Den Bybel met groter neersticheyt ghecorrigeert (Liesveltbijbel 1542)

[p. *]

[afbeelding]
Hier beghint dat werck der Apostelen oft die ghesciedenisse des Euangelijs van Sinte Lucas.

¶ Christus gheboot sinen discipulen dat si nyet neder clymmen en souden van Ierusalem, Ende van die hemeluaert Christi, Ende die electie Mathie in die plaetse van Iudas.

Dat eerste Capittel.

1

⁺DAt eerste sermoon (tis waer) heb ic gedaen, o lieue Theophile, van alle dyen dat Ihesus beghonst beyde te doen ende te leeren,

+ A vers 1

2

totten dach toe, dat hi opghenomen wert, nae dien hi den Apostelen (die welcke hi hadde wtuercoren) door den heyligen geest beuel dede,

3

den welcken hi na sinen lijden, hem seluen leuendich vertoont heeft door menigherley vertooninge, ende liet hem sien veertich dagen lanc, ende sprac met haer vanden rijcke Gods,

4

ende als hise vergadert hadde, beual hi haer dat si niet van Ierusalem en souden gaen, mer dat si die belofte des vaders souden verwachten, die welcke ghi ghehoort hebt (seyde hi) van mi, ⁺

+ Luce. xxiiij.d

5

Want Ioannes heeft met water ghedoopt mer ghy sult metten heyligen gheest ghedoopt werden niet langhe na desen daghen.

6

Doen si nv te samen gecomen waren, vraechden si hem segghende. HERE suldy in desen tijt dat rijc van Israel weder oprechten?

7

Hi seyde tot haer. Het en behoort v niet te weten die tijden oft daghen, die welcke die vadere in sijnder macht behouden heeft,

8

mer ghi sult die cracht des heyligen gheests ontfaen, die op v comen sal, ende ghi sult mijne ghetuyghen sijn, tot Iherusalem, ende in gheheel Iudea ende Samaria, ende totten eynde der aerden.

9

Ende doen hi dit gheseyt hadde, is hi opghenomen dat sijt saghen, ⁺ ende een wolcke nam hem op van haren ooghen,

+ B vers 9

10

ende als si hem nae saghen ten hemel varende Siet doen stonden neffens haer twee mannen in witte cleederen,

11

dye welcke ons seyden. Ghi mannen van Galileen, wat staet ghy, ende siet op inden hemel? Dese Ihesus die van v is ghenomen ten hemel, die sal comen ghelijck ghy hem ten hemel hebt sien varen. *

12

Doen keerden si wederom tot Ierusalem, vanden berch, die daer heet den Olijfberch, dye welcke by Iherusalem is, ende heeft een Sabbaths reyse,

13

ende als si in waren gegaen, clommen si opten solder, daer hen doen onthielden Petrus ende Iacobus, Ioannes ende Andreas, Philippus ende Thomas Bartholomeus ende Mattheus, Iacobus Alphei soon, ende Symon Zelotes, ende Iudas Iacobi soon,

14

Alle dese volherden eenmoedelijck met bidden ende smeecken tsamen metten vrouwen, ende Maria die moeder Iesu, ende sinen broederen.

15

⁺† Ende in dyen daghen ghinck Petrus midden onder die discipulen, ende seyde, dye schare der namen was by hondert ende twintich tsamen.

+ C vers 15

16

Ghy mannen lieue broeders, dese scriftuere moest veruult werden, die welcke die heylighe gheest te voren gheseyt heeft door den mont Dauid, ⁺ van Iudas, die een voorganger der gheenre was, die Iesum vinghen,

+ Matth. xxvij.a

17

want hi was met ons ghetelt, ende heeft vercreghen den aenual des ambachts.

18

Dese hadde (tis waer) den ackere beseten om dat loon der ongherechticheyt, ⁺ ende heeft hem verhanghen, ende is midden in tween gheborsten ende heeft sijn inghewant wtghestort,

+ D vers 18

19

ende het is condt gheworden alle die te Hierusalem woonen, also dat den seluen ackere op haer sprake ghenoemt wordt Akeldama, ⁺ dat is eenen bloetacker.

+ Psalm. cviij

20

Want het staet ghescreuen inder Psalmen boeck Haer wooninge moet woest worden, ende daer en si nyemant die daer in woone, ende een andere ontfanghe sijn bisdom.

21

Soo moet dat onder den mannen dye met ons vergadert gheweest sijn, den gheheelen tijt in welcken Iesus onder ons is wt ende inghegaen,

22

beginnende vanden doopsele Iohannis, tot opten dach doen hi van ons ghenomen is, een wt desen een ghetuyghe sijnder verrijsenisse met ons werden.

23

Ende si steldender twee, Ioseph ghenaemt Barsabas metten toename Iustus, ende Matthiam, biddende ende seggende.

24

HERE, kender alder herten, vertoont welcken ghi wt desen tween vercoren hebt, dat deene ontfanghe den aenual des diensts ende Apostel ambachts, daer Iudas af getreden is, op dat hy soude wech gaen in sijn plaetse,

25

ende si ghauen dat lodt onder haer, ende dat lodt viel op Matthiam, ende hi werdt gheoordineert totten elf Apostelen.