Den Bybel met groter neersticheyt ghecorrigeert (Liesveltbijbel 1542)

¶ Hoe Ihesus inder bruyloft van water wijn maecte, ende dye coopers ende vercoopers wt den tempel sloech, ende veel menschen aen hem gheloofden.

Dat .ij. Capittel.

[afbeelding]

1

⁺† ENde op den derden dach wert een bruloft tot Cana in Galilea ghehouden, ende dye moeder Iesu was daer.

+ A vers 1

2

Iesus ende zijn discipulen worden oock totter weerscappen genoot,

3

Ende doent haer aenden wijn gebrac, so seyde dye moeder Ihesu tot hem. Si en hebben geenen wijn.

4

Ihesus seyde tot haer, vrouwe wat leydt my aen v? Mijn vre en is noch nyet ghecomen,

5

Sijn moeder seyde totten dienaren. Wat hy v seyt, dat doet.

6

Daer waren ses steenen watercruycken gheset na dye wijse der Ioodtscher reyninghen, ende in yeghelijcke gingen twee oft drie maten.

7

⁺Ihesus seyde tot haer lieden, Vult die watercruycken met water, Ende si vuldense tot bouen toe,

+ B vers 7

8

Ende hy seyde tot haer. Vultse ende draechtse den spijsmeester, ende si droeghende.

9

Als dye spijsmeester den wijn smaecte die water gheweest was, ende en wist nyedt van waer hy quam, mer dye dienaers wistent, dye dat water gheput hadden, soo riep dye spijsmeester den brudegom, ende seyde tot hem.

10

Alle man gheeft den goeden wijn ten eersten, ende wanneer si droncken gheworden sijn, als dan den snootsten, Mer ghy hebt den goeden wijn tot noch toe ghehouden.

11

⁺Dat is dat eerste teeken dat Ihesus dede, gheschiet tot Cana in Galilea, ende openbaerde zijn heerlicheydt, ende sijn discipulen gheloofden in hem. *

+ C vers 11

12

Daer na reysde hy af tot Capernaum, hy sijn moeder, zijn broeders, ende zijn discipulen, ende en bleuen niet langhe daer.

13

⁺† Ende der Ioden paesschen was bi, ende Ihesus reysde op te Hierusalem,

+ D vers 13

14

ende hi vant inden tempel sitten die daer ossen, scapen ende duuen te coope hadden, ende wisselaers, ⁺

+ Psalm lxviij

15

Ende hi maecte een geessel van coordekens, ende iaechdese alle wten tempel met den schapen ende ossen, ende stiet den wijsselaers dat ghelt ende die tafel omme.

16

Ende seyde totten ghenen die dye duuen vercochten. Draecht dat van hier, ende en maect mijns vaders huys niet tot een coophuys,

17

Sijn discipulen dachten daer op, ⁺ datter ghescreuen staet, Die grammighe liefde ws huys heeft mi ghegeten.

+ Matth. xxvi.b.

18

Doen antwoorden die Ioden ende seyden. Wat teeken toondi ons, dat ghi dat doen moecht?

19

Iesus antwoorde ende seide tot haer. Breect dezen tempel, ende op den derden dach wil ic dien weder oprechten.

20

Doen seyden die Ioden. Dezen tempel is in .xlvi. iaren opgetimmert, ende wilt ghi dien in drie dagen oprechten?

21

Mer hi seyde vanden tempel zijns lichaems

22

Daerom doen hy opgestaen was vander doot, dachten zijn discipulen daer op dat hi dit geseit hadde, ende geloofden der scriftueren, ende die redene die Iesus geseyt hadde.

23

Als hi dan tot Ierusalem was te paesscen op die feest, so geloofder vele aen hem, siende die teekenen die hi dede,

24

mer Iesus en betroude hem seluen haerlieden niet, want hi kendese alle,

25

ende hi en behoefde niet dat yemant getugenis gaue vanden mensce, want hi wist wel wat inden mensche was. *