Den Bybel met groter neersticheyt ghecorrigeert (Liesveltbijbel 1542)

¶ Vanden richteren ende ouerheeren des volcx, hoe datmen hoochmoedicheyt ende stouticheyt schouwen sal

Dat .x. Capittel

[p. *]

1

⁺EEn wijs richter sal sijn volc ordeelen, ende waer een verstandige regeert, daer gatet wel,

+ A vers 1

2

Nae den rechter des volcx zijn ooc die dienaers, ⁺ ende alsodanich als die regeerder der stadt is, alsodanich sijn ooc die inwoonders.

+ Esa. i.f. Iere. v c. nee. iiij. mat. iij g Eze. xv.

3

Een onwijs coninck verderft sijn volc, die steden sullen bewoont werden door die wijsheyt der voorsichtiger,

4

Die macht des lants is inder handt Gods, ende alle ongerechticheyt der heydenen is te verfuwen.

5

Der menschen macht is in Gods hant, ende ouer dat aensicht des scriuers sal hi sijn eer setten.

6

En ghedenct gheens onrechts dijns naesten, ende en doet niet in die wercken des onrechts.

7

Houeerdicheit is hatelic voor God ende die menschen, ende alle ongerechticheit der heydenen is verfuwelic

8

Dat rijc wert vanden eenen volc totten anderen ouer gheuoert, om die ongerechticheden, ende onrechten, ende smaden, ende om verscheyden bedroch.

9

Maer niet en is booser dan een gierige. ⁺ Wat verhoueerdicht ghi v, o aerde ende assche? ⁺ Geen dinc en is ongerechtiger dan ghelt beminnen, want dese heeft ooc sijn siele te coope, Want hi heeft sijn binnenste in sinen leuen verworpen. Alle haer machticheyt is cort leuen,

+ ie. xxvij

+ B vers 9

10

Een lange quale beswaert den medecijnmeester, Die medecijnmeester snijdt een corte quale af. Also is een coninck heden ooc, ende morghen sterft hy

11

Want als een mensche sal steruen, so sal hi serpenten ende beesten, ende wormen beeruen.

12

Dat begin der houeerdicheyt des menschen is afuallen van Gode, want sijn herte is wech ghegaen vanden ghenen die hem gemaect heeft,

13

want het begin alre sonden is houeerdicheit, diese houdt sal veruult werden met vloecken, ende hi sal hem auerecht keeren int eynde.

14

Daeromme heeft die HERE die vergaderinghen der quaden onteert, ende heeftse totten eynde toe bedoruen.

15

God heeft die stoelen der houeerdigher hertoghen bedoruen, ende hi heeft die saechtmoedige voor hem doen sitten,

16

⁺God heeft die wortelen der houeerdiger heydenen dorre ghemaect, ⁺ ende hi heeft die ootmoedighe wt dien seluen heydenen geplant,

+ C vers 16

+ Lu. xiiij Psal. vi.

17

God heeft die landen der heydenen omgekeert, ende heeftse vernielt totten fundamente toe.

18

Hi verdroogeder wt dien, ende hi vernieldese, ende dede haer gedenckenisse ophouden vander aerden,

19

God heeft der houeerdiger gedenckenisse verloren, ende hi heeft gelaten die gedenckenisse der ootmoediger van sinne,

20

Die houeerdicheyt en is den menschen niet ghescapen, noch die gramscap den kinderen der menschen, Der menschen zaedt dat God vreest sal gheeert werden,

21

Mer zaet dat des HEREN geboden voorbi gaet, dat sal onteert werden,

22

Int middel der broederen sal haer regeerder in eeren zijn, ende die den HEERE vreesen, sullen in sinen ooghen sijn.

23

Die glorie der rijcker gheeerder, ende der armer is Goods vreese.

24

En wilt den rechtuaerdighen armen mensch niet versmaden, ⁺ ende en wilt den rijcken man, die een sondaer is, niet groot maken.

+ D vers 24

25

Die rechtere is groot ende machtich in eeren, ende daer en is geen grooter, dan die God ontsiet,

26

Die vrije sullen den welgesinden knechte dienen, ende een voorsichtich ende een beleeft man, en sal niet murmureren als hi berispt is,

27

ende een onwetende, en sal niet gheeert werden, en wilt v niet verheffen in v werck te doen, ende en wilt niet twijfelen inder tijt der bangicheyt,

28

Hi is beter die arbeyt, ende oueruloeyt in allen, dan die glorieert, ende heeft broots ghebreck.

29

⁺Mijn kint, hout v siele in saechtmoedicheit, ende gheeft haer eere na haer verdiente,

+ E vers 29

30

Wie sal hem rechtueerdighen die tegen hem seluen sondicht?

31

ende wie sal dien eeren, die sijn eyghen leuen onteert?

32

die arme wort gheeert door sijn trouwe ende waerheit, maer die rijcke nae die rijcdommen.

33

Die hem in armoede eerlick houdt, hoe veel te meer sal hem die in rijcdommen eerlic houden?

34

Ende die hem in rijckdommen oneerlic houdt, hoe veel te meer sal hem die in armoede oneerlick houden.