Den Bybel met groter neersticheyt ghecorrigeert (Liesveltbijbel 1542)

¶ Hier begint een lof ende prijs der ouder vaderen, door welcken God sijn macht ende wijsheyt opter aerden bewesen heeft, dye welcke sijn Hanoch, Noe, Abraham, Isaac, Iacob.

Dat .xliiij. Capittel

1

⁺LAet ons die heerlike eerlike mannen louen, ende onse ouders in haren gheslachte

+ A vers 1

2

die HERE heeft veel heerlijcke eerlike wercken gewracht, sijn grootdadicheyt is van eewicheyt.

3

Sy waren mannen groot van crachten, ende verchiert met hare voorsichticheyt, heerscappende in haer mogentheden, Bootscappende inden propheten, die weerdicheit der prophetien, ende gebiedende den volcke in haerder tijt. ⁺

+ Ex. viij

4

Ende midts die crachte der voorsichticheyt, den lieden die alder heylichste woorden vercondigende. In hare kintsheit versoeckende die maten des sancx,

5

ende vertellende der scriftueren liedekens. Rijcke menschen inder cracht, neersticheit der scoonheit hebbende, vremakende in haren huysen.

6

Alle dese hebben glorie inden geslachte haers volcx vercregen, ende in haren dagen waren si in hooger famen.

7

⁺Die van dien geboren sijn, hebben den naem haerder hoger famen verloren, ende daer sijnder daer geen gedachtenis af en is, si sijn vergaen als die niet en waren, ende si sijn geworden als niet geboren, ende haer kinderen met hen.

+ B vers 7

8

Maer dese sijn die lieuelike mannen, der welcker gerechticheit nemmermeer vergheten en wert, maer bi haer nacomelingen sal si bliuen,

9

ende met haren sade blijft een goede erffenisse, ende dat saet haerder neuen dat blijft staende in dat verbont, Ende haerder kinderen saet blijft om harent wille tot inder eewicheyt. ⁺

+ Ge. v.c. heb. xi.d

10

Haer saet ende haer glorie en sal niet werden verlaten. ⁺ Haer lichamen sijn in vrede begrauen, ende haren name sal van geslachte tot gheslachte leuen.

+ Ge. vi.b heb. xi.a

11

Dye volcken moeten haer wijsheit vertellen, ende die gemeynte moet haren prijs bootscappen,

12

Hanoch behaechde Gode, ende is ouer geuoert int paradijs op dat hi den heydenen wijsheyt gheue.

13

Noach is een volmaeckte rechtueerdige geuonden, ende inder tijt der gramscappen, is hi die versoeninge gemaect.

14

Daerom is hi dat ouerblijfsel der aerden gemaect, als die diluuie gesciede,

15

Dat eewich verbont der werelt is bi hem geset op dat alle vleesch, midts der diluuien, ⁺ niet meer en soude moghen werden wtghedaen.

+ C vers 15

16

¶ Abraham een grootvader van veel volcx, ende sijns gelijcx en is niet geuonden inder heerlicheit?

17

De wet des alderhoochsten heeft hi onderhouden, ende was inden verbonde met hem.

18

In sijn vleesch dede hy dat verbont staen,

19

ende hi is ghetrou gheuonden inder versoeckinghen als hi gheproeft wert.

20

Daerom heeft hem God met eenen eedt gesworen, dat hi in sinen sade alle volcken soude salich maken,

21

⁺ende hem vermeerderen als dat stof der aerden, ende zijn saet verheffen,

+ D vers 21

22

gelijc die sterren des hemels dat sijn saet ooc dat lant soude besitten,

23

ende beeruen vander eender zee tot die ander, ende vanden vloet tot dat eynde der aerden.

24

Ende met Ysaac heeft hi dit verbont geuesticht, om Abraham sijns vaders wille.

25

Ia ooc die genadige gedachtenis, ende salicheit alre menschen, ende dat verbont heeft hy met Ysaac beuesticht, ende heuet op dat hooft Iacobs doen rusten, ⁺

+ ge. xvij. xviij

26

Ende daer in heeft hi hem bekent dat hi hem wel ende rijckelic begaeft heeft, ende heeft hem een erffenisse gegeuen, ende heeft sijn deel afgescheyden, ende in twaelf geslachten gedeylt.

27

Hi heeft wt hem barmhertige mannen behouden, die ghenade hebben gheuonden voor alle vleesch.