Den Bybel met groter neersticheyt ghecorrigeert (Liesveltbijbel 1542)

¶ Hoe datter een stilte was inden hemel int thoonen des seuensten seghels, ende hoe die enghel veel wieroocx ontfinck, ende daer gheschieden groote donderslaghen ende stemmen, ende die seuen enghelen bereyden hem om te singhen.

Dat .viij. Capittel

¶ Die seuende Figuere

1

⁺ENde doent den seuenden segel opgedaen hadde, so gesciede een stilte inden hemel, bi een half vre,

+ A vers 1

2

ende ic sach seuen engelen in die tegenwoordicheit Gods staen, ende haer zijn seuen basuynen ghegeuen,

3

ende daer quam een ander engel ende stont voor den outaer, ende hadde een gulden wieroocx vat, ende hem wert veel ruecwercx gegeuen, op dat hijse soude geuen vanden gebeden alder

[afbeelding]

heyligen, op den outaer voor den stoel,

4

ende den roock des ruecwercx vanden gebeden der heyligen ginc op vander hant des engels voor Gode,

5

Ende die Engel nam dat wieroocx vat, ende veruulde dat met vuere des outaers, ende worpt op die aerde, ende doen ghescieden stemmen, donder, ende blixem, ende eertbeuinghe.

6

⁺Ende die seuen engelen metten .vij. basuynen hadden haer bereyt om te basuynen,

+ B vers 6

7

Ende die eerste engel basuynde ende het wert hagel, ende vuer met bloet ghemengt, ende vielen opter aerden, ende dat derde deel der bomen is verbernt, ende alle tgroene hoy is verbernt.

8

Ende die tweede engel basuynde, ende het voer als eenen groten berch met vuer bernende inde zee,

9

ende dat derde deel der zee wert bloet, ende dat derde deel der leuender creatueren storuen, ⁺ ende tderde deel der scepen verdoruen oft verginghen.

+ C vers 9

10

Ende die derde enghel basuynde, ende daer viel een grote sterre vanden hemel, bernende als een fackele ende viel op dat derde deel des waterstroems, ende in dye fonteynen der wateren,

11

ende dien name der sterren hiet Alsene. Ende dat derde deel der wateren is geworden Alsene, ende veel menschen storuen vanden wateren, want si bitter waren geworden.

12

Ende die vierde engel basuynde, ⁺ ende dat derde deel der sonnen is gheslagen, ende dat derde deel der manen, ende dat derde deel der sterren, also dat dat derde deel van hen verduystert wert, ende dat het derde deel des daechs niet en scheen, ende die nacht des gelijcx.

+ D vers 12

13

Ende ic sach ende hoorde eenen engel vliegen midden door den hemel, segghende met luyder stemmen, Wee wee wee, den ghenen die opter aerden wonen, voor die ander stemmen der basuynen, der drie engelen, die noch basuynen souden.