Den Bybel met groter neersticheyt ghecorrigeert (Liesveltbijbel 1542)

Hoe Christus geboren vanden Engelen vercondicht, opten achsten dach besneden, daer na te Hierusalem gebracht, van Symon ontfangen, ende door Anna die Prophetisse, vanden kinde ghepropheteert. Ende hoe dat kint twaelf iaer out inden tempel in dat midden vanden doctoren gheuonden wert.

Dat .ij. Capittel

1

⁺ENde het gesciede in dien tijden, dat een gebot vanden keyser Augusto wtginc, op dat al die werelt gescat soude worden,

+ A vers 1

2

Ende dese schattinge was die alder eerste, ende gesciede ter tijt doen Cyrenius rechter was in Syrien,

3

Ende si gingen alle, ende lieten haer scatten, een yegelic in sijn stadt,

4

Ende Ioseph ginc ooc op van Galileen wter stadt Nazareth in dat Iootsche lant, tot der stadt Dauid, die Bethleem hiet,

5

om dat hi was vanden huyse ende geslachte Dauids, om dat hi hem soude laten schatten met Maria sinen getrouden wijue, die doen beurucht was.

6

Ende het gesciede, als si daer waren, quam de tijt datse baren soude,

7

Ende si baerde haren eersten sone, ende want hem in doecken, ende leyde hem in een cribbe, want si en hadden anders geen plaetse inder herberge.

[afbeelding]

8

⁺Ende daer waren herders inden seluen lande op dat velt bi dat vee, ende hoeden des nachts haer cudde.

+ B vers 8

9

Ende siet die engel des HEREN quam tot hen, ende die claerheyt Gods omsceense, ende si vreesden seere.

10

Ende die enghel seyde tot haer, En vreest niet, Siet, ic vercondige v een grote blijscap, die sijn sal allen volcke,

11

want v is huyden geboren die behouder, die welcke is Cristus de HERE inder stadt Dauid. Ende dit sal v een teeken zijn

12

Ghi sult dat kint vinden, gewonden in doecken, ende in een cribbe liggende.

13

Ende terstont was daer byden Engel die menichte der hemelscer scharen, dye loofden God, ende seyden,

14

Lof si God inden oppersten, ende op der aerden ^a vrede, ende den menschen eenen goeden wille. *

a Vrede is hier die vergiffenisse der zonden. ephe. ij.c

15

⁺Ende het gesciede, als de engelen van haer ten hemel voeren † spraken die herders onderlinge ende seyden, Laet ons nv gaen tot Bethleem, ende sien dye gesciedenisse die daer geschiet is, die ons dye HERE te kennen gegeuen heeft.

+ C vers 15

16

Ende si quamen haestelic ende vonden beyde Maria ende Ioseph, ende dat kint geleyt inder cribben

17

Ende doen si dat gesien hadden, breyden si dat woort wt, dwelcke tot hen geseyt was vanden kinde,

18

Ende al dye dat hoorden, verwonderden hen van dien, dat geseit was tot haer vanden herders,

19

Mer Maria behielt al dese woorden dragende in haer herte.

20

Ende die herders keerden wederom, prijsende ende louende God, om al dat si gesien ende gehoort hadden also geseyt was tot haer *

[afbeelding]

21

† Ende doen die acht dagen om waren, op dat dat kint besneden soude worden, so is sinen naemt genoemt Iesus, ⁺ welcke genoemt was vanden Engel eer hi ontfangen wort in sijns moeders lichaem. *

+ D vers 21

22

† Ende doen die dagen haerder reyninge na de wet Moysi veruult waren, so quamen si ende brochten Iesum tot Hierusalem, op dat si hem offeren souden den HERE also gescreuen staet in die wet des HEREN,

23

Want alle knechtkens, die ten eersten die moeder baert, ⁺ sal Gode geheylicht heeten,

+ exod. xxiiij.d,

24

ende datse geuen den offer, alst geseyt is in die wet des HEREN, Een paer tortel duyuen, oft twee ionge duyuen.

