Noordnederlandse Historiebijbel

19 capittel

Het wort Joab geboetscapt dat coninc David ghinc carmen ende clagen ende screyen om Absolon, sinen soen. Ende die victori die wort verkeert in screyen van al den volc, omdat si hoerden dat die coninc screyde ende bedroeft was. So en dorste nyement van sinen volc in die stede comen, mer si liepen wederom, gelijc of si van enen strijt geweken hadden, want die coninc ghinc mit bloten hoefde ende riep mit luder stemmen: "Absolon, lieve soen, lieve soen Absolon." Doe ghinc Joab tot den coninc ende seide: "Here coninc, gi hebt

[fol. 143va]

huden al u volc bedroeft die u lijf bescermt hebben, ende dat leven uwer knechten ende uwer dochteren ende dat leven uwer wiven ende uwer biwiven. Gi mint diegene die u haten ende gi haet diegene die u minnen. Ende dat openbaer gi nu, want gi en acht op u princen ende op u dienres niet. Ende ic kent nu waerachtelic dat gi wout dat Absolon leefde ende wi alle doot waren. Nu staet op ende laet uwen rou ende gaet voir der poorten ende spreket u volc toe ende doet hem vrientscap. Ic sweert u bi den Here: en ga gi niet uut ende spreect hem toe, daer en sel niet een mensche van deser nacht bi u bliven. Ende het sel arger wesen dant ye was van uwer kintscheit tot nu toe." Doe stont David op ende ghinc sitten in der poorten. Ende dat wort den volc buten geboetscapt, dat David in der poorten sat om dat volc te ontfangen. Doe quam dat gemeen volc voer den coninc ende hi ontfincse vriendelic. Die van Ysrahel die mit Absolon waren ende gevloen waren, die quamen tot coninc David om graci. Ende hi ontfincse in genaden.

Doe sende David in Jherusalem tot Sadoch ende tot Abyather, die pries\teren.

[fol. 143vb]

Ende hi ontboet hem dat si seggen souden tot die van Juda waerom dat si so laet comen om den coninc te brengen in sijn huys. "Ende seg hem dat si mijn been ende mijn vleis sijn. Ende segt Amasa dat hi mijn been ende mijn vleis is ende dat hi voir Joab mijn maerscalc sel wesen." Doe seiden die van Juda eendrachtelic tot coninc David dat hi comen soude mit al sijn volc.

Doe quam coninc David op der Jordanen ende die van Juda quamen hem jegen in Galgala. Ende Semey quam haestelic voer David mit 1.000 mannen ende viel haestelic op sine knyen ende bat genade ende seide: "Here coninc, niet en gedenct mine quaetheit noch dat onrecht dat ic u dede doe ic uut Jherusalem toech. Here coninc, ic bekenne mine quaetheit. Daerom bid ic genade ende come tot u mit Josephs geslacht." Doe seide Abysay, Davids suster soen: "Sel gi om deser woerden willen Semey niet doden die den gesalfden coninc vermaledide ende vloecte?" Doe seide David: "Wat onderwint gi u van my, gi, Servyen soen? Waerom wil gi mi quaet doen in satham? Ic en sel huden niet een mensche doen doden in Ysrahel. Ende doe seide David tot Semey: "Gi en selt niet sterven," ende dat swoer hi hem. Doe

[fol. 144ra]

quam Syba mit 15 kinderen ende mit 20 knapen jegen den coninc om vrientscap hem te doen. Myfiboseth, Jonathas soen, quam den coninc jegen mit bloten hoefde ende mit bloten voeten ende den baert gescoren. Doe seide die coninc: "Myfiboseth, waerom en toech gi niet mit mi uut Jherusalem?" Doe seide Myfiboseth: "Here, mijn knechten die verbodent mi, omdat ic crepel was. Doe seide ic: bereit mi enen ezel, dat ic riden mach. Mer si versmedent. Mer gi sijt mijn coninc ende mijn here; doet dat u behagelic is." Doe seide David: "Gi ende Syba die sellen u guede gelijc deelen." Doe seide Myfyboseth: "Here coninc, het sel gescien als ghi wilt."

Doe quam daer een man, hiet Bersellya, ende was van Galaad ende toech mitten coninc ter Jordanen toe. Ende hi hadde den coninc mit sijn gesin gespijst in der voestinen. Doe seide David tot Bersellay: "Coemt mit mi in Jherusalem. Daer sel gi vry wesen sonder sorgen." Doe seide Barsellay: "Heer coninc, ic ben 80 jaer out. Ic en heb voertan geen verstant noch smaec. Ende ic en hoer niet wel. Ic danc u. Mer ic sel u geleiden ter Jordanen toe ende dan keer ic weder thuyswaert om in mijn stede te sterven, opdat ic bi minen vader begraven mach wor\den.

[fol. 144rb]

Mer, here coninc, ic heb hier enen soen die sel mit u trecken. Doet mit hem dat u guet denct." Doe seide David: "Canaan, gi selt mit mi trecken, ende wat gi van mi bidt, dat sel ic u doen."

Doe custe David Bersellay ende gebenedide hem ende schiet van hem. Doe ghinc coninc David over die Jordaen mit sinen volc te Jherusalem waert. Ende die van Ysrahel ende van Juda die hadden onderlinghe herde woerden, omdat elc des conincs beste vrient woude wesen.