Den Bybel met groter neersticheyt ghecorrigeert (Liesveltbijbel 1542)

Hoe hi den gichtigen mensche gheboot sijn bedde te nemen op sinen hals, ende te wandelen. Ende hoe hi geboot Leui Alpheus sone hem te volgen, Ende hoe hem die Pharizeen berispten dat hy metten sondaers adt, ende dat hi niet gecomen en was om die stercken, mer om die crancken

Dat .ij. Capittel

1

⁺ENde hi ginc na acht daghen wederom tot Capernaum, ⁺ ende het wert openbaer, dat hi inden huyse was,

+ A vers 1

+ mat. ix.a

2

ende terstont vergaderden haer veel, also dat si gheen plaetse en hadden, ooc buyten voor die dore,

3

ende hy seyde hen dat woort, Ende daer quamen somige tot hem, die brochten eenen gichtigen, die van vier lieden gedragen wert,

4

ende doen si niet by hem comen en consten, om des volcx wille, so braken si dat dack op, daer hy was, ende lieten dat bedde neder dalen, ⁺ daer die gichtige in lach

+ ioan. v a

5

Doen Iesus haer gelooue aensach, seyde hy tot den gichtigen, Mijn sone, v sonden sijn v vergeuen.

6

Daer waren somige scriftgeleerden die daer saten, ende dachten in haer herten.

7

Hoe spreect dese sodanige gods lasteringe? Wie can die sonden vergeuen, dan alleen dye eenige God?

8

Ende Iesus kende terstont in sinen geest, dat si also dachten in haer seluen ende seyde tot haer, wat denct ghi sodanichs in v herten?

9

welc is lichter totten gichtigen te seggen, v sonden sijn v vergeuen, oft staet op, ende neemt v bedde ende wandelt?

10

Mer op dat ghi weet dat des menschen sone macht heeft, te vergeuen die sonden opter aerden, seyde hi totten gichtigen,

11

Ic segge v, staet op, ende neemt v bedde ende gaet in v huys.

12

Ende hi stont terstont op, ende nam sijn bedde ende ginc wech voor haer allen, also dat si haer al verwonderden,ende presen God ende seyden, Wi en hebben nyet diesghelijcx gesien.

13

† Ende hi ghinc weder wt totter zee, ende al tvolc quam tot hem, ende hi leerdese,

14

ende als Iesus voorbi ginc sach hi Leui den soon Alphei op den tol sitten, ende hi sprac tot hem,

15

Volcht mi na, Ende hi stont op ende volchde hem na, ⁺ Ende het gesciede doen hi aender tafelen sadt in sinen huyse, doe stelden hem veel tollenaren ende sondareu aender tafelen met Iesu ende sijn iongheren (want haer wasser veel die hem na volchden)

+ B vers 15

16

Ende die scriftgeleerden ende Pharizeen doe si sagen dat hy met den tollenaren ende sondaren adt, seyden si tot sinen iongeren, ⁺ Waerom eet ende drinct hi metten tollenaren ende sondaren?

+ mat. ix a luce. v d,

17

Doen dat Iesus hoorde seyde hi tot hen, Die gesonde en behoeuen niet den medecijn meester, mer die crancken, Ic en ben niet gecomen te roepen die rechuaerdigen, mer die sondaren tot penitencie. *

18

Ende die iongeren Ioannis, ende der pharizeen vasten veel, Ende daer quamen sommighe ende seyden tot hem, ⁺ Waerom vasten die iongeren Iohannis, ende der pharizeen, ende v iongeren en vasten niet? ⁺

+ C vers 18

+ luc. v,b, math. x,

19

Ende Iesus seyde tot hem, Hoe connen die kinderen der bruyloft vasten die wile dat de bruydegom bi haer is, also lange als die bruydegom bi haer is, so en connen si niet vasten

20

Mer den tijt sal comen, dat die bruydegom van haer ghenomen sal worden, dan sullen si vasten.

21

Nyemant en naeyt eenen lap van nyeuwen laken aen een out cleet, ⁺ want hi scoort anders den nyeuwen lap vanden ouden, ende die score wort arger,

+ mat. xij.a luc. vi,a.

22

Ende nyemant en giet den nyeuwen wijn in oude flesscen, want anders so schoort die nyeuwe wijn die flesschen, ende die wijn wort wtghestort, ende die flesschen vergaen, mer men sal den nyeuwen wijn gieten in nyeuwe flesschen.

[afbeelding]

23

⁺† Ende het geschiede doen hi wandelde opten Sabbath door dat gesaeyt lant, ende sijn iongeren begosten eenen wech daer door te maken, ende ayren af te plucken,

+ D vers 23

24

ende die Pharizeen seyden tot hem, Siet wat doen v iongeren, dat hen niet en betaemt op den Sabboth?

25

Ende hi seyde tot hen, Hebdi niet gelesen wat Dauid dede doen hem dat noot was, ende hem hongherde, ende die met hem waren?

26

hoe hi ghinc in dat huys Gods inden tijt Abiathar des hoogen priesters, ⁺ ende adt dat heylige broot, dat niet geoorloft en was te eten dan den priesters, ende hi gaft hem, ende den ghenen die by hem waren,

+ mat. xij.a luc. vi,a

27

Ende hi seyde tot hen, Die saboth is om des menschen wille gemaect, ende niet die mensce om des Sabboths wille.

28

Daerom so is des menschen sone oock een HEERE des Saboths.