Nieuwe Testament (Zuidnederlandse vertaling)

II

Den ingel der kerken van Ephesien scrijft:

Dese seget, die de VII sterren houdt in sine rechte hant, die wandelt in midden den VII gulden candeleren: Ic weet dijn werke ende dinen arbeit ende dijn gedoechsamheit ende dattu niet en moges gedoegen die quadere ende du heefse versocht, die hen selven apostelen seggen ende niet en sijn, ende du heefs hen von den logenachtech, ende du heves gedoechsamheit ende du heefse geleden om minen name, ende du en gebraecs niet. Maer allettel hebbic jegen di, dattu dine ierste caritate heves gelaten. Ende alsoe herdinke van waer du ute gevallen sijs ende doech penitencie ende doet die ierste werke. Eest dat gijs niet en doet, soe comic haestelec te di ende bewege dinen candelere van sijnre stat, en si dattu sijs doende penitencie. Maer dit hebstu, want gi haet de werke der Nicolaytarumme [Sed hoc habes, quia odisti facta Nicolaytarum - gheenre die van Nycholaus secten sijn (corr.)]

[fol. 236r]

ende de welke ic hatede. Die oeren heeft te hoerne, hi hoere wat de geest den kerken seget: Soe wie verwint, ic sal hem geven tetene vanden houte des levens, dat in den paradyse mijns Gods es.

Ende den ingel der kerken van Smyrna scrijft:

Dese seget de ierste ende de leste, die doot was ende leeft: Ic weet dijn tribulacie ende dijn armoede, maer du bes rike ende du hebs blasphemie van dien, die hen seggen Joden sijnde ende niet en sijn, maer si sijn Sathanas synagogen. Niet en vreese die dinge, de welke du gedoegen sels. Siet, de duvel es uutsendende enege uut u lieden in den kerkere, op dat hine tempteere, ende gi selt hebben tribulacie X dage. Maer sijt getrouwe toter doot ende ic sal di geven de crone des levens. Die oeren heeft te hoerne, hoere, wat de geest seget den kerken: So wie verwint, die en sal niet gelet werden vander ander doot.

Ende den ingel der kerken van Pergami scrijft:

Dese seget die tswert heeft te beiden siden scaerp: Ic weet waer du woens, waer Sathanas sitten es, ende du hiels minen name ende en loechenes niet

[fol. 236v]

mijns geloeven. In den dagen Antiphas bestu mijn getrouwe getuge, die gedoodt es bi u, daer die duvel woent. Maer ic hebbe een lettel jegen di, dattu daer hebs die houden Balaams leeringe, die leerde Balacs scande te sendene vore de sonen van Israhel, vanden sacrificien der afgoden tetene ende fornicacie te doene, ende also hebstu houdende de leeringe der Nicolaytarumme. Ghelikeleke doet penitencie, ende eest dat gijs niet en doet, so salic haestelec te di comen, ende ic sal vechten met hen in den swerde mijns monts. Die oeren heeft te hoerne, hoere wat de geest seget den kerken: So wie verwint, ic sal hem geven dat verborgen hemelsce broet ende ic sal hem geven enen blickenden calculum [ronde scive] ende in den calculo gescreven een nuwe name, die niemen en weet dan dienne ontfaen.

Ende den ingel der kerken van Thyrathyre scrijft:

Dese seget die Gods sone, die ogen heeft als vlammen des viers ende sine voete gelijc den geloeyenden latoene: Ic kinde dijn werke ende dijn geloeve ende dine caritate ende dinen dienst

[fol. 237r]

ende dine gedoechsamheit ende de leste werke meerre dan dierste. Maer ic hebbe een lettel jegen di, want du gedoeges den wive Zesabel, de welke seget, datse prophetinne es, te lerene ende te verleidene mine knechte fornicacie te doene ende tetene datten afgoden geoffert es. Ende ic gaf hare tijt, op dat si penitencie doen soude ende si en woude niet af laten van harre oncuusscheit. Siet, ic salse leggen [senden] in een hijsbedde ende die met hare gehoerdoemt hebben, in der groetster tribulatien, en si dat si penitencie doen van haren werken, ende ic sal hare sonen doden in de doot, ende dit selen weten alle kerken, want [dat] ic ondersoekende ben de herten ende de nieren, ende ic sal elcken geven na sinen werken. Maer ic segge u ende den anderen, die te Tyratyren sijt, soe wie niet en hebben dese leeringe, die niet en bekinnen de hoecheit Sathanas also si seggen: Icken sal niet senden op u een andere bordenne, nochtan dat dattu hebds, houdet tote dat ic comen sal. Ende die verwennen ende behoeden mine werke tote in dinde, dien

[fol. 237v]

salic geven mogentheit over de heidene ende hi salse regeren in eere yseren roeden, ende si selen werden te broken als eens potmakers vat also ict genomen hebbe van minen vader ende ic sal hem geven die clare margensterre. Die oeren heeft te hoerne, hoere wat de geest seget den kerken.