Den Bybel met groter neersticheyt ghecorrigeert (Liesveltbijbel 1542)

Hier beghint die Epistel van Iudas Thadeus.

Die Apostel Iudas maect sterck die gheloouighe die die ketters wederstaen, ende haer bedriechlicheyt, ende met figurale scriftueren, oft natuerale ghelijckenissen, ende sterct dye gheloouige in die warachticheyt.

Dat eerste Capittel

1

⁺IVdas een dienaer Iesu Christi, ende een broeder Iacobi, den geroepenen, die welcke geheylicht sijn in God den vader, ende behouden in Iesu Cristo.

+ A vers 1

2

V si vele ontfermherticheyt, ende vrede ende liefde.

3

Ghi beminde alle neersticheit doende te scrijuen van v gemeyn salicheit, so is mi van noode geweest te scrijuen, vermanende ende biddende v neerstelic, dat ghi daer door strijdt int gelooue, dat eens ghegeuen is, den heylighen,

4

want daer sijn sommige menschen beneuen in ghecomen, van welcken voortijden ghescreuen is, tot alsulcken ordeel, dese sijn ongodlijc, ende trecken die ghenade Gods tot weeldicheyt, ende verloochenen God, dat hi alleen die HERE si, ende den HERE Iesum Christum.

5

† Ic wil v vermanen, op dat ghi eens weet, dat God heeft verlost sijn volc wten lande van Egipten, ⁺ Ten anderen male bracht te nyete, alle die niet en gheloofden,

+ B vers 5

6

Ooc die engelen, die niet en hebben behouden haer heerlicheit, mer hebben verlaten haer huys, die heeft hy ghehouden totten oordeele des groten daechs, met eewigen banden onder die donckerheyt,

7

ghelijc ooc als Zodoma ende Gomorra, ende die bisteden die in ghelijcker manieren als dese ghehoereert hebben, ende nae eenen anderen vleesch gegaen sijn, ende sijn tot eenen exempel gesedt, ende dragen die pijne des eewigen vuers,

8

Desgelijcx dye droomers die dat vleesch besmetten, ende versmaden die heerschappie, ende blasphemeren die maiesteyt.

9

Doen Michael die eertsengel, kijuende tegen den duuel, hem daer mede besprac vanden lichaem Mosi, en dorste hi hem dat ordeel der blasphemien niet aendoen, ⁺ mer hi seyde, God straf v,

+ C vers 9

10

Mer dese, dat si niet en weten, dat lachteren si, mer dat si natuerlic bekennen, recht als die stomme beesten, daer in verdreuen si hen.

11

Wee haer lieden, want si Cayms wech gegaen sijn, ende sijn wtgegaen om dat bedriegelic ghewin, in die dolinghe van Balaam, ende sijn vergaen inden oploop Kore.

12

⁺Dese selue sijn uwer liefden tot smetten, ende sijn dye onreynicheit, ende brassen wel sonder sorge, ende weyden haer seluen, ^a wolcken sonder watere die vanden winde gedreuen worden, kaluwe onuruchtbaer boomen, twee mael verstoruen ende wtgheroeyt,

+ D vers 12

a Door dese wolcke verstaet die Apostel alle raden dye sonder dat woordt Gods geschien

13

wilde baren der zee, wt schuymende haer eygen schande, dolende sterren, den welcken die tormenten der donckerheit der duysternissen ghehouden sijn inder eewicheyt. *

14

Van desen heeft Enoch die seuende van Adam ghepropheteert, seggende, Siet, die HERE is met veel duysent heiligen ghecomen,

15

oordeel te houden tegen alle man, ende te straffen alle haer ongodlijcke, van allen den wercken haerder ongodlijcker wandelinge, daer mede si ongodlijc geweest sijn, ende van allen hardtheden die die ongodlike sondaers ghesproken hebben teghen hem.

16

Dese sijn murmureerders, die vol clagen sijn, die na haren lusten wandelen, ende haren mont spreect opgeblasen woorden, ⁺ ende houden haer na den aensien om des profijts wille,

+ E vers 16

17

Mer ghy mijn alderliefste, sult gedencken dier woorden die voor ghesproken sijn vanden Apostelen ons HEREN Iesu Christi, die v seyden,

18

dat inden laetsten tijden souden comen bespotters, wandelende in haren boosheden, na haren begeerten.

19

Dese sijnt die secten maken, sinlike, die gheenen gheest en hebben.

20

Maer ghi mijn alderliefste, hersticht v seluen in onsen alderheylichsten gelooue, ⁺ door den heylighen geest, ende biddet

+ F vers 20

21

ende behoudt v seluen inder liefden Gods, verwachtende die ontfermherticheit des HEREN Iesu Christi, int eewich leuen,

22

onderscheyt dese, ende hebt ontfermherticheyt op hem, mer die ghene maect salich met vreesen,

23

ende trectse wt den viere, ende haet den beulecten rock, die vleesschelijc is.

24

Mer dien die v can behouden sonder aenstoot, ende stellen voor dat aensicht sijnder glorien, onstraffelic met blijscappen,

25

dien God die alleen wijs is onsen salichmaker, si prijs ende maiesteyt ende rijck ende macht, nv ende tot alle eewicheyt Amen.

¶ Hier na volcht die openbaringhe Ioannis.