Den Bybel met groter neersticheyt ghecorrigeert (Liesveltbijbel 1542)

Hier beghint dat boeck Ecclesiasticus datmen noemen mach, die wise sproeken Iesu des soons Sirach.

Alle wijsheyt is van God, want die eenige Schepper alder dinghen, die alderhoochste, ende machtichste, is alleen wijsch, wat goets dat wt die vreese Gods comt

Dat .I. Capittel

1

⁺ALle wisheyt is van God den HERE, ⁺ ende si heeft altoos met hem geweest, ende is voor alle tijt.

+ A vers 1

+ Psal. cxviij. exo xxx Ephe. i.

2

Wye heeft dat sandt der zee, ende dye druppelen des reghens, ende dye dagen der tijt getelt. Wie heeft die hoocheyt des hemels, ende die breetheyt der aerden, ende diepte des afgronts gemeten?

3

Wye heeft die wijsheyt Goodts, die voor alle dingen gaet, ondersocht

4

Dye wijsheit is eer geschapen dan alle dingen, ende dat verstant der voorsichticheyt voor alle tijt

5

Gods woordt inden hoochsten is die fonteyne der wijsheyt, ende haren inganc sijn eewige gheboden,

6

Wien is die wortel der wijsheyt ontdect, ⁺ ende wie heeft haer behendicheyt bekent,

+ Rom. xi

7

Wien is die onderwisinge der wijsheit ontdect ende geopenbaert, ende wie heeft die vermenichfuldicheit haers ingancs verstaen.

8

Een is die hoochste scepper alre dingen almachtich, ⁺ ende een machtich coninc den welcken alle menschen te recht ontsien, sittende opter wijsheyt trone ende heerscappende God.

+ B vers 8

9

Hi sciep die, door den heyligen geest Hi heeftse gesien ende getelt, ende gemeten,

10

ende stortese wt ouer alle sine wercken, ende ouer alle vleesch, na zijn gaue, gheeft hise den genen die hem lief hebben.

11

Die vreese des HEREN, is glorie, ende glorieringe, ende blijschap, ende ghenoechte, ende een croone der verhueghingen.

12

Dye vreese des HEEREN salse verlustigen, ende sal blijscap ende ghenoechte in lancheit der dagen geuen,

13

den genen die den HERE vreesen, dyen sal wel sijn, al inden wtersten, ende hi sal inden dage zijnder doot ghebenedijt werden,

14

Den welcken si verschijnt inder openbaringen, die hebbense lief inden gemercken ende in die kennisse haerder groter daden,

15

⁺Die liefde Gods is eerlijcke wijsheyt.

+ C vers 15

16

Des HEREN vreese, is begin der wijsheyt ende si is metten gelouigen inder moeder lichaem mede gescapen, ⁺ ende si sal metten wtuercoren vrouwen gaen ende si sal metten rechtuerdigen ende gelouigen bekent werden

+ pro. vi.a .xix.

17

Die vreese des HEREN is geestelicheyt der kennissen

18

Die geestelicheyt sal genoecht ende bliscap geuen.

19

Den genen die den HEERE vreest salt wel vergaen, ende inde dagen sijnder vertroostinge, sal hi vertroost werden.

20

Volheyt der wijsheit is god vreesen, ende die volheit is van haren vruchten,

21

ende si sal alle zijn huys veruullen van geslachten, ⁺ ende die ontfanckelijcke vaten van haren scatten,

+ D vers 21

22

Die vreese des HEREN is die croone der wijsheyt, veruullende den vrede, ende die vruchte der salicheyt,

23

ende hi sachse ende teldese. Want het zijn beide gods gauen.

24

Die wijsheyt sal te deele behouden kennisse ende verstant der voorsienicheyt, ende si verhoocht die glorie der geenre diese hout.

25

Die wortel der wijsheyt is den HERE vreesen, ende haer tacken sijn lancliuich.

26

In die schatten der wijsheyt is verstandenisse ende gheestelicheyt der kennissen, mer die wijsheit is den sondaers een verfuwinge.

27

Dye vreese des HEEREN drijft die sonde wt,

28

want die sonder vreese is, die en mach niet rechtueerdich gemaect werden, want die gramschap sijnder stoutmoedicheyt, is sijn verderffenisse.

29

Die lijdtsamige sal verdraghen tot inder tijt, ende naemaels sal die wedergheuinge der vrolicheyt sijn,

30

Eenen goeden sin sal zijn woorden verbergen, tot inder tijt, ende veelder menscen lippen sullen sinen sin vertellen.

32

In die scatten der wijsheyt is die beteekeninge der onderwisinge. Mer gods dienst is den sondaer een verfuwinge

33

Sone, begeerende wijsheyt, bewaert die gerechticheit ende God salse v geuen,

34

want die vreese des HEREN is wijsheyt ende onderwisinge,

35

ende dat hem wel behagelijc is, dat is gelooue ende saechtmoedicheyt, ende sal sijn scatten veruullen,

36

⁺en zijt niet houerdelijc versmadende noch onghelouich des HEREN vreese, ende en gaet tot hem niet met dubbelder herten.

+ E vers 36

37

En zijt geen hipocrijt inder menschen aenscouwen ende en wert niet gescandalizeert in uwen lippen,

38

Aenmerct in dyen, dat ghi misschien niedt en valt, ende

[p. *]

dat ghi uwer sielen oneerlicheyt toe brenct,

39

ende God uwe verborgentheden ontdecte, ende dat hi v neder stoote int midden der gemeynten,

40

om dat ghi qualijc totten Here ginct, ende v hert is vol bedrochs ende valsheits