Den Bybel met groter neersticheyt ghecorrigeert (Liesveltbijbel 1542)

Die hooftman Holofernes beueelt datmen Iudith in groter eeren ende weerden houden soude den geheelen leger dore, ende hi geeft haer vriheit om haer gebet te doen na haerder gewoonte dach ende nacht te gaen.

Dat .xij. Capittel

1

⁺DOen hiet hise in gaen, daer zijn scatten geset waren, ende hi hietse daer bliuen, ende hi bescicte, datmen haer van sijnder tafelen soude geuen.

+ A vers 1

2

Den welcken Iudith antwoorde ende sprac. Nv en mach ic niet eten vanden genen die mi gebiet te geuen, op dat ic minen God niet en vertoorne,

3

Mer ic sal van dien eten, dat ic met mi gebracht hebbe.

4

Holofernes seyde tot haer, Ist dat v dese dingen ghebreken, die ghi met v ghebracht hebt, wat sullen wi v dan doen?

5

Ende Iudit seyde. Mijn here v siel leeft dat v dienstmaerte alle dese dingen niet verdoen en sal, tot dat God dese dingen in mijn hant doe die ic gedacht hebbe

6

⁺Ende sine knechten leydense inder tenten, die hi geboden hadde. Ende doen si daer in ginc, begeerde si dat haer snachts orlof werde gegeuen wt te gaen voor den lichte buyten totten gebede, ende den HERE te bidden.

+ B vers 6

7

Ende hi geboot sinen camerlingen dat si drie daghen wt ende in souden gaen, om haren God te bidden, alsoot haer beliefde.

8

Ende snachts liep si wt totten dale Bethulie, ende wiesch haer inde water fonteyn. Ende als si opsteech badt si totten HERE den God Israels,

9

dat hy haren wech wilde stieren totter verlossinge sijns volcx. Ende ingaende bleef si reyn in haer tente tot dat si tsa-uonts haer spijse nam.

10

Ende het is geschiet inden vierden dach, Holofernes maecte een costelijcke auontmael sinen knechten, ende seyde tot Vagao sinen ghesneden camerlinc. Gaet ende beraet die Hebreinne, datse willichlick consentere, met mi te woonen,

11

Want het ware allen Assyriers een schande dat een vrouwe eenen man also bespottede, dat si ontschuldich van hem gae.

12

⁺Doen ginc Vagao in tot Iudith, ende seyde. Dye goede dochter en ontsie haer niet in te gaen tot mijnen here, op dat si gheeert worde voor zijn aensicht, ende ete met hem, ende drincke wijn in genoechte.

+ C vers 12

13

Den welcken Iudith antwoorde. Wie ben ic dat ic mijnen here wederseggen soude? Al dat voor sijn oogen goet ende dalder beste sal sijn dat sal ic doen.

14

Wat hem behaecht, dat sal mi dalder beste sijn, alle die dagen mijns leuens Ende si stont op, ende vercierde haer met haren cleede,

15

ende ingegaen sijnde stont si voor sijn aensicht. Ende Holofernes hert wert heel beroert, want hy bernde in haerder begheerlicheyt.

16

⁺Ende Holofernes seyde tot haer. Drinct nv ende sidt ter tafelen, ende weest vrolick, want ghi hebt ghenade voor mi geuonden.

+ D vers 16

17

Ende Iudith seyde, Mijn heere ick sal drincken, Want mijn siele is heden groot ghemaect voor al die daghen mijns leuens.

18

Ende si nam ende adt, ende dranc voor hem tgene dat haer maerte haer bereyt hadde.

19

Ende Holofernes wert vrolijc bi haer, ende hi dranc seer veel wijns, also vele als hi oyt te voren in sinen leuen ghedroncken hadde.

[afbeelding]