Den Bybel met groter neersticheyt ghecorrigeert (Liesveltbijbel 1542)

¶ Die Apostel vermaent Thimotheum te spreken om vele valsche predikers die grote dingen begost hadden ende vermaent Thimotheum tot stercheyt

Dat .iij. Capittel

1

⁺GHi sult dat weten, dat inden laetsten dagen sullen periculose tijden wesen.

+ A vers 1

2

Want daer sullen menscen wesen die van hen seluen groot houden sullen, ghierich, houerdich lasters, haren ouders onghehoorsaem, ondanckbaer, met grooten sonden beulect,

3

niet vriendelijc, stuerich, scheynders, oncuysch, niet saechtmoedich,

4

wilt, verraders, geweltdaders, opgeblasen, die meer lief hebben die wellust dan God, ⁺

+ ij.Pet. iij.a

5

die daer hebben dat wesen der goddienstiger wandelinge, maer sijn cracht versaken si,

6

ende van sulcken afkeert v. Vanden seluen sijnt, die die huysen doorloopen, ende leyden die vroukens geuangen, die met sonden beladen sijn, ende gheleyt wer-den in menigerley begeerten,

7

altijt leeren si, ende en comen nemmermeer totter kennisse der waerheyt

8

Mer als Iohannes ende Iambres Moysi wederstonden, ⁺ also wederstaen dese ooc der waerheyt, het zijn menscen van ghebroken sinnen, onbequaem totten gheloue,

+ B vers 8

9

mer si en sullens niet wtuoeren. Want haer sotheyt sal allen menscen openbaer werden, alst ooc was vanden voorseyden.

10

Mer ghi hebt na geuolcht mijn leere, mijn wesen, mijn opset, mijn gelooue, mijn lancmoedicheyt, ⁺ mijn liefde, mijn lijdtsaemheit,

+ C vers 10

11

mijn veruolginghen, mijn lijden, die mi al gesciet sijn tot Antiochia, tot Iconicon, tot Listren, welcke veruolginge ic daer droech. Ende wt allen heeft mi die HERE verlost.

12

Ende alle die godlic willen leuen in Christo Iesu, die moeten veruolginge lijden.

13

Die quade menschen ende die verleyders, die nemen toe int archste, si verleyden, ende laten haer verleyden.

14

⁺Mer blijft ghi int gene dat ghi geleert hebt, ende beuonden, want ghi weet van wien dat ghijt geleert hebt,

+ D vers 14

15

ende want ghi van kints op die heylige scriftuere weet, die v connen onderwijsen totter salicheydt door dat ghelooue in Cristo Iesu.

16

Want alle schrift van God ingegeuen, is orbaerlic te leeren, tot straffinge, ter beteringe, tot onderwijsinge inder rechtueerdicheyt,

17

dat een mensce Gods si volcomen, gheschict tot allen goeden wercken.