Den Bybel met groter neersticheyt ghecorrigeert (Liesveltbijbel 1542)

Hoe Iesus wtwerp dat legioen der duyuelen vanden mensche ende hoe hi genas dat vrouken vanden bloetganc, ende hoe hi verwecte vander doot die dochter des ouersten meesters der Sinagogen

Dat .v. Capittel

[afbeelding]

1

⁺† ENde si quamen aen dander side der zee, tegen dat regioen der Gadarenen,

+ A vers 1

2

ende als hi wt den scheep tradt, liep hem terstont tegen wt den graue een beseten mensche met eenen onreynen gheest, dye sijn wooninge inden graue hadde, ⁺

+ mat. viij d luc. viij.c

3

Ende nyemant en conste hem binden, ooc niet met ketenen,

4

want hi was dicwil met veteren ende ketenen ghebonden geweest, ende hi hadde die ketenen gebroken, ende de veteren in stucken gewreuen, ende nyemant en conste hem temmen,

5

Ende hi was altijt beyde dach ende nacht, op die bergen ende inden grauen roepende, ende sloech hem seluen met steenen.

6

Maer doen hi Ihesum sach van verre, liep hi toe ende viel voor hem neder, ende riep luyde, ende seyde

7

Wat heb ic met v te doen? O Iesu ghi sone des alderhoochsten Gods, ic besweere v bi Gode dat ghy mi niet en quelt?

8

Maer hy seyde doe tot hem. Vaert wt vanden mensche ghi onreyn geest, Ende vraechde hem, Hoe heet ghi?

9

Ende hi antwoorde ende seyde. Legion heet ic, want onser isser vele.

10

Ende hi badt hem seer dat hijs wt den seluen regione niet drijuen en soude.

11

⁺Ende aenden seluen berch was een grote schare verckenen in die weyde, ⁺

+ B vers 11

+ mat. viij a luc. viij.c

12

ende alle die duuelen baden hem ende seyden. Laet ons in die verckenen varen,

13

Ende terstont oorloofde Iesus hen dat, Doen voeren de onreyne gheesten wt, ende voeren in de verckenen, Ende die cudde der verckenen is gheworpen terstont met eenen storm in die zee,

14

Ende daer wasser by twee duysent, ende si verdroncken in die zee, Ende die herders vloden, ende vercondichden dat inder stadt, ende opten lande Ende si gingen wt om te sien wat daer gheschiet was,

15

ende quamen tot Iesum, ende sagen den besetenen, welcke den duyuel gehadt had, dat hi sadt ende was gecleet, ende verstandich, ende si vreesden,

16

Ende die dat gesien hadden, verteldent den anderen, wat den besetenen ghebuert was, ende vanden verckenen,

17

ende si begonsten hem te bidden dat hi wt haren palen woude gaen,

18

Ende doen hi in dat schip tradt, ⁺ badt hem die beseten geweest hadde, dat hi mochte bi hem sijn,

+ mat. ix.c

19

Ende Iesus en liet hem dat niet toe, maer hi seyde tot hem, Gaet henen in v huys, ende totten uwen, ende vercondicht hen hoe groote weldaet dat v die HERE gedaen heeft ende hi uwer ontfermt heeft,

20

Ende hi ginc wt, ende begost wt te roepen in die thien steden, hoe grote weldaet hem Iesus gedaen hadde, ende een yegelic verwonderde hem. *

21

⁺Ende doen Ihesus weder van daer ouer voer in dat scip, ⁺ vergaderde veel volcx tot hem, ende was bi de zee,

+ C vers 21

+ luc. viij.f mat. ix.c

22

ende siet, daer quam een vanden ouersten vander scolen, genaem Iayrus, ende doen hi hem sach, viel hi hem te voete,

23

ende badt hem seer, ende sprac, Mijn dochter leyt in haer wterste, wilt doch comen ende v hant op haer leggen, op dat si gesont werde, ende leue,

24

Ende hi ginc met hem, ende het volchde hem veel volcx na, ende si drongen hem.

25

Ende daer was een vrouwe die had den bloetganc gehadt twaelf iaer, ⁺

+ mat. ix.e

26

ende hadde veel geleden vanden medecinen, ende had al haer goet daerom verteert, ende ten halp haer niet, mer het wert met haer erger.

27

Doen si hoorde van Iesu, quam si onder dat volc van achter aen ende roerde sijn cleet aen,

28

ende seyde, Mach ick alleen sijn cleet aenroeren, so sal ic gesont sijn,

29

Ende terstont verdroochde dien loop haers bloets, ende si voelde dat aen haer lichaem, dat si was gesont geworden van dier plagen

30

Ende Iesus voelende terstont aen hem seluen die cracht, welcke van hem was wtgegaen, keerde hem om totten volcke ende seide, wie heeft mijn cleeder aengeroert? ⁺

+ luc. vij.g

31

ende de iongeren seiden tot hem, ghi siet dat v dat volc dringet, ende ghi segt wie heeft mi aengeroert,

32

ende hi sach om na haer dye dat gedaen had.

33

Die vrou vreesde haer ende beefde, want si wist wat aen haer gesciet was, ende quam ende viel voor hem neder, ende seide hem die geheele waerheyt,

34

doen seide hi tot haer, mijn dochter, v geloue heeft v gezont gemaect.

[p. *]

Gaet met vreden, ende weest gesont van uwen plagen.

35

⁺Ende doe hi noch sprac, so quamen somige dienaers vanden ouersten der scolen, ende spraken. V dochter is gestoruen, wat queldi voorder den meester?

+ D vers 35

36

Iesus hoorde terstont die redene die daer gesproken was, ende seide tot den ouersten der scolen, Wilt niet vreesen, mer gelooft alleene,

37

Ende hi en liet hem nyemant na volgen dan Petrum ende Iacobum ende Iohannem den broeder Iacobi,

38

ende hi quam in dat huys des ouersten der scolen, ende sach dat geruchte, ende die daer seer weenden, ende huylden,

39

ende hi ginc daer in, ende seide tot haerlieden, wat gebeerdi ende weent ghi? Dat meysken en is niet gestoruen, mer het slaept,

40

Ende si begecten hem, Ende hi dreefse alle wt, ende nam met hem den vader des kints, ende die moeder, ende die bi hem waren, ende ghinc daer binnen daer dat meysken lach,

41

ende hi nam dat meysken bider hant ende seyde tot haer. Tabitha cumi, dat is so veel geseyt, Meysken ic segge v, staet op,

42

Ende terstont is dat meysken opgestaen, ende wandelde, ende si was twalef iaer out, ende si verwonderden hen bouen maten,

43

Ende hy verboot hen hertelijcken, dat nyemant dat weten en soude, ende hi seyde, dat si haer te eten souden geuen.