Den Bybel met groter neersticheyt ghecorrigeert (Liesveltbijbel 1542)

¶ Hoe Ioannes die dore des hemels open sach, ende eenen stoel ghesedt, om welcken noch waren vierentwintich sidtsteden, ende met vier dieren die God glorie gauen dach ende nacht.

Dat .iiij. Capittel

¶ Die tweede Figuere.

[afbeelding]

1

⁺DAer na sach ic, ende siet, daer wert een duere inden hemel op ghedaen, ende die eerste stemme die ic gehoort hadde met mi spreken, als een basuyne dye seyde, Climt herwaerts op, ic wil v vertoonen wat na desen gheschien sal,

+ A vers 1

2

ende terstont was ic inden geest, ende siet, daer was eenen stoel inden hemel ghesedt, ende op dien stoel sadt eene,

3

ende die daer op sadt, was ghelijc aen te sien, als die steen Iaspis ende Sardis, ende op den stoel was eenen regenboge, gelijc als een Smaragde,

4

ende om den stoel waren .xxiiij. stoelen, ende op die stoelen saten .xxiiij. ouders met witten cleederen ghecleet, ⁺ ende hadden op haer hoofden gouden croonen

+ B vers 4

5

Ende vanden stoele gingen voort, blixem, donderen ende stemmen ende seuen toortsen, met vier vlammen voor den stoele, welcke die seuen geesten Gods sijn,

6

ende voor den stoel was een glasen zee, gelijc den Cristal, ende midden inden stoel ende om den stoel vier dieren, vol oogen voor ende achter,

7

ende dat eerste dier was gelijc eenen leeuwe, ⁺ ende dat ander dier gelijc eenen kalue, ende dat derde dier hadde een aensicht als een mensche, ende dat vierde dier gelijc en vliegende Aren,

+ C vers 7

8

ende dye vier dieren hadden een yegelijc ses vloghelen, ende buyten rontomme ende binnen waren si vol oogen, ende en hadden gheen ruste dach ende nacht, segghende, Heylich, heylich, heylich is God die almachtighe HERE die daer was, ende dye daer is, ende die daer comen sal. ⁺

+ Esa. vi.b

9

⁺Ende doen die dieren prijs ende eere, ende danc gauen den genen die daer opten stoel sadt, die daer leeft van eewicheit tot eewicheyt,

+ D vers 9

10

vielen die vierentwintich ouders voor dien die opten stoel sadt, ende baden dien aen, die daer leeft van eewicheit tot eewicheyt, ende worpen haer croonen voor den stoel,

11

seggende, HEERE ghi sijt waerdich prijs ende eere, ende cracht te ontfanghen, want ghi hebt alle dingen gheschapen, ende om uwen wille hebben si dat wesen, ende sijn ghescapen. *