Den Bybel met groter neersticheyt ghecorrigeert (Liesveltbijbel 1542)

Een onderwijsinge ende leere der wijsheyt, op lijdsaemheidt ende die vreese Gods.

Dat .ij. Capittel.

1

⁺MIne sone ghaende totten dienste Gods, staet in gerechticheyt ende in vreesen, ende bereyt v siele tot aenuechtinge.

+ A vers 1

2

Druct v herte neder, ende lijdt, ende neiget v oore ende ontfanct woorden der verstandenissen, ende en haest niet inder tijt der ouerdeckinge.

3

Ghedoocht Gods onderhoudingen, wert God toegheuoecht, op dat v leuen int wterste wassen moet.

4

Allet dat v toeghescict wort, ontfanct, ende ghedoocht in smerte, ende hebt lijdsaemheyt in uwer vernederinge,

5

want inden viere wert gout ende siluer gheproeft, mer ontfanckelijcke menscen int ^a forneys der vernederinge,

a Forneys der vernederingen) dat is in eenen soperen, benauden armen staet ende leuen vol tribulatien psal xxx esa. xxx.

6

Gelooft Godt, ende hi sal v ontfanghen, ende richtet uwen wech, ende hoopt in hem. Houdt sine vreese ende verout daer inne.

7

Ghi die den HEERE vreest, ontbeyt zijn ontfermherticheyt, ende en wijct niet van hem, op dat ghi niet en valt.

8

Ghi die den HERE vreest, ghelooft in hem, ende v loon en sal niet ydel werden ghemaeckt.

9

Ghi die den HERE vreest, hoopt in hem, ende die ontfermherticheyt sal v tot verlustinge comen

10

Ghi die den HERE vreest hebt hem lief, ende v herten sullen verlicht werden.

11

⁺Kinderen bescouwet die natien der menscen ende wetet dat niemant beschaemt gheworden en is die inden HERE hoopte.

+ B vers 11

12

Ende wie heeft in sijnder vreesen gebleuen, ende is verlaten. Oft wie heeft hem aengeroepen, met betrouwen, dien hi versmade?

13

Want God is goedertieren, ende ontfermhertich ende inden daghe der tribulacien, vergeeft hi die sonden, ende hi is een bescermer alle den genen die hem inder waerheit soecken

14

Wee den genen die ^b dubbel van herten is, den sondigen lippen, ende den quaetdoenden handen, ende den sondaer die dat lant ingaet met tween wegen,

b dubbel van herten) dats die metten monde schoon spreckt, ende int herte denct ende heeft hi boosheit

15

Wee den ontbondenen van herten die Gode niet en geloouen, ende daerom en sullen si van hem niet beschermt werden

16

Wee den genen die de gedoochsaemheit verloren hebben,

17

ende die gerechte wegen verlaten hebben, ende sijn afgekeert in crommen wegen. Ende wat sullen si doen, als die HERE haerder versoecke.

18

⁺Die den HERE vreesen, die en sullen sinen woorde niet ongeloouich zijn, ende die hem liefhebben, sullen sijn woort onderhouden.

+ C vers 18

19

Die den HERE vreesen, sullen die dingen ondersoecken, die hem behaechlijc zijn, ende die hem liefhebben, sullen sijn wet volbrengen.

20

Die den HERE vreesen sullen haer herten bereyden, ende si sullen haer sielen in zijn aenscouwen verootmoedigen,

21

Die den HERE vreesen, bewaren zijn geboden si sullen lijdtsaemheyt hebben tot sinen aenschouwen seggende. Beter ist ons te vallen inden handen des Heeren dan inden handen der menschen,

22

wandt hoe wel hi hooch ende groot is, nochtans is hi zeer bermhertich,