Den Bybel met groter neersticheyt ghecorrigeert (Liesveltbijbel 1542)

¶ Hier wert verthoont dat Christus Moysen te bouen gaet, wien wi ghehoorsaem sijn sullen.

Dat .iij. Capittel

1

⁺DAerom ghi heylige broeders, ghi die deelachtich sijt, des hemelschen roeps, neemt waer des Apostels ende hooghen priesters onser belidinge Iesum cristum, *

+ A vers 1

2

die daer getrou is, den ghenen die hem gemaect heeft (gelijc Moyses) in alle sinen huyse.

3

Mer desen is groter prijs waerdich dan Moyses, na dien dat hi een groter eer aent huys heeft, diet huys bereyt oft getimmert heeft, dan die dat besidt,

4

want een yegelic huys wort van yemant bereyt oft getimmert, Mer dien diet al bereyt oft gescapen heeft, dat is God,

5

Ende het is waer, Moyses was ghetrou in al sijn huys, als een knecht, tot eene ghetuygenisse des geens, dat geseyt soude werden,

6

Maer Cristus als een sone in sinen huyse, ⁺ wiens huys wi sijn, ist dat wi anders die vrymoedicheyt ende den roem des hoops tot aent eynde vast behouden. *

+ B vers 6

7

Daerom so die heylige gheest seyt, Ist dat ghi heden sijn stemme hoort, so en verhert niet uwe herten,

8

gelijc als in die verbitteringe inden dage der temptacien inder woestinen,

9

daer mi v vaderen tempteerden, si proefden ende sagen mijne wercken veertich iaer lanc,

10

⁺waerom ick tonureden was ouer dat geslachte, ende seyde. Alle tijt dolen si metter herten, Mer si en wisten mijne wegen niet,

+ C vers 10

11

also dat ic ooc swoer in mijne gramscap, dat si niet tot mijnder rusten en souden comen.

12

† Siet toe lieue broeders, dat tot gheender tijt in yemant onder v een arch herte des ongeloofs en si dat daer af trede vanden leuenden God,

13

mer vermaent v alle dage, also lange alst heden heet, ⁺ op dat nyemant van v versteent en wert, door bedroch der sonden.

+ D vers 13

14

Want wi sijn Cristus deelachtich geworden, ist dat wi anders dat begin sijns wesens tot aent eynde vast behouden, *

15

also lange alst geseyt wort, ist dat ghi heden sijn stemme hoort, so en verhart v herten niet, also inder verbitteringe geschiede,

16

Want sommige diese hoorden verbitterden haer, mer niet alle die van Egipten wtgingen door Moysen,

17

Mer op welcke was hi veertich iaer gestoort? En ist niet also, die daer sondichden, der welcker lichamen in die woestijne veruielen?

18

Mer welcken verswoer hi, dat si niet tot sijnder rusten comen en souden, dan den ongeloouighen?

19

Ende wi sien dat wi daer nyet en hebben connen in gecomen om des ongheloofs wille.