Den Bybel met groter neersticheyt ghecorrigeert (Liesveltbijbel 1542)

¶ Vanden handen te wasschen. Dat den menschen niet en besmet het ghene dat door sinen mondt in hem coemt. Hoe Ihesus dye dochter der vrouwen Siraphenisse vanden duyuel verloste. Hoe Ihesus byder zee van Galileen blinde ende crepelen genas. Hoe Ihesus met seuen brooden ende luttel visschen vier duysent menschen versade.

Dat .xv. Capittel

1

⁺† DOen quamen tot hem die scriftgeleerden ende pharizeen van Ierusalem, ⁺ seggende,

+ A vers 1

+ Marci. vij.b. exo. xx c deu. v.b

2

Waerom ouertreden v discipulen die insettinge der ouderen, want si en wasschen haer handen niet als si broot eten?

3

Hi antwoorde ende sprac tot hen, Waerom ouertreedt ghi dan Gods gebodt om uwer instellingen wille?

4

Want God heeft geboden Eert vader ende moeder, ende wie zijn vader oft moeder vloect sal die doot steruen, ende ghi segt,

5

Een yegelic soude segghen, tot vader oft moeder, Het is God gegeuen, dat v soude van mi te profijte comen,

6

ende daer af coemt, dat nyemant sinen vader oft moeder eert, ende alsoo hebt ghi dat ghebodt Gods te niete gemaect om uwe instellinghe.

7

O ypocriten, Esaias heeft v recht gepropheteert, seggende, ⁺

+ esa. xix.d

8

Dit volc genaket mi metten monde, ende eeren my metten lippen, mer haer herte is verre van mi,

9

⁺mer si dienen mi te vergheefs als si leeren alsodanige leere, die anders niet dan menschen geboden en sijn.

+ B vers 9

10

Ende hi riep dat volck tot hem, ende sprac, Hoort toe ende verstaet,

11

dat ten monde in gaet, en maect den mensche niet onreyn, Maer dat wt den monde gaet besmet den mensche.

12

Doen gingen zijn discipulen tot hem, ende spraken, Weet ghi ooc dat die pharizeen hen argerden doen si dat woort hoorden?

13

Iesus antwoorde ende sprac, Alle plantinge die mijn hemelsce vader niet geplant en heeft, sal wtgeworpen worden,

14

Laetse varen, si zijn blint, ende leiders der blinden. Mer als die een blinde den anderen leyt, so vallen si beide inden put.

15

Doen antwoorde Petrus ende sprac tot hem, ⁺ Bediet ons dese gelijckenis

+ Luc. xi.f

16

Ende Ihesus sprac tot hem. Sijt ghi dan ooc noch sonder verstant?

17

ende en verstaet ghi niet? dat al dat ten monde ingaet, dat gaet inden buyc, ende wert door den natuerliken ganc wtgeworpen,

18

mer wat ten monde wtgaet, dat coemt wt der herten, ende dat maect den mensce onrein,

19

want wter herten comen quade gedachten, dootslagen, ouerspelen, onsuuerheden, dieuerie, valsce getuygenisssen, lasteringen,

20

dit zijn die dingen die den menscen onsuuer maken, mer met ongewasscen handen te eten, en besmet den mensce niet. *

[afbeelding]

21

† Ende Iesus ginc wt van daer, ende is gheweken in dye landen Tyri ende Sydonis.

22

⁺Ende siet een Cananeetsce vrouwe ghinc wten seluen eynden, ende ghemoette hem, ende riepe hem na, ende sprac, Och HERE ghi sone Dauids ontfermt v mijnder, Mijn dochter heeft eenen bosen duuel

+ C vers 22

23

Ende Iesus en heeft haer niet een woort geantwoort Ende zijn discipulen sijn tot hem gegaen, ende baden, ende spraken, Verlaetse doch van v, want si roept ons na.

24

Mer hi antwoorde ende sprac, Ic en ben niet ghesonden dan alleen totten verloren scapen des huys van Israel.

25

Mer si quam, ende viel voor hem neder, ende sprac, Heere helpt mi,

26

Mer hi ant-

[p. *]

woorde, ende sprac. Het en is niet goet datmen den kinderen haer broot neme, ende worpent voor dye honden.

27

Ende si heeft gheantwoort. Dat is waer HERE, mer die hondekens eten vanden brocken, die van haerder Heeren tafel vallen.

28

Doen antwoorde Iesus, ende sprac tot haer. O vrouwe, groot is v gelooue, v gheschiede also ghi wilt. ⁺ Ende haer dochter wert gesont in die selue vre. *

+ D vers 28

29

Ende Iesus ghinc van daer voort, ende is gecomen bider zee van Galilea, ende clam op eenen berch, ende is daer geseten.

30

Ende tot hem quam veel volcx, ende brochten met haer lamme, blinde, stomme, crepelen, ende veel ander, ende werpense Iesu voor die voeten, ende Iesus heeftse ghenesen,

31

also dat die scharen haer verwonderden, doen si sagen dat dye stomme spraken, die crepelen gesont waren, die lamme ghinghen, die blinde sagen, ende presen God van Israel.

32

Ende Iesus riep sijn discipulen tot hem, ⁺ ende sprac? My iammert des volcx, want si nv wel drie dagen by mi ghebleuen sijn, ende en hebben niet te eten, ende ic en wilse niet hongerich van my laten gaen, op dat si nyet en versmachten onder weghen

+ Marci. viij.a

33

Doen seyden sijn discipulen tot hem. Van waer soude ons inder woestijnen so veel broots toecomen, dat wi so groten volc versaden souden?

34

Ende Iesus sprack tot haer. Hoe veel brooden hebt ghi? Ende si hebben gesproken. Seuen ende luttel vischkens.

35

Ende hi beual dat volc neder te sitten opter aerden,

36

ende nam dye seuen brooden ende vischkens, danckende, bracse, ende gafse sijnen discipulen, ende sijn discipulen gauense den volcke.

37

Ende si hebben alle ghegeten, ende sijn versaet gheworden. Ende si hebben wech genomen vanden brocken, seuen volle koruen.

38

Ende die daer gegeten hadden, waren vier dusent mannen, wtgenomen die vrouwen ende die kinderen.

39

Ende Iesus die schare achter gelaten hebbende, is in een schip gegaen, ende is ghecomen in die eynden Magdala.