Volksboek van Margarieta van Lymborch (1516)

Hoe dat etsijtes moeder claechde teghen sinen vader. dat hi so quaet was, ende hoe dat si eenen brief sonden aen margrieten van lymborch. [ 24 ]

[Dat. LVII. capittel.]

ETSIJTES moeder wert in lancx so meer verstoort. omme dat etsijtes margrietens liefde niet vergheten en conste. ende si ghinct claghen haren man ende seide. o heere en ist niet te beclaghen dat ons sone etsijtes ymmer trouwen wilt margrieten van limborch een coopmans dochtere. daer hy staet te werden hier namaels een coninc van armenien. ende si seide heere en soude u dat niet spijten. Die grave antwoorde daer op ende seide. ic gheloove wel iaet. nae den state der edelheit en soudt niet behoren. want hoocheyt van state die soudes hem schamen. nochtans waer beter die duecht aen gesien. dan die edelheit. oft een goet exempel. Dwelc ons bewijst die coninck asswerus. die vol duechden ende weerdicheden was. also dat hy festa verstiet door haer hoverdicheit. ende hi verhief hester die arm was door haer oetmoedicheyt. ende die duecht die was haer edelheyt. ende also comt edelheit ierst wt duechden. ende dits twoort van die lieden die van verstandt ende consciencien syn. Daer op die vrouwe antwoorde ende seyde. waer duecht voor edelheit ghepresen. ende dat costume waer. ic liets my ghenoeghen. mer nu moeten wi achter volghen den staet van hoocheden ende edelheden. also wi sculdich sijn tachter volghen. Doen antwoorde die grave tot sinen wive. ende hi seide haer een proper parabole. Dat was dat die sulcke climpt na hoocheit hi en weet waer met ofte hoe. ende dan moet hi dalen also lucifer dede int diepste vander hellen. Peynst vrouwe dat die sculden vele u sijn dat etsijtes aldus fel ende quaet is want ghi hebt hem ontrocken sijn lief margrieta. ende si is absent wt sinen oghen. aldus is hi te felder ende te wreeder. hadt ghijse binnen onsen hove gelaten. sijn liefde waer lange vercoelt. want dat gebruycke van liefde dat maect verleedinge. Die moeder seide ic kenne dat u woorden waer sijn. ende ic sal eenen bode gaen senden aen margrieten. dat si mijnen sone etsijtes ontbiede bi haer te comen. ende dat si hem castije van sinen quaden zeeden Dien raet docht den vader seer goet ende seide. vrouwe also soudt comen dat etsijtes ons sone sal te vreden sijn. ende hem selven voeghen tot edelheden. ende tot wercken van eeren. Met deser themen riep si den bode. ende si gaf hem den brief ende seide. bode loopt in griecken ende draecht margrieten van lymborch desen brief. ende si gaf hem drinck ghelt Aldus liep die bode sijnder veerden na dat landt van griecken. om margrieten te gheven den brief.