Den Bybel met groter neersticheyt ghecorrigeert (Liesveltbijbel 1542)

¶ Hoe Ioannes informeert der kercken van Ephesien, ende der kercken van Smyrnensen, ende van Pergamensen ende der kercken Thyathyrensem, ende donderscheydt tusschen goedt ende quaet.

Dat .ij. Capittel

[p. *]

1

⁺ENde scrijft den Engel der vergaderinghen van Epheso, dit seyt die ghene die de seuen sterren in sijn rechterhant hout, die daer midden ouer die gouden candelaers wandelt,

+ A vers 1

2

ic weet v werken ende uwen arbeyt, ende v verduldicheit, ende dat ghi die quade niet gelijden en condt, ende hebtse ondersocht, die seggen dat si Apostelen sijn, ende en sijns niet,

3

ende hebtse loghenachtich gheuonden, ende hebt vertoeft, ende hebt lijdtsaemheit gehadt, ende ghi hebt om mijns naems wille gearbeyt ende en sijt niet moede geworden,

4

Mer ic heb tegen v dat ghi die eerste liefde ghelaten hebt,

5

daerom gedenct waer af ghi geuallen sijt, ⁺ ende doet boete, ende doet die eerste wercken, Ist dat niet, so sal ic v haestelic comen, ende uwen candelaer bewegen van sijnder plaetsen, het en si dat ghi penitentie doet,

+ B vers 5

6

Mer dat hebdi, dat ghi de wercken der Nicolaiten hatet, welcke ic ooc hate,

7

Wie oooren heeft die hoore wat die gheest der vergaderingen seyt. Den verwinnenden dien wil ic vanden houte des leuens te eten gheuen, die daer midden inden paradijse Gods is.

8

⁺Ende scrijft den Enghel der kercken van Smyrne, dit seyt die eerste ende die laetste, de doot heeft geweest ende leeft.

+ C vers 8

9

Ic weet v wercken, ende v tribulatie, ende v armoede, mer ghi sijt rijc, ende die lachteringe der geenre die daer seggen, si sijn Ioden, ende en sijns nyet, mer sijn des duyuels schole.

10

En vreest dier geen die ghi lijden sult, Siet, die Duuel sal sommige van v lieden in dye kercker werpen, op dat ghi gheproeft soudt worden, ende sult thien dagen tribulatie hebben, Sijt getrouwe totter doot, ende ick sal v die croone des leuens gheuen.

11

Wye ooren heeft, die hoore wat die geest der kercken seyt, Wie verwint dien en sal gheen leedt gheschieden vander ander doot.

12

⁺Ende scrijft den Engel der kercken van Pergamo, Dat seyt die ghene dye daer dat scerpe tweesnijdige sweert heeft.

+ D vers 12

13

Ic weet uwe wercken, ende waer ghi wonet, dat daer des duuels stoel is, ende hout minen name, ende en hebt mijn gelooue niet verloochent. Ende in mijnen dagen Antipas mijne getrouwe ghetuyge die bi v gedoot is, daer die duuel woont,

14

Mer ic heb weynich teghen v, dat ghi daer hebt die de leeringhe Balaam houden, die welcke door Balac een arghernisse maecte voor die kinderen van Israel te eten der afgoden offer, ende oncuysheit bedriuen,

15

⁺Also hebdi ooc die daer die leeringe der Nicolaiten houden, dat hate ick.

+ E vers 15

16

Doet boete, mer ist des niet, so sal ic haest comen ende vechten tegen haer lieden metten sweerde mijns monts,

17

Wye ooren heeft die hoore wat die geest der vergaderingen seyt, Wie verwint, dien wil ic teten gheuen vanden verborgenen hemelschen broode, ende ic wil hem eenen witten steen gheuen, ende op den steen eenen nyeuwen name ghescreuen, welcke niemant en kent, dan diet ontfanct.

18

Ende scrijft der kercken van Thyatira, Dit seyt dye sone Gods, die ooghen heeft als die vier vlammen, ende sine voeten, gelijc als metael.

19

⁺Ic weet uwe wercken, ende uwe liefde, ende uwen dienst, ende v gelooue, ende uwe verduldicheit, ende uwe laetste wercken meer dan de eerste,

+ F vers 19

20

Mer ic hebbe luttel tegen v, dat ghi dat wijf Iesabel (die daer seyt, dat si is een prophetersse) laet leeren ende verleyden mijn knechten, oncuysheyt bedriuen, ende der afgoden offer te eten,

21

ende ic heb haer tijt gegeuen, dat si hare oncuysheit soude beteren, ende si en wilse niet beteren,

22

Siet, ic werpse in een bedde, ende die met haer ouerspel bedriuen die sullen in groter tribulatien sijn, het en si dat si van haren wercken beteren,

23

ende haer kinderen sal ick metter doot dooden, ende alle vergaderingen sullen beken-nen, dat ic ben die die nyeren ende herten ondersoecke, ende sal eenen yegelijcken van v, na uwe wercken gheuen,

24

Mer ic seg v, ende den anderen die tot Thyatire sijn, die sulcken leeringhe niet en hebben, ⁺ ende die diepheden des Duuels niet bekent en hebben (so si seggen) ick en wil gheenen anderen last op v worpen. ⁺

+ G vers 24

+ Iere xvij

25

Nochtans hout het ghene dat ghi hebt tot dat ic come,

26

ende die daer verwint ende hout mijn wercken totten eynde toe, dien sal ic macht gheuen ouer die Heydenen,

27

ende hi salse regeren met een yseren roede, ende hi salse breken als een potbackers vat, so ic van mijnen vader ontfanghen hebbe, ende wil hem die morgensterren gheuen,

28

Wye ooren heeft, die hoore wat die gheest der kercken seyt.