25

Ende siet, een mensce was in Hierusalem die hiet Symeon, Ende dese mensche was gerecht, ende Godturuchtich, ende wachte op den troost Israel, ende die heylige geest was in hem,

26

Ende hem was een antwoorde gegheuen vanden heyligen geest, dat hi niet en soude sien die doot, voor dat hi sage Christum den HERE,

27

Ende hi quam wt bewegen vanden heyligen geest inden tempel, ⁺ Ende doen die ouders dat kint Iesum brochten inden tempel, om te doen voor hem, nae die costume der wet,

+ E vers 27

28

nam hi dat kint in sijne armen, ende gebenedide God ende seyde,

29

HERE nv laet uwen knecht, nae uwen woorden in vreden,

30

Want mijn oogen hebben gesien dijn salichmakinge

31

Die ghi bereyt hebt voor alle menscen,

32

Dat licht tot verlichtinge der Heydenen, ende tot een prijs dijns volcx Israel. *

33

⁺† Ende sijn vader ende moeder waren haer verwonderende van het gene, dat van hem geseyt wert.

+ F vers 33

34

Ende Symeon gebenedidese ende sprac tot Mariam sijnre moeder, Siet dese wert geset tot eenen val ende opstaen veelre in Israhel, ende tot een teeken dien wedersproken sal worden,

35

ende een ^a sweert sal door v siele dringen, op dat die gedachten van veel herten openbaer werden

a sweert dat is benautheit des herten

36

Ende daer was een prophetersse Anna Phanuels

[p. *]

dochter, vanden geslachte Asser, Dese was wel bedaecht, ende si hadde geleeft met haren man seuen iaer van haren maechdom,

37

Ende dese was een weduwe by lxxxiiij. iaren, die nemmermeer en quam vanden tempel dienende Gode met vasten ende met beden nacht ende dach,

38

Die quam ooc tot dier vren, ende loofde den HERE, ende sprac van hem tot alle den genen, die verbeydende waren die verlossinge Israels.

39

Ende als sijt al volbracht hadden na die wet des HEREN, keerden si weder in Galileen tot haerder stat Nazareth

40

Ende dat kint wies, ende wert sterc inden geest vol alder wijsheyt, ende die gracie Gods was in hem. *

[afbeelding]

41

Ende sijn ouders gingen alle iaer in Ierusalem opter feesten van Paesscen

42

† Ende doen Iesus .xij. iaer out was gingen si op te Ierusalem, na die gewoonte der feesten,

43

ende die dagen volbracht sijnde, gingen si wederom thuys ende dat kint Iesus bleef te Ierusalem, ende sijn ouders en wistens niet

44

⁺Mer si meynden dat hi was int geselscap, ende quamen een dachreyse, ende sochten hem onder dye vrienden ende bekenden.

+ G vers 44

45

Ende als si hem niet en vonden, so sijnse weder gekeert in Ierusalem, hem soeckende.

46

Ende het is geschiet na drie dagen, vonden si hem inden tempel, sittende midden onder den leeraren, hoorende ende vragende,

47

ende si verwonderden alle die hem hoorden ouer sijn verstant ende sijnre antwoorden.

48

Ende als si hem sagen, verwonderden si hen, Ende sijn moeder seyde tot hem, Mijn sone, waerom hebt ghi ons dat gedaen? Siet, v vader ende ic hebben v droeflijcken gesocht.

49

Ende hi seide tot haer, Wat is dat, dat ghi mi hebt gesocht? En weet ghi niet dat ic sijn moet in die dingen die mijns vaders sijn?

50

Ende si en verstonden dat woort niet dat hi tot hen sprac.

51

Ende hi ginc af met haer, ende quam tot Nazareth, ende hi was haer onderdanich, Ende sijn moeder behielt al dese woorden in haer hert.

52

Ende Iesus wies op in wijsheden, ende in oudtheden, ende in gracien voor Gode ende den menschen.