. Ende alle die daer waren, seiden alle met eender stemmen. Dat gesciede, dat gesciede.

9

Iudith badt den HERE ende ginc door die poorte, si ende haer maecht.

10

⁺Ende het is geschiet, doen si den berch af daelde, ontrent den opganc des daechs, so liepen haer die verspieders der Assyriers te gemoete, ende hieldense seggende Van waer coemt ghi? oft waer gaet ghi?

+ C vers 10

11

Si antwoorde ic ben een dochter der Hebreers. Ende daerom ben ic van haer aenscijn geuloden, want ic bekende dat toecomende was, dat si tot een beroouinge sullen werden ouergeleuert, om dat si v versmadende, hen seluen niet en hebben willen opgeuen,

12

dat si ontfermherticheyt in uwen aensichts hadden mogen vinden. Om deser saken wille, dacht ic bi mi seluen seggende. Ic sal totten aensicht des princen Holofernis gaen, op dat ic hem haer heymelike saken te kennen geue, ende hem toone met welcken toeganc hijse crijgen mach, also datter niet een man van sinen heyr en valle.

13

⁺Ende als dese mannen haer woorden gehoort hadden, aenmercten si haer aensicht, ende in haren oogen was een beswiminge, want si verwonderden haer te vele van haerder scoonheyt.

+ D vers 13

14

Ende si seyden tot haer, Ghi hebt v leuen behouden, om dat ghi alsulcken raet hebt geuonden, dat ghi af quaemt tot onsen here Mer dat suldy weten, dat wanneer ghi in zijn aensicht staet, dat hi v wel doen sal, ende sult alder ghenaemsten in zijnder herten zijn.

15

Ende si brachtense totter tenten Holofernis, ende gauent hem te kennen.

Ende als si ingegaen was voor zijn aensicht, terstont is Holofernes in sinen oogen gheuangen. Ende zijn ruyters seyden tot hem.

16

Wie soude der Hebreen volc versmaden, dat also fraeyen wiuen heeft? wi souden te rechte alleen daerom teghen hen strijden.

17

Aldus Iudith siende Holofernem sittende in een costelic muggen nedt, welc geweuen was van purpur ende side, ende gout, ende smaragde, ende costeliken gesteente. Ende als si in zijn aensicht sach, aenbadt si hem, haer streckende op die aerde. Ende die knechten Holofernis hieuense op, wt het beuel haers heeren.