Den Bybel met groter neersticheyt ghecorrigeert (Liesveltbijbel 1542)

¶ Hoe Iesus opten berch van Thabor sinen discipulen hem vertoonde, ende dat Helyas nv ghecomen was, ende nyet ontfanghen was openbaerde hi, hoe hy een kint ghenas dat metter mane ghequelt wert. Hi leert dat een mostaert saet groot is, ende vanden penninck die in eens vischs mont gheuonden wert.

Dat .xvij. Capittel

[afbeelding]

1

⁺ENde na ses daghen nam Iesus met hem Peeter, Iacob ende Ioannes sinen broeder, ⁺ ende heeft dese besiden afgeleyt op eenen hoogen berch,

+ A vers 1

+ mar. ix a Lu. ix.d

2

ende hi is voor haer verclaert ende sijn aenschijn heeft gheblinct ghelijc die sonne, ende sijn cleederen sijn wit gheworden, als een

[p. *]

licht.

3

Ende siet, daer verthoonde hem Moyses ende Helias met hem sprekende,

4

Ende Peeter antwoorde ende sprac tot Iesum, HERE, het is ons hier goet te zijn, wildy laet ons hier maken drie tabernaculen, v eene, Moysi, eene ende Helie eene.

5

Ende hi noch sprekende, Siet, een lichtende wolcke heeft haer omschenen. Ende siet, wter wolcke quam een stemme, seggende, Dit is mijn beminde sone inden welcken ic een goet behagen hebbe, Hoort hem.

6

Doen dat die discipulen hoorden, so vielen si op haer aensicht, ende sijn seer veruaert gheworden.

7

Ende Iesus ghinck tot hen, ende heeftse gheraect, ende sprac, Staet op, ende en wilt niet vreesen.

8

Mer doen si haer ooghen ophieuen, saghen si nyemant dan Iesus alleen.

9

Ende doen si neder ghinghen vanden berghe, gheboot haer Iesus, seggende En segt nyemant dit visioen, ⁺ voor dat die sone des menschen vander doot opghestaen is. *

+ mar. ix a

10

⁺† Ende sijn discipulen hebben hem gheuraecht ende spraken, Waerom spreken dan die scriftgeleerden dat Helias eerst moet comen?

+ B vers 10

11

Ende Iesus antwoorde haer ende sprac Helyas sal ymmer door sine toecoemst alle dinghen in sinen rechte weder brenghen,

12

Ende ic segge v, dat Helias nv gecomen is, ende si en hebben hem niet bekent, mer hebben aen hem gedaen hat si ghewilt hebben, ende also sal ooc die sone des menschen lijden moeten van hen.

13

Doen verstonden die discipulen dat Iesus van Ioannes Baptista tot haer ghesproken hadde.

14

Ende doen si totter schare des volcx quamen, so ginc tot hem een mensche, ende boochde sijn knyen tegen hem, ende sprac:

15

HERE, ontfermt v ouer mijnen sone, want hi maensieck is, ende heeft een swaer lijden, want hi valt dicwils int vier, ende in dat water,

16

ende ic hebbe hem voor dijnen discipulen gebracht, ende si en consten hem niet ghenesen.

17

Iesus antwoorde ende sprack, O ghi ongeloouige ende verkeerde aert, ⁺ hoe lange sal ic bi v sijn? hoe lange sal ic v lijden? ⁺ Brenghet desen hier tot mi.

+ Lu. ix.f.

+ C vers 17

18

Ende Iesus heeft desen duyuel berispt, ende hi is wt hem gegaen, ende het kint wert gesont in die selue vre. *

19

Ende doen quamen zijn discipulen int heymelijc tot Iesum, ende spraken, Waerom en conden wi dien duuel niet wt driuen?

20

Iesus antwoorde, ende sprac, Om uwer ongeloouicheyt, want voorwaer segge ic v, hadt ghi gelooue gelijc een mostaertsaet, ende sout seggen tot desen berghe, gaet van hier, so sal hi wech gaen, ende v en sal nyet onmogelijc sijn.

21

Mer dese aert der duuelen en wordt niet wt ghedreuen dan door bidden ende vasten.

22

Ende doen si int lant van Galileen verkeerden, ⁺ so heeft Iesus tot haer gesproken: Het is toecomende dat die sone des menscen geleuert sal worden, in die handen der menschen, ende si sullen hem dooden, ende hi sal ten derden daghe verrijsen,

+ mar. ix c Lu. ix.f.

23

ende si sijn wter maten seer bedroeft geworden.

[afbeelding]

24

† Doen si nv tot Capernaum quamen, so sijn tot Petrum ghecomen die die chijns penningen ontfanghen, ende spraken, Plach v meester niet den chijns penninc te gheuen?

25

Peeter sprac, Ia hi. Ende doen hi int huys quam, so voor-quam hem Iesus, seggende, Symon wat dunct v: Van wien nemen die coninghen der aerden tol oft tchijns, van haer kinderen, oft vanden vreemden?

26

Ende Peeter sprack tot hem, vanden vreemden. Iesus heeft tot hem gheseyt, Daerom so zijn die kinderen vry,

27

maer om dat wi haer niet en argeren, so gaet totter zee, ende worpt daer in eenen angel, ende den eersten visch die op comt, dien neemt, ende als ghi sinen mont op doet, so sult ghi daer in vinden eenen penninc, dien sult ghi nemen ende geeften voor mi ende di