Den Bybel met groter neersticheyt ghecorrigeert (Liesveltbijbel 1542)

¶ Hoe Petrus ghenas den cruepele, ende leerde die Ioden, die glorificatie ende die verrijsinghe Christi.

Dat .iij. Capittel.

1

⁺PEtrus ende Ioannes gingen met malcanderen op inden tempel, omtrent dye negende vre der biddinge.

+ A vers 1

2

Ende een man dye cruepel was wt sijnder moeder lichaem, wert ghedragen dagelicx voor die poorte des tempels, die daer hiet die scoone, op dat hi aelmoesen soude bidden vanden ghenen dye inden tempele ginghen.

3

Doen hi nv Petrum ende Iohannem sach, dat si inden tempel wouden gaen, soo badt hy, op dat hi een aelmoesse soude ontfanghen.

4

Petrus sach hem met Iohannem aen, ende seyden, Siet ons aen,

5

mer hy hielt hem teghen haer, hopende yet van haer te ontfanghen.

6

Maer Petrus seyde, ick en heb siluer noch gout, mer dat ic hebbe, dat gheue ic v, inden name Iesu van Nazareth, staet op ende wandelt,

7

ende nam hem bider rechter handt ende rechte hem op. Terstont worden sijn beenen ende knokelen vast,

8

hi spranck op, hi stondt ende wandelde, ende ghinc met haer inden tempel, wandelende ende springende ende God louende.

9

⁺Ende alle tvolc sach hem wandelen, ende God louen,

+ B vers 9

10

si kenden hem ooc dat hi die ghene was, die om die ael-

[p. *]

moesen voor die scone dore des tempels geseten hadde, ende si worden vol verwonderens ende verscrickens om tgene dat hem gesciet was

11

Maer als dese lamme nv gesont sijnde, hem tot Petrum ende Iohannem hielt, so liep alle dat volc tot haer, int portael, dat daer heet Salomons portael, verwonderende haer.

12

Als Petrus dat sach, antwoorde hi den volcke, Ghi mannen van Israhel, wat verwondert ghy v daer af? ⁺ of wat siet ghi op ons, als oft wi desen wandelende hadden gemaect, door onse eygen cracht ende verdienste?

+ C vers 12

13

† Die God Abrahams, Isaacs, ende Iacobs die God onser vaderen, heeft sijn kint Iesum verclaert den welcken ghi geleuert ende verloochent hebt voor dat aensicht Pilati, doen hem die selue ordelde los te laten,

14

mer ghi verlochende den heyligen ende gerechtigen, ende baet hem om den moordenaer v te geuen,

15

mer den hertoge des leuens hebdi gedoot, dyen heeft God verwect vanden dooden daer af sijn wi getuigen.

16

Ende door tghelooue sijns naems heeft hi aen desen dyen ghi siet ende kent, sinen naem vast gemaect, ende tgelooue door hem heeft desen voor uwen oogen dese gesontheyt gegeuen

17

Nv lyeue broeders, ic weet dat ghijt door onwetenheyt gedaen hebt, ⁺ gelijc ooc uwe ouerste.

+ D vers 17

18

Mer God die door den mont alre sijnre Propheten te voren vercondicht heeft, ⁺ dat sine Christus liden soude, dye heuet also veruult,

+ mar. i.a. ec xvij.c ma. iiij.c

19

So doet nv boete ende bekeert v op dat uwe sonden wt ghedaen werden. *

20

Op dat als den tijt der veruerssinge vanden aensicht des HEREN sal comen, ende ghi die hem sien sult, die nv te voren ghepredict is Iesum Cristum,

21

die welcke den hemel moet in nemen totter tijt toe dat weder gebracht werde al dat God gesproken heeft door den mont van alle sijn Propheten, van begin der werelt

22

Want Moses heeft totten vaderen geseyt. ⁺ God v HERE sal v eenen Propheet verwecken wt uwen broederen, dien suldi hooren als mi, ende in allen dat hi tot v seggen sal,

+ Deu xviij.c.

23

ende het sal geschien, so wat siele dien. Prophete niet en hoort, die sal vernielt werden

24

Ende alle Propheten van Samuel aen, ende daer na hoe vele haerder gesproken hebben, die hebben van desen dagen vercondicht

25

Ghi sijt der Propheten ende des testaments kinderen dwelc God bestelt heeft tot uwen vaderen seggende tot Abraham. ⁺

+ ge. xij.c.

26

Door v saet sal alle volc opter aerden gebenedijt werden.

27

God heeft eerst sijn kint Iesum verwect, ende heeft hem tot v gesonden v te benedijen op dat hem een yegelijc van sijnder boosheyt bekeere.