Den Bybel met groter neersticheyt ghecorrigeert (Liesveltbijbel 1542)

¶ Hoe die armen haer voor die rijcken hoeden sullen, ende haer voor den gheweldighen bewaren.

Dat .xiij Capittel

1

⁺DIe dat peck raect, ⁺ hy salder af besmet worden, ende die ghemeynscap heeft metten houeerdighen, sal houeerdicheit aen doen.

+ A vers 1

+ de. vij.f. ij.cor vij

2

Hi neemt eenen last op hem, dye gemeynscap heeft met eenen eerlijcker dan hi, Ende en sijt geen geselle eens die rijcker is dan ghi,

3

wat sal den ketel ghemeynscap hebben totten pot, want als si tsamen stooten, sullen si ghebroken werden,

4

Die rijcke doet onrechtueerdelijc, ende sal grimmen,

5

mer die arme als hem gewelt ende onrecht ghesciet, so lijdt hi ghebreck ende bidt, ist dat ghi geeft, so sal hi v tot hem nemen,

6

ende ist dat ghi niet en hebt, so sal hi v verlaten, ist dat ghi hebt, so sal hi met v weerschappen, ende sal v wt teeren, ende hi en sal ouer v niet droeue sijn,

7

Ist dat ghi hem van noode te doen hebt, so sal hi v vertreden, ende heymelic spottende sal hi v hope gheuen,

8

vertellende v alle goede dingen, ende seggen.

9

Wat is v van noode? ende hi sal v bescamen in v spijse, tot dat hi v tweemael ende driemael wtsuypt, ende inden wtersten sal hi v bespotten,

10

daer na siende dat ghi niet en hebt, sal hi v verlaten, ende sijn hooft van v beweghen.

11

Wert Gode verootmoedicht, ende verwacht sijn handen, Aenmerct dat ghi niet verleyt en wert, ende in dijnre vruechden niet vernedert en werdt,

12

en wilt niet neder sijn in uwe wijsheit, ⁺ op dat ghi vernedert, niet in sotheyt verleyt en werdt, als ghy tot eenen machtighen gheroepen sijt, so gaet wech, want daer wt sal hi v te meer tot hem roepen.

+ B vers 12

13

En sijt niet quellic op dat ghi niet verstooten en wert, ende en zijt niet verre van hem, op dat ghi niet vergeten en wert.

14

En verhout niet wt geheelic met hem te spreken, noch en gelooft sine vele woorden niet,

15

Want hy sal v wt veel spraken tenteren,

16

ende heymelic lachende, sal hi v vragen van uwe verborgentheden.

17

Sijn ghemoet is wreet, ⁺ ende hi sal v woorden onthouden, ende hi en sal niet sparen van quaetheden ende van banden.

+ C vers 17

18

Wacht v ende aenmerct neerstelic uwer hooringe want ghi wandelt in vreese uwer omwerpinge, Mer die dingen hoorende, siet als in eenen droom, ende ghi sult waken,

19

Hebt God lief alle v leefdagen, ende aenroept hem tot uwer noot.

20

Alle dier heeft lief zijns gelijcke, also ooc alle mensce hebbe lief sinen naesten.

21

Alle vleesch sal tot zijns gelijc tsamen geuoecht worden, ende alle mensch sal versellet werden met zijns gelijcke, Gelijc den wolf gemeynscap sal hebben metten lam te eeniger tijt,

22

also sal die sondaer metten rechtueerdighen. Wat gemeynscap heeft die heylige mensche metten hondt, ⁺ oft wat goede deel sal die rijcke metten armen hebben.

+ psal. viij Iere. xi.

23

Des leeus roof is die wilde ezel inder woestijnen, also zijn die arme der rijcker spijse,

24

Ende gelijc die ootmoedige den houeerdigen een vereysinghe is, also is die arme ooc des rijcken verfuwinghe.

[p. *]

25

Als den rijcken een ongeluc aencoemt, so wert hi weder opgehouden van sinen vrienden. Maer als die arme valt, so wert hi ooc van sinen vrienden verlaten.

26

Een rijc man die bedrogen is, heeft veel verhaelders, Hi sprac houeerdige woorden, ende si rechtueerdichden hem,

27

Die ootmoedige is bedrogen, ende werdt hier en bouen ooc berispt, Hi sprac wijsselijc, ende hem en is geen plaetse gegeuen,

28

Die rijcke sprac, ende si swegen alle, ⁺ ende si sullen zijn woorden totten wolcken toe brengen,

+ D vers 28

29

Die arme sprac, ende si seggen. Wye is dese, Ende ist dat hi misdoet, soo sullen si hem bederuen,

30

Dat goet is goet den genen die geen sonde inder conscientien en heeft, ende die armoede is alder quaetste, inden monde des godlosens.

31

Des menscen herte verandert zijn aensicht, of int goede, oft int quade

32

Een vrolic aensicht bethoont een goet herte, want anders die ghedachten te kennen, is een swaer dinck.