Den Bybel met groter neersticheyt ghecorrigeert (Liesveltbijbel 1542)

¶ Van die leeringe der pharizeen hoe Ihesus sprack, dat hi sijn kercke tymmeren soude op dye belijdinghe des geloofs. Ende dat een yeghelijc sijn cruys draghen moet, dye Christum na volghen wille.

Dat .xvi. Capittel.

1

⁺† ENde die Phariseen sijn metten Saduceen tot Iesum ghecomen, ⁺ hem tempterende? Ende si baden hem dat hi haer een teeken wten hemel thoonen wilde.

+ A vers 1

+ Marci. viij.d Io. vi.d lu. viij b

2

Maer hi antwoorde ende sprac. Des auonts segt ghi Het sal claer ende schoon weder sijn, want den hemel is root.

3

ende des morghens so spreect ghi. Het sal huyden onweder sijn, ⁺ want den hemel is root ende doncker. O ypocriten, ghi cont die gedaente des hemels oordeelen, kont ghy dan ooc niet die teekenen deser tijt oordeelen?

+ Ioh. ij a Marci viij.a. luc. xij b

4

Dese quade ouerspelige generacie begeert een teeken, ende gheen teeken en sal haer gegeuen worden, dan dat teeken Ione des propheten. Ende hi verlietse, ende ghinc wech.

5

Ende doen sijn discipulen ouer waren gheuaren, so hadden si vergeten broot met hen te nemen.

6

Mer Iesus sprac tot haer. Siet toe, ende wacht v vanden deeseme der Pharizeen ende Saduceen.

7

Doen dachten si in haer seluen, seggende. Dat salt sijn, dat wy geen broot met ons ghenomen en hebben.

8

Doen dat Iesus bekende, heeft hi tot haer gesproken. Wat becommerdi v. O ghi cleyn van gelooue, dat ghi geen broot en hebt,

9

verstaez ghi noch niet? gedenct ghi ooc niet, van die vijf brooden daer vijf duysent menschen toe waren, ende hoe veel koruen dat ghi wech droecht?

10

ooc niet aen die seuen broden daer vijf dusent mannen toe waren, ende hoe veel koruen dat ghi wech droecht?

11

Hoe en verstaet ghi dan niet, dat ic v dat niet en segge van broode: ⁺ Wacht v vanden deeseme der Pharizeen, ende der Saduceen. *

+ Math. viij.c Io. vi.g leui. ix c Marci. viij.d.

12

Ende doen verstonden si dat hi niet gheseit en hadde te wachten vanden deeseme des broots, maer voor die leeringhe der Pharizeen ende Saduceen.

13

† Doen quam Iesus in die deelen vanden lande van Ce-sarien Philippi, ⁺ ende vraechde sijn discipulen ende sprack? Wien seggen die lieden te sine den sone des menschen Ende si spraken.

+ B vers 13

14

Dye sommige seggen, dat ghi sijt Ioannes Baptista, die ander dat ghi Helyas zijt, ende die ander Ieremias, oft een vanden Propheten

15

Ende Iesus sprac tot haer, wie segt ghi dan dat ick ben? Doen antwoorde Simon Petrus, Ende sprac.

16

Ghi zijt Cristus des leuenden Gods sone,

17

Iesus antwoorde ende sprac tot hem, Salich sidy Simon Ionas sone, want vleesch ende bloet dy dat niet gheopenbaert en heeft, mer mijn vader inden hemel,

18

Ende ic segge v ooc, ghi zijt Petrus, ende op desen steen sal ick tymmeren mijne kercke, Ende die poorten der hellen en sullen tegen hem geen macht hebben, ⁺

+ Marci. viii.d Luc. ix c

19

ende ick wil v gheuen die slotelen des hemelrijcx. Ende alle dat ghi binden sult opter aerden, sal ooc inden hemel gebonden sijn. Ende alle dat ghi ontbinden sult inder aerden, dat sal inden hemelen ontbonden sijn. *

20

Doen verboot hi zijn discipulen, dat zijt niemant segghen en souden, dat hi Iesus Christus was.

21

Van desen tijden voort so begost Iesus sinen discipulen te kennen te gheuen, dat hem van nooden was te gaen tot Ierusalem, ende vele liden vanden ouderen, ende vanden princen der priesteren ende vanden Scrijben, ende ghedoot werden, ende opten derden dach verrijsen.

22

Ende Petrus hem ter siden nemende, begost hem te berispen seggende. HERE, sijt doch v seluen ghenadich, niet en moet v dat geschieden.

23

Ende Iesus keerde hem om ende sprac tot Petrum, Gaet wech Sathanas, ghi sijt mi hinderlijck, want ghy en smaect niet dat Godlijc, mer dat menschelijc is.

24

Doen sprac Iesus tot sinen discipulen, ⁺ † Wilt mi yemant na volghen die versake hem seluen, ende neme op hem sijn cruys, ende volge mi na.

+ Marci. viij.c Luc. ix c Luce. xviij. g.

25

Want wie sijn leuen wil behouden dye salt verliesen, mer wie zijn leuen verliest, om mijnen wille, dye salt vinden

26

⁺Ende wat soudt baten eenen mensche, dat hi die geheele werelt ghewonne, als hy schade aen sijn siele lijdt, oft wat can een mensche gheuen, daer hi zijn siele weder mede sal moghen lossen?

+ C vers 26

27

Want het is toecomende dat die sone des menschen comen sal in die heerlicheit zijns vaders met sinen engelen Ende dan sal hi eenen yegelijcken loonen nae sine wercken

28

Voorwaer ic segge v, datter sommige hier staen, die den doot niet smaken en sullen, voor dat si den sone des menschen sien comen in zijn rijck. *