Den Bybel met groter neersticheyt ghecorrigeert (Liesveltbijbel 1542)

Hoe dat God lijdsamich is ouer die sondaren, mer dat hy die godlose verachters grouwelick straft, waer mede hi sijn volc leert, hoe si gerechtich ende vriendelic sijn sullen tegen den menschen

Dat .xij. Capittel.

1

⁺O HERE hoe goet ende soete is uwen geeste in allen dingen. Hierom so berispt ghi met maten, die ghene die dwalen ende ghi vermaentse, van welcken si sondighen, ende ghi spreecktse aen, op dat si haer quaetheyt souden laten, ende in v HERE geloouen,

+ A vers 1

2

want ghi die oude inwoonders ws heyligen lants vereysde, ⁺ want si deden wercken die v hatelic waren, te weten touernie,

+ Deut. ij. leue. xx

3

en waerseggers wercken oft afgoderie, ende waren dooders haerder kinderen, sonder ontfermherticheit

4

ende eters der menscen binnensten, ende bloetslinders,

5

ia om sulcken grouwelen ende ongeloofs, ende offeren,

6

so hebt ghi die vaders der verlatender sielen ghedoot, door die handen onser vaderen, op dat dat lant, dat ghi alderliefst hebt, een inwooninghe soude zijn der kinderen Gods.

7

⁺Maer desen hebt ghi ooc als menscen gespaert ende ghi seyndet voorgangers ws heyrs wespen, dat si die allenskens verdriuen souden

+ B vers 7

8

Niedt dat ghi onmachtich waert dye godlose, den rechtueerdighen te onderworpen inden crijch, oft met den wreeden beesten oft met eenen harden woorde tsamen wt te drijuen,

9

mer ghi hebtse allenskens wt willen drijuen, om dat ghi haer lieden tijt ende plaetse wildet geuen, tot beteringe, wel wetende, dattet een scalc volck was, ende hare quaetheyt natuerlic, ende want haer gedachte inder eewicheidt niet verandert en mocht worden. ⁺

+ Esa v.c.

10

Want het was een veruloect saet van beginne Noch nyemanden vreesende, gaeft ghi genade haerder sonden,

11

want wie sal v seggen, wat hebt ghi gedaen? of wye sal tegen v oordeel staen? of wie sal comen in v aenscouwen, een wreker der ongerechtiger menscen. Of wie salt v witen, ist dat die volcken vergaen, die ghi ghemaect hebt,

12

⁺Want daer en is geen ander God dan ghi, ⁺ die welcke sorge draecht voor alle dingen, op dat ghi thoonen sout, dat ghi dat vonnisse niet onrechtueerdelijc en oordeelt.

+ C vers 12

+ esa x

13

Noch coninck, noch tyranne, en sullen vraghen vanden genen die ghi verloren hebt.

14

Want ghi dan rechtueerdich zijt, so bescickt ghi alle dinghen rechtueerdelic, ende ghi straft oock dyen die niet sculdich en is gestraft te worden, ende ghi acht hem vreemt, ende een ballinc inden lande uwer cracht,

15

⁺Want v cracht is een begin der rechtueerdicheyt, ⁺ ende om dat ghi een HERE alre dingen zijt, so spaert ghi ooc alle dingen.

+ D vers 15

+ xxxiiij ioan. ix hebr. xij.

16

Ghi toont cracht die niet gelooft en wort, volmaect te zijn inder cracht, ende dese die v niet en weten, leueret ghi ouer in stoutheyt.

17

Mer ghi verheerder der cracht oordeelt met stillicheyt, ende ghi besckict ons met groter eerweerdicheit. Want ghi vermuecht alsoo ghi wilt.

18

⁺Ghi hebt volck voor sulcken wercken geleert, datmen rechtuerdich ende beleeft moet zijn, ende ghi maket v kinderen van goeder hopen. Want oordelende geeft ghi inden sonden plaetse des bewisens, des leetwesens

+ E vers 18

19

Ist dat ghi uwer knechten vianden, ende die der doot sculdich waren, met so groter beproeuingen gestraft hebbet ende verlost, geuende tijt ende plaetse, door welcken si verandert mochten worden van haerder quaetheit,

20

met hoe grote neersticheit oordeelt ghi v kinderen dan? der welcker ouders, ⁺ ghi eeden ende voorwaerden der goeder belooften ghegeuen hebt.

+ F vers 20

21

Hieromme, als ghi ons castiende onderwijst, so gheesselt ghi onse vyanden menichfuldelijcken, op dat wy v goetheyt sullen ghedencken,

22

als wi geoordeelt ende ghestraft worden, ende op uwe ontfermherticheyt mogen hopen. Waeromme, ghi den ghenen die in haren leuen ontsinnichlijcken, ende onrechtueerdelijcken leefden, ghaeft ghi die opperste straffinghe, door die dinghen dien si gedient hebben.

23

Want si doolden oock langhere inden weghe der dolinge, achtende die dinghen, dye ghene dye in die beesten zeer onnutte zijn, Goden te wesen,

[p. *]

leuende na die costuyme der ontsinniger kinderen,

24

Om dies wille hebt ghi hen dat oordeel ghegeuen, tot een bespottinge, als ontsinnige kinderen.

25

Mer die niet mits bespottingen, ende berispingen ghebetert en sijn, die hebben Gods weerdige ordeel onderuonden,

26

Want in dien dingen die si leden, verdroeghen sy onlijdtsamelijc, in welcken si onlijdtsaem sijnde, verbolgen waren. Door dese dingen, welcke si meynden goden te wesen in hem, als si verdoruen werden, siende dien welcken si voortijts loochenden te kennen, bekenden si den warachtighen God, Om dies wille sal ooc dat eynde haerder verdoemenissen ouer hen comen.