Den Bybel met groter neersticheyt ghecorrigeert (Liesveltbijbel 1542)

¶ Van die verrisenisse cristi, ende hoe Cristus hen daer na openbaerde, ende hoe die Ioden den wachters gelt gauen, dat si segghen souden dat die discipulen dat lichaem Cristi gestolen hadden, ende hoe Cristus beual alle menschen te doopen

Dat .xxviij. Capittel

[afbeelding]

1

⁺† INden auont vanden vierdage dye begost te schijnen opten eersten dach nae den Sabboth, ⁺ so is ghecomen Maria Magdalena, ende die ander Marien, om dat si dat graf Cristi sien souden.

+ A vers 1

+ mar. xvi a Io. xx.a luc. xiiij.

2

Ende siet, daer is een grote aertbeuinge gesciet. Ende die engel Gods is vanden hemel neder gedaelt, ende bi dat graf comende, so heeft hi den steen van de dore des graefs afgewentelt, ende hi ghinc op den steen sitten,

3

ende sijn aenscijn was gelijc blixem, ende zijn cleederen wit gelijc sneeu.

4

Ende door vreese ende veruaertheyt van desen Engel, sijn die wachters veruaert, ende als dode menschen gheworden.

5

Die engel sprac totten vrouwen Ghi vrouwen en vreset v niet, ic weet dat ghi Iesum die gecruyst is soect

6

⁺Hi en is hier niet, hi is verresen, gelijc hi geseyt heeft

+ B vers 6

7

Coemt hier ende siet die plaetse, daer die HERE geleyt was, gaet haestelic ende segt sinen discipulen, dat hi vander doot verresen is Ende siet, hi sal v voorgaen in Galileen, daer suldi hem sien.

8

Siet, ic heb v dit geseit *

Ende dese vrouwen gingen snellic vanden graue met vreesen, ende met groter bliscap, ende si liepen om dit den discipulen te bootscappen.

9

Ende als si gingen om zijn discipulen te bootschappen. Siet, doe quam Iesus haer te gemoete, seggende. God groet v, ende sijn tot hem ghegaen, ende hebben sijn voeten gehouden, ende vielen voor hem neder.

10

Doe sprac Iesus tot haer, En vreest niet, gaet henen ende bootscapt mijnen ^a broederen dat si gaen in Galileen, ende daer sullen si mi sien,

a Broeders, sijn al de gene dye in cristo gelouen. Marci xvi.d

11

ende doen dese vrouwen gingen, ⁺ siet so quamen somige vanden wachters inder stadt, ende vercondichden den hoogen priesteren, al dat si gesien hadden,

+ C vers 11

12

Ende si vergaderden metten ouders, ende hielden eenen raet, ende si gauen den crijchknechten gelts genoech ende spraken,

13

Segt dat sijn discipulen des nachts hem ghestolen hebben te wile dat wi sliepen.

14

Ende ist sake dat dit wt coemt voor den president, so sullen wi hem stillen, ende v daer af vry maken.

15

Ende si hebben dat gelt genomen ende deden als si geleert waren. Ende dit woort is verbreyt biden Ioden, tot huyden op desen dach.

16

† Die elf discipulen gingen in Galileen opten berch daer Iesus haer bescheyden hadde,

17

⁺Ende doem si hem sagen, so vielen si voor hem neder, maer de sommige van haer twifelden.

+ D vers 17

18

Ende Iesus ginc tot haer segghende, Mi is alle macht ghegeuen inden hemel ende inder aerden.

19

Hieromme gaet ende leert alle volc, haer lieden doopende inden naem des vaders, des soons, ende des heyligen geests. ⁺

+ marci. xvi,f

20

Leerende haer houden, al dat ic v beuolen hebbe, ende siet, ic ben bi v, alle die dagen totten eynde der werelt. *

Hier eyndt sinte Matheus Euangelie.