Den Bybel met groter neersticheyt ghecorrigeert (Liesveltbijbel 1542)

¶ Met wat oordeele, ende welcken men die goetheydt sal bewijsen.

Dat .xij. Capittel

1

⁺ISt dat ghi wel doet, so weet wien dat ghijt doet, ende daer sal veel dancx in dinen goeden zijn,

+ A vers 1

2

Doet den gerechtigen wel, ende ghi sult een grote wedergeldinge vinden, ende en ist niet van hem, warachtelic so suldise vanden HERE ontfaen,

3

want hem en is niet wel die gestadich inden quaden is, ende geen aelmoesen en gheeft, want die alderhoochste hatet die sondaers, ende hi heeft ontfermt den ghenen dye wercken des berous bewijsen,

4

Geeft den ontfermhertighen ende en ontfanct den sondaer niet, ende hi sal den godlosen, ende den sondaers dye wrake betalen,

5

ende bewarense tot dien dage der wraken, Geeft den goeden, ende en ontfanct den sondaer niet, Doet den ootmoedigen wel, ende en gheeft den godlosen niet, Verbiet hem dat broot te gheuen, op dat hi in dien niet machtiger en si dan ghi,

6

want ghi sult dubbele quaden vinden, in allen den goeden die ghi hem doet,

7

want die alderhoochste haet die sondaers oock, ⁺ ende den godloosen sal hi wrake betalen.

+ B vers 7

8

Een vrient en sal niet bekent werden inden goeden dingen, ende een viant en sal inden quaden nyet verborgen werden,

9

In eens mans goeden, sijn sine vianden bekent

10

In sijn droefheyt ende in sijn ongeluc wert sijn vrient bekent.

11

En gelooft uwen viant niet inder eewicheit, want sijn scalcheyt verroest als yser,

12

ende ist dat hi verootmoedicht, cromp gaet, werpt uwen moet af, ende wacht v van hem.

13

Ghi en sult hem niet neffens v stellen, noch en laet hem niet sitten tot uwer rechterhant, op dat hi hem niet om en keere, ⁺ ende stae in v plaetse, op dat hi misschien uwen setel niet en soecke. Als hi omme ghekeert is in uwe plaetse, ende dat ghi inden wtersten mijn woorden bekent,

+ C vers 13

14

ende wert in mijnen redenen onderwesen, Bijnt niet te samen twee sonden, want daer en sal geen ongestraft bliuen, wie sal des toouenaers ontfermen, die van een serpent gesteken is, in allen die den beesten genaken. Also ooc die versellet is inden wech, met eenen ongerechtigen man, ende is bewonden in sine sonden,

15

Eenen tijt lanc sal hi met v blijuen, Maer ist dat ghi af neycht, hi en sal v niet verdraghen.

16

⁺Een viant is soet in sinen lippen, ende hi leyt lagen in sijn herte, op dat hi v omme soude werpen inden gracht.

+ D vers 16

17

Die viant screyt in sinen ooghen, ende ist dat hy tijt vint, hi en sal niet van bloede versaet werden.

18

Ende ist dat v quade dingen toeloopen, so sult ghi hem daer eerst vinden, ende als helpende, sal hi v solen onder doorgrauen.

19

Hi sal sijn hooft scudden, ende hi sal metter hant slaen van blijschappen, ende veel clappende sal hy die ghesteltenisse sijns aensichts veranderen.