Den Bybel met groter neersticheyt ghecorrigeert (Liesveltbijbel 1542)

¶ Holofernes vraecht van haer, wt wat oorsake si wtgenomen si, ende als sijt hem vertrect, so beuielt hem wel

Dat .xi. Capittel

1

⁺DOen seyde haer Holofernes, Weest goets moets, ende en wilt niet versaget zijn in uwer herten, want ic en heb noyt man gescadet die den coninc Nabuchodonosor wilde dienen.

+ A vers 1

2

Waert dat v volc mi niet versmaet en had, ic en soude mijn glauie ouer hen niet opgeheuen hebben, Mer nv segt mi om wat saken sidi van hen gegaen? ende heeft v behaget tot ons te comen

3

Ende Iudith seide hem, Ontfanct die woorden dijnre dienstmaerten, want ist dat ghi die woorden uwer dienstmaecht volcht, God sal een geluckige sake met v doen

4

Want so waerlic Nabuchodonosor een heer des lants leeft, ende zijn cracht die in v is, tot een straffinge alre dwalender menschen, dat hem niet alleen die menscen en sullen dienen door v, mer ooc die beesten des ackers sullen hem te wille zijn.

5

Want die bequaemheit ws gemoets, wert allen lieden vercondicht, ende het is alle der werelt kenlic gemaect, dat ghi alleen goet ende machtich zijt in alle zijn rijck, ende v beleeftheyt wort allen landen vercondicht.

6

Noch dat en is niet verborgen, dat Achior gesproken heeft, noch dat en is niet onbekent dat ghi geheeten hebt hem toe te comen,

7

want het is kenlic dat onse God also mits den sonden vertoornt is, dat hi door zijn propheten beuolen heeft totten volcke, dat hijse ouer le-

[p. *]

uert haren vyanden, om haerder sonden wille.

8

Ende want die kinderen Israel weten dat si haren God vertoornt hebben, so is v vrese ouer hen.

9

Hier en bouen heeftse den honger beuaen, ende van gebrec des waters worden si nv onder die dooden ghetelt.

10

Voort ordineren si dit, dat si haer beesten doden, ende haer bloet drincken. Ende die heylige vaten des HEREN haers gods, die hen geboden heeft die niet aen te rueren, dese dinghen hebben si gedacht te hangen aen coren wijn ende olie, ende si willen die dingen verteeren, die si met handen ooc niet aen en souden rueren.

11

Hierom, want si dese dingen doen, so ist sekere dat si tot verderuinge sullen worden gegeuen.

Het welc ic v dienstmaecht bekennende, ben van hen geulucht, ⁺ ende die HERE heeft mi ghesonden,

+ C vers 11

12

v dese selue dingen te bootscappen, want ic v dienstmaecht, diene mijnen God ooc hier bi v, ende v dienstmaerte sal wt gaen, ende ic sal God aenbidden,

13

ende hi sal my seggen wanneer hi hen haer sonden sal vergelden,

14

ende ic sal comen, ende bootscappent v, also dat ic v te midden door Ierusalem sal leyden, ende ghi sult al dat volc Israel hebben als scapen die geenen herder en hebben, ende daer en sal niet een hont tegen v bassen,

15

want dese dingen sijn mi gheseyt door die voorsienicheyt Gods. Ende want God op hen gram is, so ben ic ghesonden, om v dese dingen te bootschappen.

16

Ende alle dese woorden behaechden Holoferni, ende sinen knapen. ⁺ Ende si verwonderden aen haer wijsheit ende deen seyde tot den anderen.

+ D vers 16

17

Daer en is sulcken wijf niet opter aerden, int aensien, in scoonheit, ende in verstandige woorden.

18

Ende Holofernes seide tot haer, God heeft wel ghedaen, die v voor dat volck heeft ghesonden, op dat ghi dat in onsen handen soudet gheuen.

19

Ende want v belofte goet is, ist dat mi v God dat doet, so sal hi mijn god ooc sijn, ende ghy sult groot in Nabuchodonosors huys sijn, ende uwen naem sal in alle dat lant ghenaemt worden.